ދުނިޔޭގެ ބާޒާރުގައި ތެލުގެ އަގު ހިފެހެއްޓުމަށް އަޅާ ފިޔަވަޅެއްގެ ގޮތުން، އެ ގައުމުން ބޭރުކުރާ ތެލުގެ މިންވަރުން ދުވާލަކު 1 މިލިއަން ފީފާ މަދުކުރުމަށް ސައޫދީ އަރަބިއްޔާއިން ނިންމައިފިއެވެ.
ސައޫދީ ތެލާ ބެހޭ މިނިސްޓްރީން ބުނިގޮތުގައި ޖުލައި މަހުން ފެށިގެން އަޅާ މިފިޔަވަޅާއެކު އެގަމުން ބޭރުކުރާ ތެލުން އުނިކުރި މިންވަރު ދުވާލަކު 1.5 މިލިއަން ފީފާއަށް އަރާނެއެވެ. އެއީ އޯޕެކް+ ޕްލަސްއާއެކު އެޅި ފިޔަވަޅެއްގެ ގޮތުން ކުރިން ބައި މިލިއަން ފީފާ މަދުކޮށްފައި ވާތީއެވެ. މިއާއެކު، އެގަމުން އުފައްދާ ތެލުގެ މިންވަރު ދުވާލަކު 9 މިލިއަން ފީފާއަށް ދަށްވެގެން ދާނެއެވެ.
ސައޫދީ އަރަބިއްޔާގެ މިނިންމުން ނިންމާފައި ވަނީ އޯޕެކްގެ މެންބަރު 13 ގައުމާއި، އެ ޖަމްއިއްޔާއާ ބައިވެރިވާ 10 ގައުމު ހިމެނޭ އޯޕެކް+ ގެ ބައްދަލުވުމަކަށް ފަހުގައެވެ.
ޖުލައި މަހު އަޅާ މިފިޔަވަޅުގެ "މުއްދަތު އިތުރުކުރުމުގެ ފުރުސަތު އެބައޮތް" ކަމުގައި، އިއްޔެ ނޫސްވެރިންނާ ބައްދަލުކުރައްވަމުން ސައޫދީ އެނާޖީ މިނިސްޓަރު ޢަބްދުލްޢަޒީޒް ބިން ސަލްމާން ވިދާޅުވެފައި ވެއެވެ.
އޯޕެކް+ ގެ މި ބައްދަލުވުމުގައި ނިންމާފައި ވަނީ އެ ގްރޫޕުން ކުރިން ކަނޑައަޅާފައިވާ ގޮތަށް 2024 ގައި ތެޔޮ އުފައްދާ މިންވަރު 40.46 ގައި ހިފެހެއްޓުމަށެވެ.
ތެޔޮ އުފައްދާ މިންވަރު ދަށްކޮށްފައި ބެހެއްޓުމަށް އޯޕެކް+ އިން ނިންމިއިރު، ދުނިޔޭގެ ބާޒާރުގައި ތެލުގެ އަގު މިހާރުހުރީ ގާތް ތެޔޮ ފީފާއަކަށް ގަނޑަކަށް 70 އެމެރިކާ ޑޮލަރުގައެވެ. އަދި ދުނިޔޭގެ އިގުތިސާދު މިހާރު އޮތް ހާލަތުގެ ސަބަބުން ތެލަށް ބޭނުންވާ މިންވަރު އިތުރުވެގެން ދާނެކަމަށް ނުބެލޭތީ، ތެލުގެ އަގު އިތުރަށް އުފުލިގެން ދާނެކަމަށް ތަޖުރިބާކާރުން ނުދެކެއެވެ.
