ކިރުއިލޮށި - 40

(17 އޭޕްރީލް 2023 ގައި ޝާއިއުކުރި ބަޔާ ގުޅޭ)

އެއްވާހަކައެއް ، ތަކުރާރުކޮށް އިވިއިވި ، ޚައިރާދު ފޫހިވިއެވެ. މާތް ﷲ އަށް ކެތްތެރިވުމާއި ޝުކުރުވެރިވުމެވެ. އަދި ޚައިރާދުގެ ބަނޑުގައިވާ ދަރިފުޅަށްޓަކައި ޚައިރާދުގެ ބޮލުގައި އެޅިފައިވާ ޒިންމާއާއި މަސްއޫލިއްޔެވެ. އެއްވާހަކައެއް ނަމަވެސް އެންމެންވެސް އެދައްކަނީ ، ރަނގަޅުވާހަކައެވެ. އެއީ ޚައިރާދަށް ހެޔޮއެދޭ ހިތްތަކަކުން ދައްކާނެ ވާހަކަތަކެކެވެ. ތަކުރާރުވިޔަސް މައްސަލައެއް ނެތެވެ. ބައެއްކަހަލަ ކަންކަމަކީ ، އެންމެންވެގެން ދައްކައިގެންނަމަވެސް ،  އިންސާނާގެ ހިތުގައި ހަރުލައްވަންޖެހޭ ކަންކަމެވެ. ހަނދާންކޮށްދިނުމަކީ ، އިސްލާމީ ރިވެތި އުޞޫލުތަކުގެ ތެރެއިންވާ ކަމެކެވެ. ހަނދާންކޮށްދިނުމަކީ ، ދިރިތިބީންނަށް ލިބޭފިލާވަޅުތަކުން ދިރިއުޅުން ބާއްޖަވެރުކުރުމަށް ލިބޭނެ ފުރުޞަތެކެވެ.

" އެއްވެސްކަމެއް ރަނގަޅަކަށް ނުހިނގައެވެ. ކަމެއް ރަނގަޅަށް ހިނގައިފި ހެއްޔެވެ ؟ މިއީ އަހަރެންގެ އެކަނި ކަމެއްނޫނެވެ. އަހަރެންގެ ދަރިފުޅުގެ ދިރިހުރުމާ ގުޅިފައިވާ ކަމެކެވެ. އެއަންހެންމީހާ އެހުރީ އަހަރެންގެ ދަރިފުޅު ދުނިޔެއަށް އައުމުގެ ކުރިން އެކުއްޖާފުޅުގެ ޙަޔާތް ، ލަދުހުތުރު ގޮތަކަށް ނިންމައިލުމަށް ރާވައިގެންނެވެ.  " ޚައިރާދު ، އަފްޝީނަށް ޖަވާބު ދިނެވެ.

އަޝްހަރު މަސައްކަތް ކުރަންއިންދާ ، އެތަނަށް ފަރީދާ އައެވެ. އެއިރު އެއީ ރޭގަނޑުގެ މެންދަމެވެ. މީހަކު އައިކަމުގެ އިޙްސާސްވެގެން ، އޭނާއަތުގައި އޮތް ސިނގިރޭޓް ، އަވަސް އަވަހަށް ނިއްވައިލިއެވެ. ފަރީދާ ، އަޝްހަރަށް ގޮވައިލިއެވެ. އަދި ، ރޭހަތަރުދަމުވެސް މަސައްކަތްކުރީ ކަމަށާއި މިރޭވެސް އެއުޅެނީ މަސައްކަތުގައިކަމަށް ބުންޏެވެ. އަޝްހަރު ކުރަން އެއުޅޭކަމެއް އޭނާއަށް ނޭނގޭކަމަށް ފަރީދާ ބުންޏެވެ. އޮފީހުން ގެޔަށް އައިސް ، ގެއިން އޮފީހަށްގޮސް ، އެއްވެސް އަރާމެއްނެތި ތިއުޅެނީ ކޮންގޮތަކަށް ހެއްޔެވެ ؟ އަމިއްލަ ނަފުސަށް އަނިޔާތިދެނީ ކީއްވެ ހެއްޔެވެ ؟

އަޝްހަރު އެކުރަނީ މަސައްކަތް ކަމަށާޢި ، އެއީ އޭނާއަށް ލިބޭ އަނިޔާއެއް ނޫންކަމަށާއި ލިބޭ ހިތްހަމަޖެހުމެއްކަމުގައި އަޝްހަރު ބުންޏެވެ. އެހެނަސް ، ފަރީދާ އެކަން ޤަބޫލެއް ނުކުރިއެވެ. ފަރީދާ ބުނިގޮތުގައި އަޝްހަރު އެކުރަނީކީ މަސައްކަތެއް ނޫނެވެ. އަޝްހަރު ، އޭނާގެ އަމިއްލަ ނަފުސަށް އަނިޔާ ދެނީއެވެ. އެތަން ބަލަން ހުންނާކަށް ފަރީދާއަށް ކުޅަދާނައެއްނޫންކަމަށް އޭނާ ބުންޏެވެ.

" ޚައިރާދާ ހުރެ ހެއްޔެވެ ؟ " ފަރީދާގެ ދުލުން ޚައިރާދުގެ ނަން އިވުމާއެކު ، ސިއްސައިގެންގޮސް އަޝްހަރުގެ މުށްކަވައިގަނެވުނެވެ.

" އެ މުޑުދާރު އަންހެންކުއްޖާއަށްޓަކައި ، އަޝްހަރުގެ ދިރިއުޅުން ހަލާކުކޮށްނުލާށެވެ ! " ފަރީދާ އިތުރަށް ބުންޏެވެ.

ޚާލާމެންގެ ގޭގައި އެންމެން އެއްވެ މެންދުރުގެ ނާސްތާކުރަމުން ގެންދިޔައެވެ. ޚައިރާދެއް ނާދެއެވެ. ޚައިރާދު އެހުންނަނީ ހަދާނެގޮތް ބޮޑުވެފައިކަމުގައި ޚާލާ އޭނާގެ ކުދިންގާތު ބުންޏެވެ. އަޝްހަރު ، ޚައިރާދާ ވާހަކަ ދައްކާކަށް ބޭނުމެއްނޫނެވެ. އަޝްހަރާ ވާހަކަ ނުދެއްކިގެން ، ޚައިރާދު އެހުންނަނީ ވަރަށް ހާސްވެފައެވެ. އެކަމަށް އޮތީ ހަމަ އެންމެ ޙައްލެއްކަމުގައި ޚާލާ ބުންޏެވެ. އެއީ ، އޭނާ ކަރާޗީއަށްގޮސް ، އަޝްހަރާ ވާހަކަ ދެއްކުމެވެ.

މަންމަ ކަރާޗީއަށް ގޮސްގެން ނުވާނެކަމަށް ޚާލާގެ ފިރިހެންދަރިފުޅު އަމުރުކުރިއެވެ. އެމީހުންނަކީ ، ރޭގަނޑުގެ މެންދަމު ، ގޭގެ ޅީދަރި ، ގެއިން ނެރެ އެއްލައިލި ބަޔެކެވެ. މަންމަ އެމީހުންގާތަށް ދިޔައިމާ ބަހައްޓާނީ ކޮން އަދަބެއް ހެއްޔެވެ ؟ އެއްޗެތިގޮވާފައި މަންމަވެސް އެގެއިން ނެރެ ބޭރުކުރާނެއެވެ. މަންމަ ، އެއްގޮތަކަށްވެސް ކަރާޗީއަށް ގޮސްގެން ނުވާނެއެވެ.

ޚައިރާދާމެދު އޭނާ ވަރަށް ކަންބޮޑުވާކަމުގައި ޚާލާ ބުންޏެވެ. ޚައިރާދުގެ ޙާލަތު އެއްދުވަހުން އަނެއްދުވަހަށް އެދަނީ ގޯސްވަމުންނެވެ.

ޚައިރާދަށް އެމީހުންނަށް ކޮށްދެވެން އޮތްކަމެއް މިހާރު އެދަނީ ކޮށްދެމުންކަމަށާއި ، ޚައިރާދު ބޭނުންކަމަށްވަންޏާ މިގޭގައި ޚައިރާދަށް މަޑުކުރެވިދާނެކަމުގައި ، ޚާލާގެ ދޮށީ އަންހެންދަރި ބުންޏެވެ. އަދި އެމީހުން އަތުގައި ލާރިހުރިވަރަކުން ، ޚައިރާދު ޑޮކްޓަރަށް ދައްކައި މަންމަ އެބަ ޚަރަދުކޮށްދެމެއްނޫންހޭ ބުންޏެވެ. އެކަމަކު ، މަންމަ ކަރާޗީއަށްގޮސް ، އަދަބުވެރިކަމެއްނެތި ، މަންމަޔަށް އެމީހުންކުރާ އިހާނެތިކަން އަހަރެމެން އެއްކުއްޖަކަށްވެސް ތަޙައްމަލު ނުކުރެވޭނެކަމުގައި އޭނާ ބުންޏެވެ. އެއީ ޚައިރާދަށްޓަކައި މަންމަ ކޮށްދީގެންވާނެ ކަމެއްކަމަކަށް އެއިން އެއްވެސް ކުއްޖަކު ނުދެކެއެވެ.

" ޚައިރާދުގެ ޙާލު ރަނގަޅުވުމުން ، ޚުދު ޚައިރާދު ކަރާޗީއަށް އޭނާގެ މައްސަލަ ޙައްލުކުރުމަށް ބާއްވާށެވެ ! މަންމަ އެ މައްސަލައިގެ ތެރެޔަށް ވަންނަން ނުހަދާށެވެ. " ޚާލާގެ ފިރިހެންދަރިފުޅު ބުންޏެވެ.

ސާރާ ، ފަރީދާގެ އެންޖީއޯގެ އޮފީހަށްގޮސް އަނގަތަޅަން އިނެވެ. ޚައިރާދުގެ މައްޗަށް ފަރީދާގެ ހިތުގައި އެހާބޮޑު ރުޅިވެރިކަމެއް އޮތްއިރު ، ޚައިރާދު ޙިމާޔަތް ކުރުމަށް މަސައްކަތް ކުރަނީ ކީއްވެގެންކަން ސާރާއަށް ނޭނގޭކަމުގައި އޭނާ ބުންޏެވެ. ޚައިރާދަކީ ، އަޝްހަރާ ދެމީހުންކައިވެންޏަކުން ގުޅި ، އޭނާގެ ދަރިފުޅުގެނަމާ ގުޅިފައިވާ އިންސާނެއްކަމަށް ފަރީދާ ބުންޏެވެ. އޭނާ އެ ހިމާޔަތްކުރަނީ ޚައިރާދު ނޫންކަމަށާއި ، އަޝްހަރުކަމުގައި ފަރީދާ ބުންޏެވެ. އަޝްހަރުގެ ނަމަށް ހުތުރވެދާނެކަމެއް އޭނާ ނުކުރާނެކަމަށް ފަރީދާ ބުންޏެވެ. ފަރީދާގެ މަޤްޞަދަކީ ، އޭނާގެ ދަރިފުޅުގެ ޙަޔާތުން އެ އަންހެންކުއްޖާ ބޭރުކޮށްލުންކަމަށް ފަރީދާ ބުންޏެވެ. ޚައިރާދުގެ ކިބައިގާ ކުޑަވެސް ލަދެއް ޙަޔާތެއް ހުރިނަމަ ، އަލުން އެމީހުންނާ ކުރިމަތިލުމަށް އަންނަން ނުކެރޭވަރު ކޮށްފައި އޮންނާނެކަމަށް ފަރީދާ ބުންޏެވެ.

އެކަމަކު އަޑު އަހާށެވެ ! ފަރީދާ ބުނަމުން ގެންދިޔައެވެ. އެ ވާހަކަޔަކީ ، ޒަރީނާއާވެސް އޭނާ ދައްކާފައިވާ ވާހަކަ އެކެވެ. އަދި ސާރާއާވެސް އެވާހަކަ ދައްކަން ބޭނުމެވެ. އެމައްސަލައިގެ ތެރޭގައި ހިނގި އެއްވެސްކަމެއްގެ ޚަބަރު އެއްވެސް މީހަކަށް އެނގިގެން ނުވާނެއެވެ. އެއިންކަމެއް މީހަކަށް އެނގިއްޖެނަމަ ، އެމީހުންނަށް ފޫނުބެއްދޭފަދަ ގެއްލުމަކާ ކުރިމަތިލާން ޖެހިދާނެކަމުގައި ބުނެ ސާރާއަށް ، ފަރީދާ އިންޒާރު ކުރިއެވެ. އެއިން އެއްވެސް ކަމެއް ސާރާގެ ފަރާތުން އެއްވެސް މީހަކަށް އެނގުނަނުދޭނެކަމަށް ސާރާ ވަޢުދު ވިއެވެ. އަޝްހަރަށް ހުރީ ވަރަށްބޮޑަށް އެކަމުގެ އަސަރު ކޮށްފައެވެ. ހިތަށް އުނދަގޫ ވެފައެވެ. ސާރާ އާއި ސާރާގެ ރަޙުމަތްތެރިކަމުގެ ބޭނުން މިވަގުތު ، އަޝްހަރަށް  ވަރަށް މުހިންމު ވާނެއެވެ. އެކަމަށް ވިސްނައިގެން އަޝްހަރު އެކަނިވިޔަ ނުދޭށެވެ ! ފަރީދާ ބުންޏެވެ. އެކަމުގައިވެސް ސާރާއަށް ކުރެވުނު ކޮންމެކަމެއް ކުރާނެކަމަށް ސާރާ ވަޢުދުވިއެވެ. އަދި އެކަމާ ފަރީދާ ދައްތަ ނުވިސްނުމަށާއި އެކަން އޭނާގެ އަތްމައްޗަށް ދޫކޮށްލުމަށް ސާރާ އެދުނެވެ.

ޚައިރާދު އެނދުމަތީ އިށީނދެލައިގެން އިންއިރު ، އޭނާއާ ދިމާއަށް ފަރީދާ ގޮވަމުންދިޔަ ހުތުރު އެއްޗެހި ، އޭނާގެ ކަންފަތް ދޮށުގައި ގުގުމަމުން ދިޔައެވެ. ޚައިރާދަށް ހާސްވެގެން ގޮސް ކޮޅަށް ތެދުވެވުނެވެ. ކުޑަދޮރު ކައިރިޔަށްގޮސް ހަމަޔަށް ނޭވާލެވޭތޯ ބަލަމުން ގެންދިޔައެވެ. އޭރުވެސް ، އޭނާގެ އަނގައިން ވޭނީ ގިސްލުމުގެ އަޑު ނުކުންނަމުންދިޔައެވެ. އެއަޑު ނުކުމެގެން އެއަންނަނީ މޭގައި ތާށިވެހުރެ ، އޭނާގެ މެޔަށް އެތައް ޒަޚަމެއް ދިނުމަށްފަހުއެވެ.

އެވަގުތު އެތަނަށް ޚާލާ އައެވެ. އަދި ކިހިނެއްވީތޯ ސުއާލުކުރިއެވެ. ޚައިރާދު ކަރާޗީއަށް ދާން ނިންމައިފިކަމުގައި ޚާލާގާތު ބުންޏެވެ. އެހެންނޫނީ ، އަޝްހަރުގެ މަންމަޔަށް އޭނާގެ މުރާދު ކާމިޔާބުވެދާނެކަމަށް ޚާއިރާދު ބުންޏެވެ. އަދި އަޝްހަރުގެ އޮފީހުގެ ބޭރުގައި އަޝްހަރާ ދިމާވަންދެން މަޑުކުރާނެކަމަށާއި ، ހުރިހާކަމެއް ތެދަށް ، ޙަޤީޤަތަށް އަޝްހަރަށް ކިޔައިދޭނެކަމުގައި ޚައިރާދު ބުންޏެވެ. ޚާލާ ދައްތަ ބަލަން ހުންނާށެވެ ! އަޝްހަރު ، ހުރިހާކަމެއް ރަނގަޅުކޮށްދޭނެއެވެ. އޭނާއަށް އެއަނިޔާތައްދިން އެންމެންގެ ކިބައިން އަޝްހަރު ބަދަލު ހިފާނެއެވެ.

ޚައިރާދު ޑޮކްޓަރަށް ދައްކަން ޚަލާއާއެކު ދިޔައެވެ. ބަނޑުގައިއޮތް ދަރިފުޅު ރަނގަޅުކަމަށް ޑޮކްޓަރު ބުންޏެވެ. އެހެންނަމަވެސް ޚައިރާދުގެ ޙާލަތު ރަނގަޅު ނޫންކަމަށާއި ، އެއްގޮތަކަށްވެސް ތެދުވެ ނޫޅުމަށް ލަފާދިނެވެ. އަދި ، ޚައިރާދުގެ ޢަމަލުތައް ހުންނަ ގޮތުން އޭނާގެ ދަރިފުޅަށް ގެއްލުމެއް ލިބިދާނެކަމަށް ބުންޏެވެ.

ބޭސްސިޓީ ދިނުމުން ބޭސްނެގުމަށްޓަކައި ޚާލާ ނުކުތެވެ.

މެންދުރުކާން ހަދާފައި ކާން އައުމަށް ޚާއިރާދުގާތު ޚާލާ ބުންޏެވެ. އެހެންނަމަވެސް ، ޚައިރާދު ކާހިތްނުވާ ކަމަށާއި އެއްވެސް އެއްޗެއް އޭނާއަށް ކާން ނުދިނުމަށް ޚައިރާދު އެދުނެވެ. ޚައިރާދަށް ނަގަންޖެހޭ ބޭސް އެއްކޮށް ނެގޭވަރަށް ޚާލާއަތުގައި ލާރިނެތުމާއެކު ބޭސްވެސް އޮތީ ނުނެގިއެވެ. ނުކައި ނުބޮއި ހުންނަން ވެއްޖިއްޔާ ދަރިފުޅަށް ގެއްލުމެއް ލިބިދާނެކަމަށް ޑޮކްޓަރު ބުނެފައި އޮތްވާހަކަ ޚައިރާދަށް ހަނދާން ކޮށްދީ ، ޚައިރާދަށް ކާ އެއްޗެއް ދެވޭތޯ ޚާލާ ވަރަށް މަސައްކަތް ކުރިއެވެ. ހެނދުނުވެސް ޚައިރާދު އެހުރީ އެއްވެސް އެއްޗެއް އަނގަޔަށް ނުލައެވެ. ޚާލާ ވަރަށް މަސައްކަތުން ދެތުންސުވާބަތް ޚާލާއަށް ކާންދިނެވެ. އޭގެ އިތުރަކަށް ޚާއިރާދުގެ އަރުތެރެޔަށް އެއްޗެއްދާގޮތެއް ނުވިއެވެ.

ޚައިރާދުގެ ބޭސް ނަގައިނުދެވުނީތީ ، ޚައިރާދުގެ ކިބައިން ޚާލާ މަޢާފަށް އެދުނެވެ.

ސާރާ އޮފީހަށްގޮސް އޭނާގެ ކެބިންއަށް ވަންނަނިކޮށް އޮފީހުގެ މުއައްޒަފަކާ ދިމާވިއެވެ. އޭނާ ދިޔައީ އަޝްހަރުގެ ކެބިންއާ ދިމާއަށެވެ. އޭނާ އެދަނީ ، އަޝްހަރާ ކޮންވާހަކައެއް ދައްކަންތޯ ސާރާ ސުއާލުކުރިއެވެ. އޭނާ އެދަނީ އަޝްހަރު އިނގިރޭސިވިލާތަށް ފުރާތީ ، ނިންމަންހުރި މަސައްކަތްތައް ކިޔައިދޭންކަމުގައި ބުންޏެވެ. އަދި އެދަތުރުގައި ރަށުންބޭރުގައި އަޝްހަރު ، ދެތިންމަހެއް ވެދާނެކަމަށްވެސް އޭނާ ބުންޏެވެ. އަދި އެކަން ސާރާއަށް ނޭނގުނީތީ އެނާ ހުރީ އަޖައިބުވެފައެވެ. ސާރާ ބުނިގޮތުގައި ، އަޝްހަރު އޮންނާނީ އޭނާގާތު އެވާހަކަ ބުނެފައެވެ. އެހާބޮޑަށް އެކަން އޭނާގެ ހަނދާނުގައި ނެތީއެވެ. އޭނާގެ ވާހަކަތަކުން ސާރާގެ މޫނުމައްޗަށް ފެތުރިގެންދިޔަ ރުޅިވެރިކަން ، އެމުވައްޒަފަށްވެސް ފެނުނެވެ. އަދި އޭނާ އަޝްހަރުގެ ކެބިނުން ނުކުންނަންދެން ބޭރުގައި މަޑުކުރާށޭ ބުނެ އަވަސް ހިނގުމެއްގައި ގޮސް އަޝްހަރުގެ ކެބިނަށް ވަދެ ، އަޝްހަރުގެ ކުރިމަތީގައި ހުއްޓުނެވެ. އަދި ބާރަށް ބުންޏެވެ. އަހަރެމެންގެ ރަޙުމަތްތެރިކަމުގައި އެހެން ޙައްޤުތައްވެސް އުނިކުރިގޮތަށް ، އަޝްހަރު އިނގިރޭސި ވިލާތަށް ދާވަހަކަވެސް އަހަރެން ގާތަކު ނުބުނަމުއެވެ. އޭނާއަށް އެވާހަކަވެސް އެއިވުނީ ތިންވަނަ މީހެއްގެ ފަރާތުންކަމަށް ބުނެ އަޝްހަރާ ދިމާއަށް ލޯއަޅައިގަތެވެ.

އަޝްހަރު އަނގައިންވެސް ނުބުނެ ، ސާރާގެ ވާހަކައަށް މާބޮޑު ސަމާލުކަމެއްނުދީ އޭނާ ކުރަމުން ގެންދިޔަ މަސައްކަތް ކުރިޔަށް ގެންދިޔައެވެ. އަޝްހަރު ރުޅިވެރިކަމާއެކު ، އިސް އުފުލައިލިއެވެ.

އެވާހަކަ ސާރާގާތު ބުނަން ހަނދާންނެތުން އެއީ އެހާބޮޑުކަމަކަށް ހަދަނީ ކީއްވެތޯ އަޝްހަރު ސުއާލު ކުރިއެވެ. ސާރާއަކީ އޭނާގެ ރަޙުމަތްތެރިޔާކަން އަޝްހަރަށް އޭނާ ހަނދާން ކޮށްދިނެވެ. އަޝްހަރަށް އެވަނީ ކީއްތޯ އާއި އޭނާއާ އެހާދުރަށް އަޝްހަރު އެދަނީ ކީއްވެތޯ ސާރާ ސުއާލުކުރިއެވެ.

" ސާރާއެވެ ! އަހަރެން މިދުނިޔެއިން ނުކުމެގެންދަނީކީ ނޫނެވެ. އަހަރެން މިދަނީ އިނގިރޭސި ވިލާތަށެވެ. ތިހާ ޖަޒުބާތީ ތިވަނީ ކީއްވެހެއްޔެވެ ؟ " އަޝްހަރު ސާރާއާ ދިމާއަށް ހަޅޭއްލަވައިގަތެވެ.

އަޝްހަރާ ދިމާއަށް ބަލަހައްޓައިގެން އިރުކޮޅަކު ހުރުމަށްފަހު ، ސާރާ އެތަނުން ނުކުތެވެ. އަޝްހަރާ ބައްދަލުކުރަން ބޭރުގައި މަޑުކޮށްލައިގެން ހުރި މީހާ ، އެއަޑު އަހަން ބޭރުގައިހުއްޓެވެ. އަދި ރަކިގޮތަކަށް ސާރާއާ ދިމާއަށް ބަލައިލިއެވެ.

އަޝްހަރު އެއަރޕޯޓަށްދާން ނުކުތްއިރު ، ފަރީދާ އަޝްހަރުގެ ބުރަކަށީގައި ފިރުމަމުން އައެވެ. އަދި ، ކަންބޮޑުވެފައިހުރިކަން އޭނާގެ މޫނުމަތިން ދައްކަމުން ދިޔައެވެ. ދެމައިންކުރެ އެކަކުވެސް އެއްވެސް ވާހަކައެއް ނުދައްކައެވެ. އަޝްހަރު އޭނާގެ މަންމަގެ ގައިގާ ބައްދައިލިއެވެ. އަދި މަޑުމަޑުން ހިނގާލާފައި އައިސް ކާރަށް އެރިއެވެ.

ޚައިރާދު ނިދަން އޮއްވައި ، ބަނދަށް ތަދުވާތީ މެންދަމު ހޭލެވުނެވެ. ޚާލާއަށް އުނދަގޫކުރާކަށް އޭނާ ބޭނުމެއް ނުވިއެވެ. މުޅިމީހާ ދާހިއްލާ ފޯވިއެވެ. އެންމެފަހުން ކެތްނުވެގެން އޭނާއަށް ޚާލާއަށް ގޮވައިލެވުނެވެ. ޚާލާ ތެދުވެގެން ގޮސް އޭނާގެ ކުދިންނަށް ގޮވައިގެން ގެނެސް އެކުދިންގެ އެހީތެރިކަމުގައި ޚައިރާދު ކްލިނިކަކަށް ގެންދިޔައެވެ. އޭރުވެސް ޚައިރާދުގެ ބަނޑަށް ކެތްނުވާވަރަށް ތަދުވެއެވެ.

ނަރުހަކަށް ގޮވައިލުމުން އައިސް އެވަގުތު ޑޮކްޓަރެއް އެތާނގައި ނެތްކަމަށާއި ، ޚައިރާދު އޮޕަރޭޝަންކުރަންޖެހޭކަމަށް ، ނަރުސްކުއްޖާ ބުންޏެވެ. އެވަގުތު ، ޚައިރާދު އޭނާގެ ފޯނުގެނެސްދިނުމަށް އެދުނެވެ. ޚާލާ ކަންބޮޑުވެފައިހުރެ ، ޚައިރާދުގެ ފޯނު ގެނެސްދިނެވެ. ޚައިރާދު ، އަޝްހަރުގެ އޮފީހަށް ފޯނުކުރިއެވެ. ފޯނު ނެގިކުއްޖާ އަޝްހަރު އޮފީހުގައި ނެތްކަމަށް ބުނަމުންދިޔައިރު ، އަޝްހަރު އެތާހުރެ ވާހަކަދައްކަމުން ދިޔައަޑު ، ޚައިރާދަށް އިވުނެވެ. އަޝްހަރާ އޭނާ ވާހަކަ ދައްކަން ޖެހޭކަމަށާއި ، އަޝްހަރު އަތަށް ފޯނު ދިނުމަށް ރޮމުން ރޮމުން ޚައިރާދު ގޮވަމުން ދިޔައެވެ. އޭނާގެ ބަނޑަށް ވަމުންދާ ތަދާއެކުގައެވެ.

ރިސެޕްޝަންގައި އިންކުއްޖާއަށް ވެފައިއިން ގޮތުން އެއީ ޚައިރާދުގެ ފޯނެއްކަން އަޝްހަރަށް އެނގުނެވެ. ފޯނުގެ އަތތްގަނޑުގައި ހިފައި  ކުޑަކޮށް މަޑުކޮށްލީމަ ، އެކުއްޖާ އަށް އެތަނުން ދުރަށް ދާންވީކަން އެނގުނެވެ.

" ދެވަނަ ފަހަރަށް މިއޮފީހަށް ފޯނު ނުކުރައްޗެވެ. ތިޔައީ އަހަރެންނަށްޓަކައި މަރުވެފައިވާ އިންސާނެކެވެ. ޚައިރާދުގެ މޫނު ދެކޭކަށްވެސް އަދި އަޑު އިވޭކަށްވެސް އަހަރެން ބޭނުމެއްނޫނެވެ. " އަޝްހަރު އޭނާއަށް ފެންނަ އެއްޗެއް ބުނެ ، ފޯނު ކަނޑައިލިއެވެ.

ޚައިރާދުގެ ބަނޑަށް އެރި ރިހުމާއެކު ، ބާރަށް ހަޅޭއްލަވައި ގަނެވުނެވެ. އޭނާއަށް އެ އިނދެވުނީ ކޮންތާކު ކަމެއްވެސް ނޭނގުނެވެ.

(ނުނިމޭ)