އަންނަ ސެޕްޓެމްބަރު މަހު ފަހުކޮޅު ރާއްޖޭގައި ބާއްވާ ރިޔާސީ އިންތިޚާބަކީ މިނިވަން، އިންސާފުވެރި އިންތިޚާބަކަށް ހެދުމަށްޓަކައި އިންޑިޔާއަށް ދެވެން އޮތް އެހީތެރިކަމެއް ބޭނުން ކަމަށް ކުރީގެ ރައީސް މުޙަންމަދު ނަޝީދު ވިދާޅުވެއްޖެއެވެ.
އިންޑިޔާގެ ޓީވީއަކަށް ދެއްވި އިންޓަވިއުއެއްގައި ނަޝީދު ވިދާޅުވީ ރާއްޖޭގެ ކަންކަން މިހާރު ހުރިގޮތުން އިންޑިޔާގެ އެހީއާނުލައި ރާއްޖޭގައި ބާއްވާ ރިޔާސީ އިންތިޚާބަކީ އިންސާފުވެރި އިންތިޚާބަކަށް ނުވާނެ ކަމަށެވެ. އެހެންކަމުން ރިޔާސީ އިންތިޚާބުގައި އިންޑިޔާއިން އެހީތެރިކަން ފޯރުކޮށްދީ، އިންތިޚާބުގެ މިނިވަންކަން އިންޑިޔާއިން ކަށަވަރުކޮށްދޭނެ ކަމުގެ އުންމީދުގައި ހުންނެވި ކަމަށް ނަޝީދު ވިދާޅުވިއެވެ.
ނަޝީދު ވިދާޅުވީ އިދިކޮޅު ހުރިހާ ސިޔާސީ ލީޑަރުންނާއި ސުޕްރީމް ކޯޓުގެ ފަނޑިޔާރުން ހައްޔަރުކޮށް ޖަލަށް ލާފައިވާތީ ރިޔާސީ އިންތިޚާބު ބޯމަތިވެގެން އަންނަ އިރު ރާއްޖޭގެ މަސްރަޙު ވަނީ ވަރަށް ބޮޑަށް ގޯސްވެފައި ކަމަށެވެ. އަދި އެމްޑީޕީގެ ރިޔާސީ ޕްރައިމަރީ އެމަނިކުފާނު ކާމިޔާބު ކުރައްވައި އިންތިޚާބަށް ނުކުމެވަޑައިގަތުމަށް ނިންމަވާފައި ވިޔަސް ސަރުކާރުން ވަނީ އިންތިޚާބަށް އެމަނިކުފާނަށް ނުނިކުމެވޭނެ ގޮތް ހަދާފައި ކަމަށް ވިދާޅުވިއެވެ.
ރިޔާސީ އިންތިޚާބު މިނިވަން ކުރުމަށް އިންޑިޔާގެ އެހީތެރިކަމަށް ނަޝީދު އެދިވަޑައިގެންނެވިއިރު އިންޑިޔާއިން ދާދިފަހުން ބުނެފައި ވަނީ ކުރީގެ ރައީސް މައުމޫނާއި ސުޕްރީމް ކޯޓުގެ ދެފަނޑިޔާރުންގެ މައްޗަށް އިއްވި ޖަލު ޙުކުމާއެކު ސެޕްޓެމްބަރު މަހު އޮންނަ ރިޔާސީ އިންތިޚާބު މިނިވަން، އިންސާފުވެރި އިންތިޚާބަކަށް ވެގެން ހިނގައިދާނެތޯ ސުވާލު އުފެދޭ ކަމަށެވެ.
ނަމަވެސް އިލެކްޝަން ކޮމިޝަނުން ބުނެފައި ވަނީ ކުރިޔަށް އޮތް ރިޔާސީ އިންތިޚާބަކީ މިހާތަނަށް ރާއްޖޭގައި ބާއްވާ އެންމެ ބޮޑަށް ހުޅުވާލެވިފައިވާ އިންތިޚާބަށް ވެގެންދާނެ ކަމަށެވެ. އަދި އިންތިޚާބަކީ މިނިވަން، އިންސާފުވެރި އިންތިޚާބަކަށް ވެގެންދާނެ ކަމަށެވެ.
