(8 އޭޕްރީލް 2023 ގައި ޝާއިއުކުރި ބަޔާ ގުޅޭ)
" ސާރާއަށް އެނގޭ ހެއްޔެވެ ؟ އަހަރެން މިގެޔަށް މިއަންނަނީ ހަމައެކަނި ސާރާއާ ބައްދަލުކޮށްލުމަށެވެ. ސާރާއަށް އަހަރެން ކަމުދާނެކަމަށް ބަލާފައެވެ. " ކައިސަރު ބުންޏެވެ.
ކައިސަރުގެ ވާހަކަތަކުން ، އޭނާއަށް ފޫހިކަން އިޙްސާސްވާކަމުގައި ސާރާ ބުންޏެވެ. ސާރާއިނީ ފޫހިގޮތަކަށް ، ދެލޯ ބޮޑުކޮށްލައިގެން ކައިސަރާދިމާއަށް ބަލަހައްޓައިގެންނެވެ. ސާރާގެ ވާހަކައިން ކައިސަރު ދެރަވިއެވެ. ސާރާގެ މަޤްޞަދަކީވެސް އެއީއެވެ. ސާރާގެ ސަމާލުކަން ނުލިބިގެން ކައިސަރު އެގެޔަށް ނާންނާނެގޮތެއް ވުމެވެ. ކައިސަރު ސާރާއަށް ގޮވައިލިއެވެ. އަދި އެއްވެސް ވަރަކަށް އޭނާ ކަމުނުދަނީތޯ ސާރާއާ ސުއާލުކުރިއެވެ. ސާރާ އެއްވެސް ޖަވާބެއްނުދީ ހިމޭނުން އިނެވެ. އަނެއްކާވެސް ވާހަކަ ދެއްކީ ކައިސަރެވެ. އޭނާ ސާރާއަށް ކަމުދާނީ ކިހިނެއް ހަދައިގެންތޯ ކައިސަރު ސުއާލުކުރިއެވެ. ސާރާގެ ޖަވާބު ވަރަށް ސާފުވެފާ ސާދާއެވެ. ދުވަހަކުވެސް ، ކައިސަރަކީ އޭނާއަށް ކަމުދާމީހަކަށް ނުވާނެކަމުގައި ޖެހިލުމެއްނެތި ސާރާ ބުންޏެވެ. އެހެންނަމަވެސް އެވަރަކުން ކައިސަރު ދުލެއް ނުކުރިއެވެ. ސާރާއަށް ކަމުދާ ގޮތްތަކެއް އެނގެނިކޮށް ، އެގޮތަކަށް އޭނާ އުޅޭނެކަމަށް ކައިސަރު ބުންޏެވެ. ސާރާއަށްޓަކައި ، އޭނާހުރީ ބަދަލުވާން ތައްޔާރަށެވެ. ހަމައެކަނި ބޭނުންވަނީ ، ސާރާއަށް ކަމުދާނެ ގޮތްތަކެއް ސާރާގެ ދުލުން އޭނާގާތު ބުނެލުމެވެ.
އަޝްހަރުފަދަ ، ސާރާބޭނުންވާކަހަލަ މީހަކަށް އޭނާ ބަދަލުވާނެކަމަށް އަޝްހަރު ވަރަށް އަސަރާއެކު ސާރާގާތު ބުންޏެވެ. ސާރާއަށް އަޝްހަރު ކަމުދާކަން ކައިސަރަށް އެނގެއެވެ. އެކަން ކޮންމެވެސް ވަރަކަށް ކައިސަރަށް އޮތީ އެނގިފައެވެ. ޚައިރާދާއި އަޝްހަރުގެ ކައިވެންޏަށް ސާރާ އެހާ ހިތްހަމަނުޖެހޭކަންވެސް ކައިސަރަށް އެނގެއެވެ. އޭނާ އެމެރިކާއަށްގޮސް ކިޔަވައިގެން ، އަޝްހަރުފަދަ ކާމިޔާބު ފިރިހެނަކަށް ވާނެއެވެ. އެކަމުގައި ހަމައެކަނި ބޭނުންވަނީ ސާރާގެ ރުހުމެވެ. ސާރާ އޭނާއަށް ކަމުދާނެކަން އެނގުމެވެ. އެންމެ ފަހަރަކުވެސް ، އޭނާގެ ލޯބި ޤަބޫލުކުރުމަށް ސާރާގެ ކިބައިން ކައިސަރު އެދެއެވެ. ކައިސަރުގެ މުޅި ޢުމުރުގައިވެސް އެއްވެސް ކުއްޖަކުދެކެ އެހާލޯތްބެއް ނުވެއެވެ. ކައިސަރުގެ ލޮލުން ކަރުނަ ފާއްދާލިއެވެ. އެ ކަރުނަތައް ޖަމާވަމުންގޮސް ހިފެހެއްޓޭގޮތެއް ނުވިއެވެ. ކައިސަރު ވާހަކަ ދައްކަމުން ގެންދިޔައީ ރޮމުން ރޮމުންނެވެ.
" ކައިސަރުގެ ތިވާހަކަތަކުން އަހަރެންގާތަށް ރުޅިވެސް އާދެއެވެ. ހިނިވެސް އާދެއެވެ. " ދަތްކުނޑި ވިކައިގެން އިނދެ ، ސާރާ ބުންޏެވެ.
ސާރާ ލޯބިން ތިދެކޭ އިންސާނާ ، އެންމެ ފަހަރަކުވެސް ލޯބިން ސާރާއާ ދިމާއަށް ބަލައެއް ނުލާނެއެވެ. އޭނާގެ ލޯބިވާ ، ލޯބި އަނތްބެއް އެބައިނެވެ. ސާރާގެ ހިތުގައި އަޝްހަރުގެ މައްޗަށް ތިއޮތް ލޯބިއެއީ އެއްފަރާތުން އޮތް އެއްޗެކެވެ. އެލޯބި އޮތީ ހަމައެކަނި ސާރާގެ ހިތުގައެވެ. އަޝްހަރުގެ ހިތުގައި ސާރާގެ މައްޗަކަށް އެއްވެސް ލޯތްބެއް ނެތެވެ. ތި ލޯބީގައި ސާރާއަށް ޙާޞިލްކުރެވޭނެ އެއްވެސް ފޮނިކަމެއް ނެތެވެ. " ކައިސަރު ރޮމުން ، އެހެނަސް ރުޅިވެރިކަމާއެކު ސާރާއާ ދިމާއަށް ބުންޏެވެ.
ކައިސަރުގެ ވާހަކަތަކުން ، ސާރާގެ ރުޅި ކޮންޓްރޯލުން ނެއްޓިއެވެ. ރުޅިއައިސް ރަތްވެފާ ، ކައިސަރާ ދިމާއަށް ލޯ އަޅައިގަތެވެ. ކޮޅަށް ތެދުވެ ، އަޝްހަރުގެ ނަން ދެވަނަފަހަރަށް ، ކައިސަރުގެ ދުލުން ބޭރުނުކުރުމަށް ކައިސަރަށް އިންޒާރު ކުރިއެވެ. އަޝްހަރާއި އޭނާއާ ދެމެދު އޮތް ގުޅުމަކީ ، ކައިސަރާ ބެހޭކަމެއްނޫނެވެ. އެއީ ސާރާއާ ބެހޭކަމެއްކަމުގައި ބުނެ ކައިސަރާ ދިމާއަށް ހަޅޭއްލަވައިގަތެވެ. ކައިސަރުގާތު އޭނާ ދެމިނިޓެއްހާއިރު މަޑުކޮށްލީމަ ، ކައިސަރަށް އޭނާ އޮޅިފައި އިންކަމުގައި ސާރާ ބުންޏެވެ. ހައްދުން ބޭރުނުވުމަށް ، އިނގިލި ދިއްކޮށްގެންހުރެ ސާރާ ، ކައިސަރަށް އިންޒާރު ކުރިއެވެ. ކައިސަރަށް ދުވަހަކުވެސް ، އަޝްހަރާ އެއްވަރަށް ނާދެވޭނެކަމުގައި ބުނެ ، ކައިސަރާ ދިމާއަށް ހަޅޭއްލަވައިގަތުމަށްފަހު ، ސާރާ ގެއިން ނުކުމެގެން ދިޔައެވެ.
ކައިސަރުގެ ލޮލުން އޮހެމުންދިޔަ ކަރުނަތައް ފުހެލިއެވެ. އަދި އޭނާގެ އަމިއްލަ ނަފުސަށް ބުނެލިއެވެ. އެންމެ ފަހަރަކު ނަމަވެސް އޭނާގެ ލޮލަށް ބަލައިލައިފިނަމަ ، ސާރާއަށްޓަކައި އޭނާގެ ލޮލުގައިވާ ލޯބި ފެންނާނެއެވެ. ސަރާދެކެ އޭނާވާ ލޯތްބަކީ ، ލޯބީގެ އިންތިހާކަމުގައި އިޙްސާސްވާނެއެވެ. އެކަމަކު ، ސާރާއެވަނީ އެހެންމީހަކަށްޓަކައި އޭނާގެ ފުރާނަ ޤުރުބާންކޮށްފައެވެ. ސާރާގެ އެފިކުރު ބަދަލުކުރެވޭނެ އެއްވެސްގޮތެއް ކައިސަރަކަށް ފެންނާކަށް ނެތެވެ.
އަޝްހަރު އޭނާގެ ހެދުންތަކާއި ދަތުރަށް ބޭނުންވާ ތަކެތި ފޮށްޓަށް އަޅައި ޕެކްކުރަމުން ދަނިކޮށް ޚައިރާދަށް އެތަނަށް އާދެވެއެވެ. އަދި ، އޭނާ ޕެކްކޮށްލަން ދިނުމަށް އެދުނެވެ. އަޝްހަރު ، ޚައިރާދާ ދިމާއަށް ބަލައިލިއެވެ. އޭނާ އަމިއްލަޔަށް ޕެކް ކޮށްލަފާނަމޭ ބުނެ ޚައިރާދަށް ޖަވާބު ދިނެވެ.
ޚައިރާދު ވަކިއެއްޗެކޭ ނުބުނެ ކޮޅަށް ހުއްޓެވެ. ހޮޑުލަވައިގަތީމަ ފާޚާނާއާ ދިމާއަށް ބާރަށް ދިޔައެވެ. ކުޑައިރުކޮޅަކުން ، ޚައިރާދު މޫނު ފުހެމުން ، ފާޚާނާއިން ނުކުމެ ހިނގައިގަތްތަނާ އަރިއަޅައިލިއެވެ. އެތަން ފެނުމާއެކު ، އަޝްހަރު ޚައިރާދުގެ ގާތަށް ޖެހިލައި އޭނާ ހިފަހައްޓައިލިއެވެ. އަދި ، ޚައިރާދުގެ ޠަބީޢަތް ރަނގަޅުތޯ އަޝްހަރު ސުއާލުކުރިއެވެ. ބަލިވީތޯ އެހިއެވެ. އަދި އޭނާއަށް ފެންފޮދެއް ގެނެސްދެންތޯ ސުއާލު ކުރިއެވެ. ޚައިރާދު ނޫނެކޭ ބުނެ އޭނާ ރަނގަޅުކަމަށް ބުންޏެވެ.
އަޝްހަރު އިރުކޮޅަކު ޚައިރާދާ ދިމާއަށް ބަލަހައްޓައިގެން ހުރެފައި ނިދަން އޮށޯތެވެ. އެނދުގައި ޚައިރާދު އޮށޯންނަ ފަރާތުގައި އިށީނދެލައިގެން އިނެވެ. އޭނާގެ މޫނުމަތީގައިވަނީ ހިތާމައާއި ހިތްދަތިކަމެވެ. މި ދެދުވަހެއްގެ ތެރޭގައި އޭނާގެ މޫނުމަތިވަނީ މިލާފައެވެ. ކުރިން ހުރި ތާޒާކަންވަނީ ގެއްލިފައެވެ. އަނެއްފަރާތަށް އެނބުރިއޮތް އަޝްހަރާދިމާއަށް އޭނާ ބަލައިލިއެވެ. ލޮލުން ފައިބަމުންދިޔަ ކަރުނަތައް ފުހެލާނެ މީހަކު މިއަދަކު ނެތެވެ. ބެޑްޝީޓްމައްޗަށް އެޅެމުންދިޔަ ކަރުނަތައް އިރުކޮޅަކުން ހުއްޓުނެވެ. އޭނާގެ ލޮލުން ފެން ހުސްވިފަދައެވެ. މަޑުމަޑުން ބާލީހުގައި ބޯއަޅައިލިއެވެ. އަޝްހަރު އޮށޯވެ އޮތަސް އޮތީ ނިދާފައެއް ނޫނެވެ.
ހެނދުނު ތެދުވެ ، ޚައިރާދު ކޮޓަރިން ނުކުމެ ސިޓިންގރޫމުގައި އެކަނި އިށީނދެލައިގެން އިނެވެ. އޭނާގެ މޫނުމަތީގައިވަނީ ފުން ހިތާމައެވެ. އޭނާގެ ޙަޔާތަށް އެއައި ތޫފާން ނިމި ، ހިތަށް ހަމަޖެހުމެއް ލިބޭނީ ކޮންގޮތަކަށްކަން އޭނާއަކަށް ނުވިސްނެއެވެ. އަޝްހަރު އައިސް ޚައިރާދުގެ ކުރިމަތީގައި ހުއްޓިލިއެވެ. އޭނާ ހަފުތާއަކަށް އިސްލާމްއާބާދަށް ދަނީކަމުގައި ބުންޏެވެ. އަދި ޚައިރާދު ، ޑޮކްޓަރަށް ދައްކާލަން ބުންޏެވެ. އަޝްހަރުގެ ވާހަކަ ނިމުމާއެކު ، އޭނާދެކެ ރުޅިއައިސްފައިހުރެ ، އަޝްހަރު ރަށުންބޭރަށްދާނީ ކިހިނެއްތޯ ސުއާލު ކުރިއެވެ. އަޝްހަރު އޭނާދެކެ ލޯބިވާއިރު ، އެދެމީހުންގެ މެދުގައި ނުތަނަވަސްކަމެއް އުފެދެންވީ ކީއްވެތޯ ޚައިރާދު ސުއާލުކުރިއެވެ. އަދި އޭނާގެ ކުށަކީ ކޮބައިތޯވެސް އަޝްހަރުކުރެން ސުއާލުކުރިއެވެ. އަޝްހަރު އޭނާގެކެ ރުޅިއައިސްހުރީ ކީއްވެގެންކަން އެނގިލުމުގެ ޙައްޤުވެސް އޭނާއަށް ލިބިގެން ނުވޭތޯ ޚައިރާދު ސުއާލުކުރިއެވެ. ޚައިރާދުގެ އެއްވެސް ސުއާލަކަށް ޖަވާބު ނުދީ ، ޚައިރާދާ ދިމާއަށް ބަލަހައްޓައިގެން އިރުކޮޅަކު ހުރުމަށްފަހު ، އަޝްހަރު އެތަނުން ނުކުމެގެން ދިޔައެވެ.
އަޝްހަރު ނުކުމެގެން ދިއުމާއެކު ، ހިފެހެއްޓުމެއްނެތި ޚައިރާދަށް ރޮއެ ގަނެވުނެވެ. މޫނުގައި ދެއަތް އަޅައި ކަރުނަތައް ހިފެހެއްޓުމަށް މަސައްކަތް ކުރިއެވެ. އެހެންނަމަވެސް އެކަމެއް އޭނާއަކަށް ނުވިއެވެ. އެހުރިހާކަމެއް އެގޭތެރޭގައިވާއިރުވެސް ، އޭނާއާ ވާހަކަދައްކާލައި ، ހިތަށް ތަސައްލީއެއް ދޭނެ އެއްވެސް މީހަކު އެގެޔަކު ނެތެވެ. އޭނާގެ ޙަޔާތަށް ނޭނގިހުއްޓާ އެއައީ ކޮންފަދަ ބޮޑު ތޫފާނެއް ހެއްޔެވެ ؟ އެތޫފާނުގެ ގެއްލުން އެލިބެނީ އޭނާއަށް އެކަންޏެވެ. ވެގެންއުޅޭގޮތެއް ނޭނގޭތާގައި ، އޭނާކުރަންވީ ކީއްކަމެއްވެސް ޚައިރާދަކަށް ނޭނގެއެވެ.
އަޝްހަރު ކޮޓަރިން ނުކުންނަން ތައްޔާރުވެލިތަނާ ފަރީދާ އެތަނަށް އައެވެ. އަދި ޚައިރާދު ކޮބައިތޯ ސުއާލުކުރިއެވެ. ޚައިރާދު އޮތީ ރޭ ނުނިދާ ހޭލާ ކިޔަވަން އިނުމަށްފަހު ، ނިދާފައިކަމުގައި އަޝްހަރު ބުންޏެވެ. އަދި ، ޚައިރާދުގެ ޙާލު ރަނގަޅުހެން ހީނުވާކަމަށާއި ޑޮކްޓަރަކަށް ދައްކަން ޖެހޭކަމުގައި އަޝްހަރު ބުންޏެވެ. ފަރީދާއަށް ، ޚައިރާދުގެ ޙާލަތާމެދު ކަންބޮޑުވާކަމުގައި ބުންޏެވެ. ރަނގަޅަށް އެއްޗެއް ނުކާތާނގައި އަރާމެއްވެސް ނުކުރެއެވެ. ކާންދޭން އުޅުނަސް ކަނީކީ ނޫނެވެ.
ޚައިރާދު ، ރަނގަޅު ޑޮކްޓަރަކަށް ދައްކާލާން މަންމަގާތު އަޝްހަރު ބުންޏެވެ. އަޝްހަރު ބުނެގެން އެކަމާ ޚައިރާދު އެއްބަސްނުވިކަމުގައިވެސް އަޝްހަރު ބުންޏެވެ. އަދި މަންމަ ބުނެގެން ހިނގައިދާނެކަމަށްބުނެ ، ރަނގަޅު ޑޮކްޓަރަކަށް ދައްކައިދިނުމަށް އަޝްހަރު އެދުނެވެ. ހެނދުނު ނާސްތާ ކޮށްގެން ، ޚައިރާދު ގޮވައިގެން ޑޮކްޓަރަކަށް ދައްކަން ދާނެކަމަށް ބުނެ ، އެކަމާ އަޝްހަރު ކަންބޮޑުނުވުމަށް ފަރީދާ އެދުނެވެ.
ތައްޔާރުވެލައިގެން ކާގެޔަށް ޚައިރާދު އައިއިރު ފަރީދާ މޭޒުދޮށުގައި އިނެވެ. ޚައިރާދު އައިސް ، މަންމަޔަށް ސަލާމް ކޮށްލިއެވެ. އަޝްހަރު ދަމުން ، ޚައިރާދު ޑޮކްޓަރަކަށް ދައްކާލުމަށް ބުނިވާހަކަ ފަރީދާ ބުންޏެވެ. ރަނގަޅު އަންހެނުންގެ ޑޮކްޓަރަކަށް ދައްކާލުމަށް ޚައިރާދާއެކު ފަރީދާ ގޮސްދިނުމަށް ޚައިރާދުވެސް އެދުނެވެ. އަޝްހަރު ދަމުންވެސް އެވާހަކަ ބުނީމަ ، ފަރީދާ ކުޑަކޮށް ވިސްނައިލިއެވެ. އަދި އޭގެ މާނަޔަކީ ، އޭނާ މާމަޔަކަށްވަނީހެއްޔޭ އަހައި ޚައިރާދާ ސުއާލުކުރިއެވެ. ޚައިރާދު އެސުއާލަށް ޖަވާބެއް ނުދެއެވެ. ލަދުވެތި ހިނިތުންވުމެއް ، ޚައިރާދުގެ މޫނުމަތިން ފާޅުވިއެވެ. އެވާހަކަ ، އަޝްހަރުގާތުވެސް ޚައިރާދު އަދި ނުބުނެއެވެ. އަޝްހަރު ހީކޮށްގެން އެހުރީ ، ޚައިރާދު ބަލިވެ އުޅެނީ އިމްތިޙާނަށް ތައްޔާރުވާން ނުނިދާ ކިޔަވަން އުޅެން ހަދައިގެން ކަމަށެވެ.
ޚައިރާދު ގޮވައިގެން ފަރީދާ ގައިނިކޮލޮޖިސްޓަކަށް ދައްކަން ދިޔައެވެ. ޚައިރާދު ބެލުމަށްފަހު ، ފަރީދާއާ މުޚާތަބުކޮށް ، އޭނާ މާމައަކަށްވަނީ ކަމަށްބުނެ ފަރީދާއަށް ، ޑޮކްޓަރ މަރުޙަބާ ކިއެވެ. ފަރީދާގެ މޫނުމަތިންވެސް އުފާވެރިކަން ފާޅުވިއެވެ. އަދި ޚައިރާދު އޭނާގެ ޞިއްޙަތަށް ނުބަލާކަމަށާއި އެއްގޮތަކަށްވެސް ނުކައި އުޅޭކަމަށް ޑޮކްޓަރގާތު ފަރީދާ ބުންޏެވެ. ޚައިރާދު ކަންތައް ކުރަންވާގޮތް ޑޮކްޓަރ ކިޔައިދިނެވެ. އަދި އުފަލުގައިހުރެ ހިތްހަމަޖެހުން ޚައިރާދަށް މުހިންމުކަމުގައި ޑޮކްޓަރ ބުންޏެވެ.
ގެޔަށް އައި މަގުމަތީގައި ، އަޝްހަރުގާތު ފޯނުކޮށްފައި އެ އުފާވެރި ޚަބަރު ދީފިންތޯ ފަރީދާ ސުއާލުކުރިއެވެ. އެހެންނަމަވެސް ފޯނުކޮށްފައި އެވާހަކަ އަޝްހަރުގާތު ބުނާކަށް ޚައިރާދު ބޭނުމެއްނޫނެވެ. އެވާހަކަ އަޝްހަރުގާތު އޭނާ ބުނާނީ އަޝްހަރު ދަތުރު ނިންމާފަ އައުމުންކަމުގައި ޚައިރާދު ބުންޏެވެ. އަދި ، އަޝްހަރުގާތު އެވާހަކަ ނުބުނުމަށް ފަރީދާގެ ކިބައިން ޚައިރާދު އެދުނެވެ. ފަރީދާވެސް ، އަޝްހަރުގާތު އެވާހަކަ ނުބުނާނެކަމަށް ވަޢުދުވިއެވެ. ފަރީދާ ބުނިގޮތުގައި ، އެފަދަ އުފާވެރި ޚަބަރެއް ފިރިމީހާއަށް ދޭންވާނީ އަންހެނުންނެވެ. އޭރަށް ފިރިހެނާ މާ އުފާވާނެއެވެ.
ގެޔަށް އައި މަގުމަތީގައި ޚައިރާދަށް ލިބިފައިވާ ހަމަހިމޭންކަން ފަރީދާ ފާހަގަ ކުރިއެވެ. ޚައިރާދު ބޭނުންވަނީ ، އެއުފާވެރި ޚަބަރު އަޝްހަރުގެ ކުރިމަތީ އިނދެ ހާމަކުރުމަށެވެ. އެޚަބަރު ލިބުމުން ، އަޝްހަރަށް ވާގޮތް ދެކެން ޚައިރާދު ބޭނުންވެއެވެ.
(ނުނިމޭ)
aharemen beynunvaanee avahah kiyaalanvias eheneh nuvaane ennu hurihaa enmen keiytherivey vvvreethi
ެެެެެެެެދޮގެއްވެސް ނޫން މިއަދުގެބައި ހާދަކުރޭ
Haadha kuru kon
ހާދަ ކުރޭ