ރާއްޖޭގެ ސިޔާސީ މަރަހުގައި މިހާރު ހިނގަމުންދާ ކަންކަން މަޝްވަރޭގެ މަތިން ހައްލު ކުރުމަށް ސަރުކާރުން އަނެއްކާވެސް ތިން ޕާޓީއަކަށް ދައުވަތު ދެއްވައިފިއެވެ.
ސަރުކާރުން ދައުވަތު ދެއްވައިފައިވަނީ ޖުމްހޫރީ ޕާޓީ (ޖޭޕީ) އާއި އަދާލަތު ޕާޓީ (އޭޕީ) އާއި ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އަށެވެ.
ސަރުކާރުން ވިދާޅުވެފައިވަނީ ރާއްޖޭގެ ހާލަތާބެހޭ ގޮތުން ޕާޓީތަކުގެ މެދުގައި މަޝްވަރާކޮށް، ކަންބޮޑުވުންތައް ހިއްސާކޮށް މިހާރު ދިމާވެފައިވާ މައްސަލަތަކަށް ހައްލު ހޯދުމަށް މަޝްވަރާ ކުރުމަށް މީގެ ކުރިންވެސް އެކިފަހަރު މަތީން ދައުވަތު ދެއްވި ކަމަށެވެ. އެހެންނަމަވެސް އެދައުވަތަށް އަދާލަތު ޕާޓީއާއި ޖުމްހޫރީ ޕާޓީއާއި، ދިވެހިރައްޔިތުންގެ ޑިމޮކްރެޓިކް ޕާޓީ އިން ޖަވާބެއް ދެއްވައިފައި ނުވާކަމަށެވެ. އެހެންނަމަވެސް މަޝްވަރާގެ އުސޫލުން ކަންކަން ހައްލު ކުރުމަށް މަޝްވަރާ ކުރުމަށް އަނެއްކާވެސް އެތިން ޕާޓީއަށް ސަރުކާރުންވަނީ ދައުވަތު ދެއްވައިފައެވެ.
ސަރުކާރުން ވިދާޅުވެފައިވަނީ 2016 ވަނަ އަހަރުގެ ފެބުރުއަރީ 15 އިން ފެށިގެން މިހާތަނަށް ޖުމުލަ 8 ފަހަރެއްގެ މަތިން ސިޔާސީ ޕާޓީތަކުގެ މަޝްވަރާއަށް ސަރުކާރުން ދަޢުވަތު ދެއްވި ކަމަށެވެ. އެހެންނަމަވެސް އެ ދައުވަތަށް ޕާޓީތަކުން ޖަވާބެއް ނުލިބުމުން އެކަމާ ސަރުކާރުން ނުހަނު ހިތާމަކުރައްވާ ކަމަށް ރައީސް އޮފީހުން ވިދާޅުވެފައިވެއެވެ.
މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބަކީ މިނިވަން، އިންސާފުވެރި އިންތިޚާބެއްކަން ޔަގީންކުރުމަށްޓަކައި ސިޔާސީ ޕާޓީތަކުގެ މެދުގައި މަޝްވަރާކުރުމަކީ މުހިއްމުކަމެއްކަމަށް ރައީސް އޮފީހުން ވިދާޅުވެފައިވެއެވެ.
އޭގެ އިތުރަށް އިއްޔެ ބޭއްވި ކައުންސިލް އޮފް ދަ ޔޫރަޕިއަން ޔޫނިއަންގެ ބައްދަލުވުމުގައިވެސް ރާއްޖެއަށް ދިމާވެފައިވާ މައްސަލަތަކަށް ހައްލެއް ހޯދުމަށްޓަކައި ސިޔާސީ ޕާޓީތަކުގެ މެދުގައި މަޝްވަރުމަށްވެސް ވަނީ ގޮވައިލައްވައިފައެވެ. އެހެންވީމާ ރައްޔިތުންގެ ހެވާއި ލާބައާއި މަންފާއަށްޓަކައި މަޝްވަރާގައި ބައިވެރިވުމަށް "ބާރުއަޅައި، އަދާލަތު ޕާޓީއާއި ޖުމްހޫރީ ޕާޓީއާއި ދިވެހިރައްޔިތުންގެ ޑިމޮކްރެޓިކް ޕާޓީއަށް ސަރުކާރުން އަލުން ދައުވަތު އެރުވިކަން ފާހަގަކުރަމެވެ." ރައީސް އޮފީހުން ވިދާޅުވެފައިވެއެވެ.
