ޖަރުމަނު ވިލާތުގެ ބާލީންގައި މިއަހަރު ބާއްވާ އިންޓަރނޭޝަނަލް ޓޫރިޒަމް ފެއާ (އައިޓީބީ) ގައި ރާއްޖެއިން ބޮޑު ވަފުދެއް ބައިވެރިވާނެ ކަމަށް އެމްއެމްޕީއާރުސީން ވިދާޅުވެއްޖެއެވެ.
އެތަނުގެ އެކްޓިންމެނޭޖިން ޑިރެކްޓަރ ހާރިސް މުހައްމަދު، ޕީއެސްއެމްއަށް ދެއްވި އިންޓަވިއުއެއްގައި ވިދާޅުވީ މިއީ ރާއްޖެއިން ބޭރުގައި ބާއްވާ މިފަދަ ފެއާއެއްގައި މިހާތަނަށް ރާއްޖެއިން ބައިވެރިވާ އެންމެބޮޑު ވަފުދު ކަމަށެވެ.
ޓޫރިޒަމް އިންޑަސްޓްރީ ތަމްސީލް ކުރުމަށް މިފަދަ ބޮޑު ވަފުދެއް މިދަނޑިވަޅުގައި ބައިވެރިވުމަކީ ސަރުކާރަށާއި ރައްޔިތުންނަށް ލިބިގެންދާނެ ކުރިއެރުމެއް ކަމަށްވެސް އޭނާ ވިދާޅުވިއެވެ. މިދުވަސްވަރަކީ ރާއްޖޭގެ ނަން ބޭރުގެ ދުނިޔޭގައި ކިލަނބުކޮށްލަން އިދިކޮޅު ފަރާތްތަކުން ކެނޑިނޭޅި މަސައްލަތް ކުރަމުންދާ ދަނޑިވަޅެއް ކަމަށްވާތީ ރާއްޖެ އިތުރަށް ޕޮރޮމޯޓު ކުރުމުގެ ފުރުސަތު މިފެއާގައި ލިބިގެންދާނެ ކަމަށްވެސް އޭނާ ވިދާޅުވިއެވެ.
މިފަދަ ހާލަތުގައި ޓޫރިޒަމް ދާއިރާގައި މަސައްކަތްކުރާ ކުންފުނިތަކާއި ރިސޯޓުތަކުން މި ފެއާގައި ބައިވެރިވުމަށް މިފަދަ ބޮޑުތަރުހީބެއް ދެއްވުކީ އުފާކުރާކަމެއް ކަމަށްވެސް ވިދާޅުވިއެވެ.
އޭނާ ވިދާޅުވީ މިފެއާގައި ރާއްޖޭގެ ފަތުރުވެރިކަން އިސްތިހާރު ކުރުމަށްޓަކައި ރާއްޖޭގެ ގުދުރަތީ ރީތިކަމާއި، ސުލްހަވެރިކަމާއި، އަމާންކަމުގެ ވާހަކަ އިސްތިހާރު ކުރެވޭނެ ކަމަށެވެ.
ރާއްޖެއިން މިފަހަރު ތައްޔާރުކުރާ ސްޓޭންޑަކީ އެންމެ ތަފާތު ސްޓޭންޑަށްވާނެ ކަމަށްވެސް އޭނާ ވިދާޅުވެފައެވެ. އެހެން ފަހަރުތަކޭ އެއްފަދައިން މިފަހަރުގެ ސްޓޭންޑުންވެސް ދިވެހި ސަގާފަތާއި، އާދަކާދައާއި، ދިވެހިކެއުން ނުވަތަ ރަހަތައް ބަލައިލުމުގެ ފުރުސަތުވެސް ލިބޭނެއެވެ.
އައިޓީބީ ފެއާ އޮންނާނީ މާރިޗު މަހުގެ 7 އިން 11 އަށެވެ. މިއަހަރުގެ ފެއާގައި ދުނީޔެގޭ 180 ގައުމަކުން 10،000 މީހުން ބައިވެރިވާނެއެވެ.
