ކުއްލި ނުރައްކަލުގެ ހާލަތު 30 ދުވަހަށް އިތުރު ކޮށްދެއްވުމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ރައްޔިތުންގެ މަޖިލީހުގައި އެދިވަޑައިގެންފިއެވެ.
އެމަނިކުފާނު މިމަހު 5 ވަނަ ދުވަހު ކުއްލި ނުރައްކަލުގެ ހާލަތު އިއުލާން ކުރައްވާފައި ވަނީ އެދުވަހުން ފެށިގެން 15 ދުވަހަށެވެ.
އެ މުއްދަތު އިތުރު ކުރެއްވުމަށް އެދިވަޑައިގެން ރައީސް މިއަދު ހުށަހެޅުއްވި ގަރާރަށް ބަހުސް ކުރެއްވުމުގެ ފުރުސަތުގައި ވާހަކަ ދައްކަވަމުން މާފަންނު ދެކުނުދާއިރާގެ މެންބަރު އަބްދުﷲ ރިފާއު ވިދާޅުވީ ގައުމަށް މިފަދަ ހާލަތެއް ދިމާވީ ޖުޑިޝަރީތެރެއިން ބަޔަކު ގައުމަށް ޣައްދާރުވުމުން ކަމަށެވެ. އެހެންވީމާ މިއަދުގެ މަޖިލީގައި ބައިވެރިނުވެ ބޭރުގައި ތިބި މީހުންވެސް ވޯޓުގައި ބައިވެރިވުމަށް އެތެރެއަށް ވަޑައިގެންނެވުމަށް ވިދާޅުވިއެވެ.
ފޭދޫ ދާއިރާގެ މެންބަރު އިބްރާހީމް ދީދީ ވިދާޅުވީ މިފަދަ ކަންކަމާ ކުރިމަތިލާން ޖެހެނީ ގައުމާއި، ދީނާއި، ގާނޫނު އަސާސއަށްވުރެ ބޮޑަށް ވެރިކަމާހެދި ބަޔަކު އުޅެގެން ދިމާވާ ކަންކަން ކަމަށެވެ.
ބަހުސްގެ މަރުހަލާގައި ޕީޕީއެމްގެ ޕީޖީ ލީޑަރު ނިހާނާއި، ވިލުފުށީ ދާއިރާގެ މެންބަރު ރިޔާޒު ރަޝީދާއި، ކުޅުދުއްފުށީ ދެކުނު ދާއިރާގެ މެންބަރު މުހައްމަދު ނަޝީދު ވާހަކަފުޅު ދެއްކެވިއެވެ.
ކުއްލި ނުރައްކަލުގެ ހާލަތު 30 ދުވަހަށް އިތުރު ކުރެއްވުމަށް ރައީސް ހުށަހެޅުއްވި ގަރާރަށް މިއަދުގެ ޖަލްސާގައި ގޮތެއް ނުނިމެއެވެ. ރައްޔިތުންގެ މައްޗަށް ލާޒިމްކުރާ އެއްވެސް ކަމެއް ރައްޔިތުންގެ މަޖިލީހުން ފާސްކުރަން ވޯޓަށްވެސް އެހޭނީ މަޖިލީހުގެ މެންބަރުންގެ ދެބައިކުޅަ އެއްބަޔަށްވުރެ ގިނަ މެންބަރުން ހަޒިރުވެ ވަޑައިގެން ތިއްބަވާ ޖަލްސާއަކަށެވެ. އެހެންނަމަވެސް މިއަދުގެ ޖަލްސާއަށް ވަޑައިގެން ތިއްބެވީ 39 މެމްބަރުންނެވެ.
މިއަދުގެ މަޖިލީސް ނިންމައިލީ ރައީސް ހުށަހެޅުއްވި ގަރާރު ގައުމީ ސަލާމަތުގެ ކޮމިޓީއަށް ފޮނުވުމަށް ނިންމަވައިފައެވެ.
ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވީ އެގަރާރަށް މަޖިލީހުން ގޮތެއް ނުނިންމަވައިފި ކަމަށްވާނަމަ އޭގެ ޒާތުގައި އެ ގަރާރު އުވިގެންދާނެ ކަމަށެވެ.
