ޣައްދާރުންގެ އެންމެ މަތީ ގިންތިއަކީ ބާރުވެރި މަގާމުތަކުގައި ތިބެ އެމީހުންގެ ނާޖާއިޒު ބޭނުންތަކަށް ގައުމު ނުރައްކަލުގެ ތެރެއަށް ވައްޓާލާ މީހުން ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޕީޕީއެމްއިން މިރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ. "ޣައްދާރުވާ އެންމެވަރުގަދަ ގިންތިއަކީ ބާރުވެރި ކަމުގައިތިބޭ ބަޔަކު އެބަޔެއްގެ ނާޖާއިޒު ބޭނުން ހިފައިގެން ދިވެހިރާއްޖެ މިކަހަލަ ނުބައި ނުރައްކާތެރި ޚުތޫރަތްތެރި ފުރުސަތުތަކަށް ހުށަހަޅުމަށް އެކަންކުރާ މީހުން،" ރައީސް ވިދާޅުވިއެވެ. އެމަނިކުފާނު ވިދާޅުވީ އެގޮތަށް އަމަލު ކުރުމުން ރާއްޖެއަސް އަންނަން ބޭރުމީހުންނަށް ފުރުސަތު ލިބިގެންދާ ކަމަށެވެ.
ގައުމަށް ޣައްދާރުވަނީކީ ހަމައެކަނި ބޭރުގެ އަސްކަރިއްޔާ ގެންނަން ގޮވާލާ މީހާ އެކަންޏެއްނޫން. އެއީ ޝައްކެއްނެތް ގޮތުގައި ޣައްދާރުގެ ސަފުގައި އެންމެ އިސްމީހުންގެ ތެރޭގައި ހިމެނޭ މީހެއްކަމަށް ރައީސް ވިދާޅުވިއެވެ.
ރައީސް ވިދާޅުވީ އަމިއްލަ ދަހިވެތިކަމެއްގެ ތެރެއިން މަސައްކަތް ކުރާ ކޮންމެ މީހަކީވެސް ޣައްދާރުގެ ލޭބަލް ޖެހިގެންދާ މީހެއް ކަމަށެވެ. ގާނޫނާ ޚިލާފަށް އެފަދަ ކަންކަން ކުރުމަކީ އެމީހަކަށް ގާނޫނީ ގޮތުން ކުރުން މަނާކަމެއް ކަމަށްވެސް ރައީސް ވިދާޅުވިއެވެ.
އެފަދަ ކަންކަންކުރަން އުޅޭ އެއްވެސް މީހަކަށް ދިވެހިރާއްޖޭގެ ވެރިކަން ބަދަލުކުރުމުގެ ހައްގެއް ނޯންނާނެ ކަމަށްވެސް ރައީސް ވިދާޅުވިއެވެ. "އެމީހަކަށް އޮންނާނެ ހައްގަކީ އެމީހަކު ކުރާ ސިޔާސީ މަސައްކަތުގެ ތެރެއިން ރައްޔިތުންގެ ވޯޓުހޯދައިގެން ވެރިކަމަށް އައުން. އެކަމަކު ގާނޫނީ ސަރުކާރެއް ވައްޓާލަން ޚާއްސަ ގޮތެއްގައި ރިޝަވަތު ދީގެން މިކަންކުރުމަކީ އޮތް ކަމެއްނޫން. ރިޝްވަތު އޮތީ ކިހާ ހަމައެއްގައިކަން އަޅުގަނޑުމެންނަށް އެނގޭނެ މި މައްސަލަތައް ބަލައި ނިމުނީމައި. މިހާރު އެބަ އެނގޭ ފުލުހުން ދެއްވާ ބަޔާންތަކުން،" ރައީސް ވދާޅުވިއެވެ.
ރައީސް ވިދާޅުވީ ފެބުރުއަރީ އެކެއްގައި ރާއްޖޭގައި ހިނގައިދިޔައީ ބަޣާވާތެއް ކަމަށެވެ. އޭގެ ތެރެއިން އެންމެބޮޑު ބަޣާވާތެއް ކުރި ބަޔަކަށްވާނީ މަގާމުގެ ބާރާއި ނުފޫޒު ބޭނުންކޮށްގެން އެކަންކުރަން އުޅުނު މީހުން ކަމަށެވެ.
"ފެބުރއަރީ އެކެއްގައި ހިނގައިދިޔަ ކަންތަކަކީ ބަޣާވާތެއް. މިބަޣާވާތުގެ ތެރެއިން އެންމެ ނުރައްކާތެރި އެންމެބޮޑަށް ބަޣާވާތްކުރި ބަޔަކަށްވާނީ މަގާމުގެ ބޭނުން ނާޖާއިޒު ގޮތުގައި ހިފައިގެން މުޅިދިވެހި އުންމަތަށް، ދިވެހިރާއްޖެއަށް މިދެންނެވި ނުބައި ސުންޕާ ކަންތައް ހިންގަން މަސައްކަތްކުރި މީހުން،" ކަމަށް ރައީސް ވިދާޅުވިއެވެ. ހިނގައިދިޔަ ކަންކަން އެދުވަހު ހިނގައިދިޔައީ މަގާމުގައި ތިއްބެވި ބޭފުޅުން އެކަމަށް ފުރުސަތު ފަހިކޮށްދެއްވީމައި ކަމަށްވެސް ރައީސް ވިދާޅުވިއެވެ.
