(13 ޖޫން 2023 ގައި ޝާއިއުކުރި ބަޔާ ގުޅޭ)
ދޭވްއަށް ލިބިފައިވާ ހިތްދަތި މަސްތީ ޙާލަތުގައި ، ގޭތެރެޔަށްއެޅި ފުރަތަމަ ފިޔަވަޅާއެކު ، އޭނާގެ މަންމަގެ އަޑު އިވުނެވެ. ދޭވް އެވެ ! ދަރިފުޅު އައީ ހެއްޔެވެ ؟ މިއަދު ތިއައީ ހާދަ ލަސްކޮށްފައެވެ. އަންޖަލީގެ މަންމަ ސުއާލުކުރިއެވެ. ދޭވްއަށް ކިޔޭނުކިޔޭ އެއްޗެއް ނޭނގި އަނގަތަޅަމުން ، އަރިއަޅައި ބިއް ޖެހެމުންގޮސް ، ޓީވީރެކުގައި ލައިގަތެވެ. ހައްތާވެސް ހެއްދެވިފަރާތުގެ ނިންމެވުމެވެ. އެކަލާނގެ މިންވަރުކުރައްވާގޮތެވެ. ދޭވް ބުނަމުން ގެންދިޔައެވެ. ދޭވްހުރީ ހަމަހޭގައި ނޫންކަން އޭނާގެ މަންމަޔަށް އެނގުނެވެ. އަދި އެކަމާބެހޭގޮތުން ދޭވްއާ ސުއާލުކުރިއެވެ. ދޭވްވެސް އޭނާއެހުރީ ހަމަހޭގައިނޫންކަމަށް ބުންޏެވެ. އަދި މަންމަ ގާތަށް އައިސް ތަޅުންމަތީ އިށީނދެލިއެވެ. ދޭވްގެ މަންމަ އޭނާގެ ދަރިފުޅުގެ ލޮލަށް ބަލައިލިއެވެ. ދޭވްއަށް ވެފައިހުރިގޮތެއް ދެނެގަތުމަށެވެ. އެލޮލުން އެމަންމަޔަށް ފެނުނީ ވޭނާއި ކެކުޅުމެވެ. އުއްމީދެއްގެ ފަނޑު އަލިކަމުން ކުޑަމިންވަރެއްވެސް އެލޮލަކު ނެތެވެ. އޭނާ އެހުރީ ޢަމަލުވާ އެއްޗެއް ބޭނުންކޮށްގެން މަސްތުވެފައެއްނޫނެވެ. އޭނާގެ ހިތަށް ލިބުނު ބަރުދާސްތު ނުކުރެވޭފަދަ ވޭނެއްގައި ސިކުނޑި ގޮވާފައެވެ.
ވެގެންއުޅެނީ ކީއްތޯ ދޭވްގެ މަންމަ , ދޭވް އާ ސުއާލުކުރިއެވެ. ދޭވް އެއައީ އޭނާ ދޫކޮށްލާފައިކަމުގައި ދޭވް ބުންޏެވެ. ދޭވް އެއައީ އެކުއްޖާގެ ހިތް ދޫކޮށްލާފައެވެ. ދެން ދުވަހަކުވެސް އޭނާ އަކާ ދޭވް ، ބައްދަލެއް ނުކުރާނެއެވެ. ދުވަހެއްގެ ކޮޅުންވެސް ، އެ އަންޖަލީއަކާ ދޭވް ، ދެން ބައްދަލެއް ނުކުރާނެއެވެ. ދެން ދުވަހަކުވެސް އެ އަންޖަލީއަކާ އޭނާ ބައްދަލެއް ނުކުރާނެއެވެ. ދޭވް ، ތަކުރާރުކޮށް ބުނަމުން އެގެންދާ ވާހަކައެއް ، އޭނާގެ މަންމަޔަކަށް ޤަބޫލެއް ނުކުރެވުނެވެ. ދޭވް އެހަދަނީ ދޮގުކަމުގައި ބުންޏެވެ. ދޭވް އެކަހަލަކަމެއް ނުކުރާނެއެވެ. ދޭވް އަކީ އޭނާގެ ދަރިއެއްކަމުގައި ، ދޭވްގެ މަންމަ ބުންޏެވެ. ދޭވް އަކީ މީހެއްގެ ހިތް ހަލާކުކޮށްލާނެ މީހެއްނޫނެވެ. ދޭވް އެހަދަނީ ދޮގުކަމުގައި ، އޭނާގެ މަންމަ ތަކުރާރުކޮށް ބުނަމުން ގެންދިޔައެވެ. ދޭވް ރޮމުންރޮމުން ، އޭނާ އެހަދަނީ ދޮގުކަމުގައި ބުންޏެވެ. އޭނާއަކީ އެމަންމަގެ ދަރިއެއް ނޫން ހެއްޔެވެ ؟ މީހެއްގެ ހިތް ހަލާކުކޮށްލާނީ ކިހިނެއް ހެއްޔެވެ ؟ އޭނާ މީހަކު ދޫކޮށްލާނީ ކިހިނެއް ހެއްޔެވެ ؟ ދޭވް ވޭނާއެކީ ބުނަމުން ގެންދިޔައެވެ.
" މަންމާއެވެ ! އަހަރެން ދޫކޮށްލީ އަންޖަލީއެވެ. " ދޭވް އޭނާގެ މަންމަގެ އުނގުގައި ބޯއަޅައިލިއެވެ. ދޭވްގެ ދުލުން ، އަންޖަލީ އޭނާ ދޫކޮށްލައިފިއޭ ބުނިއަޑު ، މަންމަޔަށް އިވުނީ ހަމަ ކިރިޔާއެވެ. އެމަންމަގެ ބަލިހިތް ހުއްޓުނެވެ. އިށީނދެ އެއިން ގޮނޑީގައި ، އެއިންގޮތަށް ފަހަތަށްގޮސް ލެނގިލިއެވެ.
މަންމަޔަށް ވަޢުދެއްވެފައި އޮތްކަންވެސް ދޭވް ، އަންޖަލީއަށް ހަނދާން ކޮށްދިންކަމުގައި ދޭވް ބުންޏެވެ. އަދި މަންމަ ގާތު އޭނާބުނާނީ ކިކޭހޭވެސް ދޭވް އެހިއެވެ.
" އެ ބޭވަފާތެރިޔާ ބުނީ ކީކޭކަން އެނގޭ ހެއްޔެވެ ؟ އޭނާބުނީ މަންމަޔަށް ވިސްނޭނެ ކަމުގައެވެ. މަންމަޔަށް ވިސްނޭ ހެއްޔެވެ ؟ " ދޭވް އިންތަނުން ތެދުވެ ދުރަށްގޮސް ކޮއްޅަށްހުރެ ، އަޑުގެ ނެތްތަނަށް ، ހަރުއަޑުން ބުންޏެވެ.
އެހުރިހާއިރު ، ދޭވް ދައްކަމުން ގެންދިޔަ ވާހަކަތަކުގެ އަޑެއް އޭނާގެ މަންމަޔަކަށް ނީވެއެވެ. އަންޖަލީ އޭނާގެ ދަރިފުޅު ދޫކޮށްލައިފި ވާހަކަ އެމަންމަޔަށް އިވުނީ ކިރިޔާއެވެ. އެމަންމަގެ ހިތް ހުއްޓި ، ފުރާނަނެތް ހަށިގަނޑު ، ގޮޑީގެމައްޗަށް ދެމިލިއެވެ. ދޭވް އެހުރިހާ ވާހަކައެއް ދެއްކީ މަންމަގެ ފުރާނަނެތް މަސްގަނޑާއެވެ.
ދޭވްއަށް ، އަންޖަލީ އެދިނީ ވަރަށްބޮޑު އަނިޔާއެކެވެ. އޭނާއަށް އެކަންޏެއްނޫނެވެ. އޭނާގެ ނިކަމެތި މަންމަވެސް މިދުނިޔެ ދޫކޮށް އޭނާއާ ވަކިވީއެވެ. އަނެއްކާވެސް ، އޭނާ މިދުނިޔެއިން ބާކީވީއެވެ. އެކަނިވެރިވީއެވެ. އަންޖަލީ ، އޭނާގެ ޙަޔާތަށް އައުމުގެ ކުރިން އޮތް ޙާލަތަށެވެ. ކުރިއާ މިފަހަރާ ތަފާތެވެ. ދޭވްގެ އެކަނިވެރި ޙަޔާތުގައި ކުރިން ، އެކަކުވެސް ނެތެވެ. މިފަހަރު ، އަންޖަލީ އޭނާގެ ޙަޔާތުގައި ހުށްޓެވެ. އަންޖަލީ ، އޭނާއަށް ކެހިދިނީއެވެ. ނިދީގައި ދެކެމުން އައި ، ލޯބިލޯބި ދުނިޔެއެއްގެ ހުވަފެން މެދުކެނޑުނީއެވެ.
ދޭވް އޭނާގެ މަންމަޔަށް ގޮވައިލިއެވެ. އެމަންމަގެ ދެލޯވަނީ ތަންމިނަށް ހުޅުވިފައެވެ. ހިތުގައި ވިންދެއް ނެތެވެ. ހަށިގަނޑުގައި ދިރުމެއްނެތެވެ. އެމަންމަގެ ދިރުމެއްނެތް ދެލޯ ، ދޭވްގެ އިނގިލިތަކުން ލައްޕައިލިއެވެ. އަދި ފުރާނަނެތް އެމަންމަގެ މޭމަތީ ބޯއަޅައިލިއެވެ.
ދޭވްގެ ވިސްނުމުގައި ކުށްވެރިޔަކީ އަންޖަލީއެވެ. އަންޖަލީގެ މަޖުބޫރީ ޙާލަތާމެދު އެއްވެސް ވަރަކަށް ވިސްނާކަށް ، ދޭވް ބޭނުމެއް ނޫނެވެ. އޭގެ ބަދަލުގައި ދޭވް އަމާޒުހިފީ އަންޖަލީގެ ކިބައިން ބަދަލު ހިފުމަށެވެ. އެހެން މީހެއްގެ ކައިވެނީގައި އާބާދު ކުރަމުންދާނެ ، އަންޖަލީގެ ޙަޔާތް ބަރުބާދު ކޮށްލުމުގެ ވަޢުދު އޭނާގެ އަމިއްލަ ނަފުސަށް ، ކަށަވަރު ކުރިއެވެ. އަދި ، ކޮންމެވެސް އެއްދުވަހަކުން ، ދޭވްގެ މަރުވެފައިވާ ހިތުގެ ވިންދަށް ދިރުން ގެނެސްދިނުމަށްޓަކައި ، އަންޖަލީ އޭނާއަށް އާދޭސްކުރަން އަންނާނެ ދުވަހެއް ހޯދުމުގެ ޢަޒުމް ކަނޑައެޅިއެވެ. މަންމަގެ ފުރާނަނެތް މަސްގަނޑު ކުރިމަތީ ، ރޮވިފައި އިނދެއެވެ.
ޖޯހާންގެ ގެ ވަނީ ، ދުވަހަކުވެސް ޒީނަތްތެރިނުކުރާވަރަށް ރީތިކޮށް ، ކައިވެނީގެ ރަސްމިއްޔާތަށް ނަލަކޮށްފައެވެ. އެކިކުލައިގެ ހެދުމުން ޖަރީވެގެންތިބި އެކިފެންވަރުގެ މެހެމާނުން އޮތީ ތޮށްޖެހިފައެވެ. އޫޓީގެ ކަމުވޮށިވެގެންވާ އެންމެން ކަހަލަގޮތަކަށް އެރޭ އެއޮތީ އެގެޔަށް ޖަމާވެފައެވެ. އެރެޔަކީ ، ޖޯހާން އޭނާގެ ދަރިފުޅާ ދެވަން ހޯދި ޒުވާނާ ، ރާމް އާއި އަންޖަލީގެ ކައިވެނި ކުރެވޭ ރެޔެވެ.
ހިތަށް ފިނިކަމާއި އަރާމުލިބެމުންދާ މިއުޒިކީ ކަންވާރުތަކުން ބުނަމުން އެގެންދަނީ ، އުފާވެރިކަމަށް މަރުޙަބާކިޔުމުގެ ވަގުތު އަތުވެއްޖެކަމުގައެވެ. ޕަރީޒާދުންތެރެއިން ، ނަލަ ޕަރީއެއް އުޑުން ފައިބައިގެން ބިމަށް އަތުވެއްޖެއެވެ. އެއީ އަންޖަލީއެވެ. ޕަރީއެއްފަދައިން ، ކައިވެންޏަށް ނަލަހައްދައިގެން ، ދެފަރާތުގައި ތިބިކުދިންތަކާއެކު ، ފަހަތުގައި މަންމަ ، ޗާނދަނީ ހުރެގެން އަންޖަލީ ހޯލުތެރެޔަށް ނެރުނެވެ. އަންޖަލީ ހިނގަމުން އެދިޔައީ ، ފިނިފެންމަލުން ފުރިގެންވާ މަގަކުން އެމާތަކުގެ ފިޔަތަކަށް ތަދުކުރަމުންނެވެ. މުޅިތަން އޮތީ އެއްވަސް ކޮށްލާފައެވެ. ދެފަރާތުގައިތިބި މީހުންގެ މެދުންލާފައި ރާމްގެ ކުރިމައްޗަށް އަންޖަލީ ގެނެވުނެވެ. އެއީ ރީތި ހިތްގައިމު ޒުވާނެކެވެ. އޭނާހުރީ ފަރި ހިނިތުން ވުމެއްގައެވެ. އަންޖަލީގެ މޫނަށް ރާމް ބަލައިލިއެވެ. އެއީ ޕަރީއެއްފަދަ ނަލަ އަންހެންކުއްޖެކެވެ. އޭނާގެ މޫނުމަތީގައި އުފާވެރިކަމެއް ނެތެވެ. ފެންނަނީ ޖެހިލުންވުމާއި ހާސްކަމެވެ. ރާމް ، އަންޖަލީއާ ދިމާއަށް ބަލައިލިއެވެ. އެއީ ފިރިހެންކުދިންގެ ހިތްކަތިލައި ކުދިކުދި ކޮށްލާފަދަ ޝާއްބަކަމެއްހުރި ރީތި ކުއްޖެކެވެ. އަންޖަލީހުރީ އިސް އުފުލައިލަން ބޭނުންނުވާތީ ، އިސްދަށަށް ޖަހައިގެންނެވެ.
ކައިވެނީގެ ރަސްމިއްޔާތު އޮތް މާލަމަށް އަންޖަލީއާއި ރާމްގެ މައިންބަފައިން ތިބީ ޖަމާވެފައެވެ. އަންޖަލީގެ ކައިވެންޏަށް ބައްޕަ އިޚުތިޔާރުކުރި ، ޒުވާނާ ރާމް އާ އަންޖަލީ ކައިވެނިކުރީއެވެ. އެއީ މުއްސަނދި ޒުވާނެކެވެ. ޚުލްޤު ހެޔޮ ، ހެޔޮލަފާ ވިސްނުންތޫނު ، ކާމިޔާބު ވިޔަފާރި ވެރިޔެކެވެ. ހެދިހުރި ހަށިގަނޑެއްގެ ވެރިޔެކެވެ. އަންޖަލީ ، އެކައިވެންޏާ ޤަބޫލެވެ. ބައްޕަ އޭނާއަށް އެދެއްކި ، ފިރިމީހާއަށްޓަކައި އޭނާގެ ނަފުސު ޤުރުބާން ކުރާނެއެވެ. އެހެންނަމަވެސް ، އަންޖަލީގެ ހިތުގެ މައްޗަށް އޭނާއަށް އެއްވެސް އިޚްތިޔާރެއް ނެތެވެ. އެހިތަކީ އޭނާގެ ބާރު ފޯރާނެ އެއްޗެއްނޫނެވެ. އެހިތުގެ ވިންދަކީ ދޭވް އަށް ޚާއްޞަކުރެވިފައިވާ އިޙްސާސެކެވެ. އެހިތުގައިވާ ލޯބީގެ އިޙްސާސްތައް އަދިއޮތީ ތާޒާކަންމަތީ ، ދޭވްގެ ނަންމަތީގައެވެ. އެހެން އެއްވެސްމީހަކަށް އެހިތާ ހިސާބަކަށް ނުދެވޭނެއެވެ. ވައިވެސް އެޅި ނުލެވޭނެއެވެ.
އިންސާނާގެ ދިރިއުޅުމަކީ ކޮންމެ ވަގުތެއްގައިވެސް ބަދަލުވެދާނެ އެއްޗެކެވެ. ލޯބިވާ މީހުންނާއި މައިންބަފައިންނާ ވަކިވުން އެއީ ދުނިޔޭގެ އާދައެވެ. އަންޖަލީ އޭނާގެ މަންމައާއި ބައްޕަޔާ ވަކިވެގެން އެދަނީ އޭނާގެ ހިތުގެ ވިންދު އެމީހުންނާ ޙަވާލުކޮށްފައެވެ. މައިންބަފައިން ދޫކޮށްލާފައި ، ނުވެސް ދަންނަ މީހަކާއެކު ، ޙަޔާތުގެ ދަތުރު އެފެށީ ، ދެވޭނެ ވަކިމަންޒިލެއްގެ ކަށަވަރުކަން ނެތްޙާލަތެއްގައެވެ. ދަތުރުކުރަން ޖެހޭނީ ކޮންފަދަ މަގަކުންކަން ނޭނގޭ ޙާލުގައެވެ. ދޭވް އާ ވަކިވުމުން އޭނާގެ ހިތަށް ކޮށްފައިވާ އަސަރުގެ އިތުރަށް ، މައިންބަފައިންނާ ވަކިވާންޖެހޭތީ ، އަންޖަލީގެ ހިތަށް އެލިބޭ ވޭނާއި ތަކުލީފު ދެގުނަޔަށް ބޮޑެވެ. ޖޯހާން ، ރާމްއާ އެ ޙަވާލުކުރީ އޭނާގެ ފުރާނައެވެ. އެއްވެސް ކަހަލަ ތަކުލީފަކުން އެ ދަރިފުޅަށް ހިތްދަތިކަމެއް ތަޙައްމަލުކުރަން ނުޖެއްސުމަށް ޝަރުތު ކޮށްފައެވެ. ރާމްގެ މައްޗަށް އޮތް ފުރިހަމަ އިތުބާރަކަށް ބަރޯސާ ކޮށްފައެވެ. ހިތާމައާއި ހިތްދަތި ކަމުގެ ވަގުތު ކޮޅެކެވެ. ރުއިމާއި ސަލާމް ކުރުމުގެ ހިނދުކޮޅެކެވެ. އަންޖަލީގެ ކައިވެންޏަށްފަހު ، އެރެއިން އެރެޔަށް ފިރިމީހާއާއެކު ދިއްލީއަށް ހިޖުރަކުރިއެވެ.
އަންޖަލީމެން ދިއްލީ އެއާޕޯޓުން ނުކުމެ ، ކާރު ނާންނާތީ ބޭރުގައި އިރުކޮޅަކު މަޑުކޮށްލަން ޖެހުނެވެ. އެއީ ވަރަށް ހޫނު މޫސުމެކެވެ. ރޭގަނޑުގެ އިރާކޮޅެވެ. ދުވާލުގެ އިރުން ދުނިޔެ ދޮންކޮށްފައި އޮތުމުގެ ސަބަބުން ، އޭރު އަދި ހޫނުކަން ފިލައިގެންނެއް ނުދެއެވެ. އަންޖަލީގެ ދެމަފިރިންގެ އިތުރަށް އެތާތިބީ ، ރާމްގެ ދޮންމަންމައާއި ، އެ ދޮންމަންމަގެ ފިރިހެން ދަރިފުޅެވެ. ދޮންމަންމަގެ ދެންހުންނަ އަންހެންކުއްޖާ ، ނިކީ އޫޓީއަކަށް ނާދެއެވެ. އެއީ ރާމްގެ ބައްޕައަށް ، ދޮންމަންމަ އަށް ލިބިފައިތިބި އަންހެންކުއްޖަކާއި ފިރިހެން ކުއްޖެކެވެ. ޑްރައިވަރު ލަސްވެގެން ، ދޮންމަންމަވެސް އޭނާއާ ދިމާއަށް އެތިވަރުގޮވަމުން ގެންދިޔައެވެ. ދޮންމަންމަގެ ފިރިހެންދަރިފުޅު ، ބޮބީގެ ކަންތައް އަދި މާބޮޑެވެ. ޑްރައިވަރާ ދިމާއަށް ހެއްދެވި ނުހެއްދެވިޔަށް ގޮވަމުން ގެންދިޔައެވެ. އެކަލޭގެ ވަޒީފާއިން ކަނޑައިލާފައި ފޮނުވާލަންވީތާ ކިތަންމެ ދުވަހެކޭ ބުނެ ، ހަޅޭއްލަވަމުން ގެންދިޔައެވެ. އޭނާއަށްވުރެ މާ ރަނގަޅު މީހުން ދިއްލީން ލިބޭނެއެވެ. އެ ސަހަރުން ، ނޯކަރުން ހޯދާކަށް އުނދަގުލެއް ނުވާނެއެވެ.
ރާމް އަކަށް ނުހުރެވުނެވެ. ދިއްލީން ، ނޯކަރުން ހޯދާކަށް އެހައި އުނދަގުލެއް ނުވާނެއެވެ. އެކަމަކު ، ވަފާތެރި ނޯކަރުން ހޯދުމަކީ ، ފަސޭހަކަމަކަށް ނުވާނެކަމަށް ރާމް ބުންޏެވެ. އެއީ ، ނޯކަރެއްނޫނެވެ. އެޢާއިލާގެ މީހެކެވެ. ރާމްހުރީ މަޑުމައިތިރިކަމާއެކު ، ކެތްތެރިކަން އިސްކޮށްގެންނެވެ. ދޮންމަންމަވެސް ، އޭނާގެ ފިރިހެންދަރި ، ބޮބީއަށް ގޮވާލައި ، އޭނާގެ ބޭބެ އެދައްކަނީ ކިހާ ރަނގަޅު ވާހަކައެއް ހެއްޔޭ ބުންޏެވެ. އަދި އަންޖަލީއަށް ގޮވައިލުމަށްފަހު ، ޑްރައިވަރު ބައްބަންމިއާ އަކީ ، ރާމްގެ ބައްޕަގެ ޒަމާނުއްސުރެ އެމީހުންގެ ޚިދުމަތުގައި އުޅެމުން އަންނަ ޚާދިމެއްކަމުގައި ބުންޏެވެ.
އެވަގުތު ، ބަރުގޮނު އަޅަމުން އައިސް ، ބައްބަންމިއާ އެމީހުންގެ ކުރިމައްޗަށް ކާރު ހުއްޓައިލިއެވެ. ކާރުން ފައިބާ އެންމެންނަށް ސަލާމް ގޮވައިލުމަށްފަހު ، އަންޖަލީގެ ދެމަފިރިންނަށް އޭނާ މަރުޙަބާކިއެވެ. ރާމް އައިސް ބައްބަންމިއާގެ ގައިގާ ބައްދާލައި އުފާވެރިކަން ފާޅުކުރިއެވެ. ޑްރައިވަރު އެހާލަހުން އައީތީ ދޮންމަންމަވެސް ހުރީ މޫނު ކުނިކޮށްފައެވެ. އެކަމާ ޝަކުވާ ކޮށްގަތެވެ. މާގިނައިރު އެތާ ތިބެވޭވަރަށްވުރެ ހޫނުވެސް ގަދައެވެ. ރާމްގެ ދެމަފިރިން އެއްކާރަށް އަދި ދޮންމަންމައާއި އޭނާގެ ދަރިފުޅު ބޮބީ ، އަނެއްކާރަށް އަރައި ގެޔަށް ދާން ދަތުރު ފެއްޓިއެވެ.
ރާމްގެ ދެމަފިރިންނަށް ގެއިން މަރުޙަބާކީ ، ދޮންމަންމަގެ އަންހެންދަރިފުޅު ނިކީއެވެ. އަންޖަލީއަށް މަރުޙަބާކީއިރު އޭނާހުރީ މޫނުން ފޫގަޅައިގެން ކުނިމޫނު ދައްކައިގެންނެވެ. އަންޖަލީއަށްވެސް އެކަން ފާހަގަ ކުރެވުނެވެ. އެކަން ފާހަގަ ކުރެވުނުކަމަކަށް ރާމް އެއް ނަހަދައެވެ. ނިކީގެ ކަޅިގޮސް ހުއްޓިފައިހުރީ އަންޖަލީގެ ކަރުގައި އަޅާފައި އޮތް އަގުބޮޑު ހާރަށެވެ. އޭނާގެ ދަރިފުޅުގެ ލޯ ސީދާވެފައިވަނީ އެހާރަށްކަން ، ދޮންމަންމައަށް އެނގުނެވެ. އޭނާގެ ދަރިފުޅުގެ ހިތުގައި އޮތް އެއްޗެއް ދެނެގަތެވެ. އެކަން ހަމަޖެހޭނެކަމަށް ބުނާގޮތަކަށް ، ވައްކަޅިން އޭނާއާ ދިމާއަށް ބަލައިލިއެވެ.
(ނުނިމޭ)
varahves reethi