އިދިކޮޅު ކޯލިޝަނުން ކުރިޔަށް އޮތް ރިޔާސީ އިންތިޚާބަށް އެއްކެންޑިޑޭޓް ނެރޭނެ ކަމަށާއި އިންތިޚާބު ކާމިޔާބު ކުރާނީވެސް އެއްބުރުން ކަމަށް ޖުމްހޫރީ ޕާޓީގެ ލީޑަރ ގާސިމް އިބްރާހިމް މިރޭ ވިދާޅުވެއްޖެއެވެ.
ޖަރުމަނުވިލާތުގައި ދިރިއުޅުއްވާ ގާސިމް މިރޭ ކުރެއްވި ޓްވީޓެއްގައި ސަރުކާރަށް ވަރަށް ބޮޑަށް ރައްދު ދެއްވައި ވިދާޅުވީ ސަރުކާރު ޖެހޭނީ "ތެޅިތެޅި ތިބެން" ކަމަށެވެ.
"ﷲ އިރާދަކުރެއްވިޔާ އަޅުގަނޑުމެން އެއްކެންޑިޑޭޓް ނެރޭނަން، އަދި ރިޔާސީ އިންތިޚާބު އެއްބުރުން ކާމިޔާބުވެސް ކުރާނަން، ހަމަޖެހޭނީ ތެޅިތެޅި ތިބެން، އިންޝާﷲ" ގާސިމް ވިދާޅުވިއެވެ.
ގާސިމް ވަނީ ހޯމް މިނިސްޓްރީން މިއަދު ނެރުނު ބަޔާނަށްވެސް ރައްދު ދެއްވާފައެވެ. އެއީ ޙުކުމް ތަންފީޒު ކޮށްފައިވާ ގައިދީން ޕްރޮމޯޓްވާ ގޮތަށް ޚަބަރާއި މައުލޫމާތު ގެނެސްދޭ މީޑިޔާ ތަކަށް ފިޔަވަޅު އަޅާނެކަމަށް ބުނެފައިވާތީއެވެ. އަދި ބްރޯޑްކާސްޓިންގ ކޮމިޝަނުންވެސް ބްރޯޑްކާސްޓަރުންނަށް އެގޮތަށް އަންގާފައިވާތީއެވެ.
ސަރުކާރުގެ އެ ވާހަކަ ތަކަށް ރައްދު ދެއްވައި ގާސިމް ވަނީ ގައިދީންނަކީ ކޮބައިތޯ ސުވާލު ކުރައްވާފައެވެ. ގާސިމް ވިދާޅުވީ ނުފޫޒު ފޯރުވައިގެން، ބިރުދައްކައިގެން، ޙުކުމް ކުރުވައި، ބޮޑެތި އަނިޔާ ކުރުވާތީ އެވާހަކަތައް ދެއްކިޔަނުދީ "އޮބެހެއްޓޭނެ ދުވަސް" ނިމެން ވަރަށް ކައިރިވެއްޖެ ކަމަށެވެ.
"ހަގީގީ ގައިދީން އެދުވަހު ފެންނާނެ" ގާސިމްގެ ޓްވީޓު ނިންމާލަމުން ވިދާޅުވެފައިވެއެވެ.
އެއްކެންޑިޑޭޓް އިދިކޮޅު ކޯލިޝަނުން ނެރޭނެ ކަމަށް ބުނާއިރު ކުރީގެ ރައީސް މުޙަންމަދު ނަޝީދު އެމްޑީޕީގެ ޕްރައިމަރީގައި ވާދަކުރައްވާތީ ޖުމްހޫރީ ޕާޓީގެ ބަޔެއް އިސްބޭފުޅުން ވަނީ މީޑިޔާގައި އެކަމާމެދު ކަންބޮޑުވުން ފާޅު ކުރައްވާފައެވެ. ނަމަވެސް އެމްޑީޕީން ބުނަނީ އެއީ ކަންބޮޑުވުމެއް އޮތް ކަމެއް ނޫން ކަމަށާއި އެއްކެންޑިޑޭޓް ނެރުމާމެދު ކޯލިޝަނުގައި އޮތް އަށާރަ ނަވާރަ ކޮމިޓީގެ ނިންމުން ސާފުވާ ކަމަށެވެ.
