ފެބުރުއަރީ އެކެއްގައި ސްޕްރީމްކޯޓުން ނެރުނު އަމުރަށްފަހު ސަރުކާރަށް އެއްވެސް ހީނަރުކަމެއް ނާންނަ ކަމަށް ފިޝަރީޒް މިނިސްޓަރ ޑރ. މުހައްމަދު ޝައިނީ މިއަދު ވިދާޅުވެއްޖެއެވެ.
ރާއްޖޭގެ ސިޔާސީ ހާލަތު ސައުދީ ސަރުކާރާ ހިއްސާ ކުރައްވަން އެގައުމަށް ފުރައިވަޑައިހެންނެވުމަށް ވެލާނާ އިންޓަނޭޝަނަލް އެއާޕޯޓަށް ވަޑައިގެން ހުންނަވައި އާފަތިހާ ވާހަކަ ދައްކަވަމުން ޝައިނީ ވިދާޅުވީ ރާއްޖޭގައި ހިނގައިދިޔަ ކަންކަމުން ސަރުކާރަށް އެއްވެސް ވަރަކަށް ހީނަރުކަމެއް އައިސްފައިނުވާ ކަމަށެވެ. "އެހެންނަމަވެސް އިންޝާ ﷲ ކުރިއަށްވުރެވީ ވަރުގަދަ،" ކަމަށް މިނިސްޓަރ ވިދާޅުވިއެވެ.
އެމަނިކުފާނު ވިދާޅުވީ ރާއްޖޭގެ ކަންކަން ހައްލު ކުރުމަށް ކުރިއެކޭ އެއްގޮތަށް އެހެން ގައުމުތަކުގެ ސަރުކާރުގެ ޚިލާއި މަދަދާއެކު މަސައްކަތް ކުރައްވާނެ ކަމަށެވެ. އެކަންކަން ސުލްހަވެރިކަމާއެކު ވަރަށް ރަނގަޅަށް ކުރިއަށްދާނެ ކަމަށް އޭނާ ވިދާޅިވިއެވެ.
ޝައިނީ ވިދާޅުވީ ރާއްޖެއަށް ބަޔަކު ގެންނަން އުޅުނު ބަޣާވާތް ނާކާމިޔާބުވެ އެކަމުގެ ތަހުގީގެއް ފުލުހުން ހިންގައި ލިބުނު ބައެއް މައުލޫމާތު މިހާރުވަނީ ރައްޔިތުންނާ ހިއްސާކޮށްފައި ކަމަށެވެ. އެހެންވީމާ އިދިކޮޅުގައި ތިބި ސިޔާސީ ބޭފުޅުން މަޝްވަރާއަށް އަންނާނެ ކަމަށް އުންމީދު ކުރައްވާ ކަމަށް މިނިސްޓަރ ވިދާޅުވިއެވެ. ސަރުކާރުންވަނީ އަނެއްކާވެސް މަޝްވަރާއަށް ގޮވައިލައްވައިފައެވެ. މިހާރުވާނީ ސިޔާސީ ކަންކަން ސުލްހަވެރިކަމާއި އަމާންކަމާއެކު ހައްލުކުރުމުގެ ފުރުސަތު އިދިކޮޅު ފަރާތްތަކަށް ދެއްވައިފައި ކަމަށްވެސް ޝައިނީ ވިދާޅުވިއެވެ. އެ ފުރުސަތުގެ ބޭނުން ހިފައި ކަންކަން ހަމަމަގަށް އެޅުވުމުގެ ފުރުސަތު މިހާރުވެސް އެބައޮތް ކަމަށް އޭނާ ވިދާޅުވުއެވެ.
ޑރ. ޝައިނީ މިއަދު ސައުދީއަށް ފުރައިވަޑައިގެންނެވީ ރާއްޖޭގެ ސިޔާސީ ހާލަތާބެހޭ މައުލޫމާތު "އެގައުމުގެ އަޚުންނާ" ހިއްސާ ކުރެއްވުމަށެވެ. ޝައިނީގެ އިތުރަށް އަވަށްޓެރި ބައެއް ގައުމުތަކަށްވެސް ރައީސްވަނީ ޚާއްސަ މަންދޫބުން ފޮނުއްވައިފައެވެ.
