(30 މާރިޗު 2023 ގައި ޝާއިއުކުރި ބަޔާ ގުޅޭ)
ނޫޙު ޢަލައިހިއްސަލާމް ، އެކަލޭގެފާނުގެ ވަޢުޡާއި ތަޤުރީރުތަކުން ، ކާއިނާތުގެ ސިއްރުތައް މީސްތަކުންނަށް އޮޅުންފިލުއްވައިދެއްވައި އެބައިމީހުންގެ ވިސްނުމާއި ފިކުރު ، ހިދާޔަތުގެ އަލިމަގަށް ސީދާކުރެއްވުމަށް މަސައްކަތް ފެށްޓެވިއެވެ. ރޭގަނޑާއި ދުވާލުގެ ، އުޑުތަކާއި ތަރިތައް އަދި ކަނޑުތަކާއި ބިންތައް ، އިރާއި ހަނދުފަދަ ، ﷲ ސުބްޙާނަހޫ ވަތަޢާލާގެ ކުޅަދުންވަންތަވެރިކަމުގެ ތެރޭގައިވާ ޢަޖައިބުތަކުގެ ސިއްރުތައް ހާމަކޮށްދެއްވަމުން ގެންދެވިއެވެ. ﷲ ގެ ކުޅަދުންވަންތަވެރިކަމުން ، އިންސާނާ އުފެއްދެވީ ، އެކަލާނގެޔަށް އަޅުކަންކުރުމަށްކަން ، އެކަލޭގެފާނު މީސްތަލުންނަށް ސާފުކޮށްދެއްވިއެވެ. ﷲ ގެ އެއްކައުވަންތަކަމުގެ ހެކިތައް ދައްކަވައި ، ﷲ ނޫން އެހެން ފަރާތަކަށް ޙައްޤުގޮތުގައި އަޅުކަން ނުކުރެވޭނެކަން ، ނޫޙުގެފާނު ، މީސްތަކުންނަށް ބަޔާންކޮށްދެއްވިއެވެ. މީސްތަކުންގެ ހިތްތަކުގައި ޖަހާލަތުގެ އަނދިރިކަން ފަތުރައި ، އެ އަނދިރިކަމުގައި ދުނިޔެއާއި އާޚިރަތް ގެއްލިގެން ގޮސްފައިވަނީ އިބިލީހުގެ ވަސްވާހުގައި އެއިންސާނާ ޖެހިގެންކަން ، ނޫޙުގެފާނު ބަޔާންކޮށްދެއްވިއެވެ. އަދި ޝައިޠާނާގެ ބަހަށް ހެއްލި ، މަގުފުރެދި ، ބުދުތަކަށް އަޅުކަންކުރަމުންގެންދާނަމަ ، ﷲ ގެ ޙަޟުރަތުން އަތުވެދާނެ ، ބިރުވެރި ކޯފާއެއްގެ ޚަބަރުން އެކަލޭގެފާނު މީސްތަކުން ހޭލުންތެރި ކުރެއްވިއެވެ. އެބައިމީހުން ، ކެތްތެރިކަން އިސްކޮށް ، މަގުއޮޅިފައިތިބެ ، ނޫޙުގެފާނުގެ ވާހަކަ އަހަމުން ގެންދިޔައެވެ.
ނޫޙުގެފާނު ، އެކަލޭގެފާނުގެ ވާޖިބުތައް އަދާކުރައްވައި މީސްތަކުންގެ އިތުބާރު ހޯއްދަވައި ، އެބައިމީހުން ތެދުމަގަށް ލަންބުވައި ، އުއްމީދެއް ގެނެސް ދެއްވިއެވެ. ހަމައެއާއެކު ، އިބިލީސް ، އޭނާގެ މަސައްކަތް ހުއްޓައެއް ނުލައެވެ. މީސްތަކުންގެ މެދުގައި ފިތުނަ ފަސާދަ އުފައްދައި އެމީހުންގެ އިޢުތިޤާދު ބަލިކަށި ކުރުމުގެ މަސައްކަތް ކުރަމުން ގެންދިޔައެވެ. އަދި ޙަމަލާއެއް ދޭން ފަހިވާނެ ފުރުޞަތަކަށް ބަލަބަލައި ޝައިޠާނާގެ ލަޝްކަރު ތިއްބެވެ.
ނޫޙުގެފާނުގެ ޤައުމުގެ މީހުން އެކަލޭގެފާނަށް ދެންނެވިއެވެ. " ތިމަންމެންނަށް ކަލޭގެފާނު ފެންނަނީ ، ހަމަ ތިމަންމެންގެ ތެރެއިންވާފަދަ އިންސާނެއްގެ ގޮތުގައެވެ. އެކަލޭގެފާނަކީ އިންސާނެއްކަމާއި ބިމުގައި އެކަލޭގެފާނު އިޚްތިޔާރު ކުރައްވައި ، ﷲ ގެ ޙަޟުރަތުން ޙަވާލުކުރައްވާފައިވާ އަމާނާތަކީ ، ﷲ ރުހިވޮޑިގެންވާ ތެދުމަގު ، އިންސާނުންނަށް ދެއްކުންކަމުގައި ވިދާޅުވެއެވެ. އަދި ބިމުގައި ދިރިއުޅެނީ އިންސާނުންކަމަށްވާތީ އެކަލޭގެފާނު ، އެބިންމައްޗަށް ރަސޫލުކަމައިގެން ފޮނުއްވީކަން ބަޔާންކޮށްދެއްވަމުން ގެންދަވައެވެ. އެހެނަސް ، ދުނިޔޭގައި މަލާއިކަތް ބޭކަލުން އުޅުއްވާނަމަ ، އެކަލާނގެ ވަޙީބަސްފުޅު ރައްދުކުރެއްވުމަށްޓަކައި ، މަލާއިކަތް ބޭކަލުން ބިމަށް ފޮނުއްވީސްކަމުގައި ، އެކަލޭގެފާނު ، މީސްތަކުންނަށް ސާފުކޮށްދެއްވައި ، ބަޔާންކޮށް ދެއްވިއެވެ.
ނޫޙުގެފާނުގެ ޤައުމުގެ މީހުންކުރެ ، މުއްސަނދި ، ކަމުވޮށިވެގެންވާ ޖަމާޢަތެއްގެ ބަޔަކު ، އެއްދުވަހަކު އައިސް އެކަލޭގެފާނާ ބައްދަލު ކުރިއެވެ. އަދި ދެންނެވިއެވެ.
" އޭ ނޫޙެވެ ! ތިމަންމެން ކަލޭގެފާނުގެ ބަސް ތެދުކޮށް ޤަބޫލުކުރަން ކަލޭގެފާނު އެދިވަޑައިގަންނަވާކަމުގައި ވަންޏާ ، މިހާރު ، ކަލޭގެފާނުގެ ބަސް ޤަބޫލުކޮށްގެން ތިބި މީހުން ކަލޭގެފާނު ދޫކޮށްލައްވާށެވެ. އޭރަށް ކަލޭގެފާނުގެ ބަސް ޤަބޫލުކޮށް ، ތިމަންމެން ކަލޭގެފާނަށް ބައިޢަތު ހިފާނަމެވެ. ތިމަންމެންނަކީ ޤައުމުގެ ، ކަމުވޮށިވެގެންވާ މުއްސަނދިންނެވެ. މީސްތަކުންގެ މައްޗަށް ތިމަންމެންގެ ބަސް ނުވިކި ، ތިގެންގުޅުއްވާ ފަޤީރު ނިކަމެތި މީސްކޮޅުގެ ބަސް ވިކޭނެކަމަށް ނުބައްލަވާށެވެ ! މިދެބާގަޔަކީ ފެނާ ތެލާހާ ތަފާތު ދެއެއްޗެކެވެ. މިދެބައިމީހުންނަކަށް ، ދުވަހަކުވެސް އެއްގަލަކަށް ނޭރޭނެއެވެ.
އެކަލޭގެފާނުގެ ޤައުމުގެ މުއްސަނދިން ، އެކަލޭގެފާނާއި އެކަލޭގެފާނަށް ތަބާވާ މީސްތަކުންނާ ދުރުހެލިވެ އެކަހެރިވެފައިވާ މިންވަރު ، ނޫހުގެފާނަށް އެނގިވަޑައިގަންނަވައެވެ. އެކަލޭގެފާނު ކެތްތެރިވެވަޑައިގެން ، ދުނިޔޭގެ މުދަލާއި މުއްސަނދިކަމަކީ ﷲ ގެ ނިމުމެއްނެތް ރަޙުމަތާއި މަތިވެރި ނިޢުމަތާ އަޅާބަލާއިރު ، އެއްވެސް އެއްޗެއްނޫންކަން ، އެކަލޭގެފާނުގެ ޤައުމުގެ މީސްތަކުންނަށް އަންގަވައި ދެއްވުމަށްޓަކައި ، ވަގުތު ބޭނުންވާކަން އެކަލޭގެފާނު ދެނެވަޑައިގަތެވެ. އަދި އެކަމަށް ކެތްތެރިވެ ވަޑައިގެން ވިސްނުންތެރިކަމާއެކު ފިޔަވަޅު އެޅުއްވުމުގެ މުހިންމުކަންވެސް އެނގިވަޑައިގަންނަވައެވެ.
ދުނިޔޭގެ އެދުމާއި ބޮޑާކަމަކީ ﷲ ގެ ޙަޟުރަތުގައި އެއްވެސް އަގެއްހުރި އެއްޗެއްނޫނެވެ. އެކަލާނގެ ބައްލަވާ ވޮޑިގެންވަނީ ، އިންސާނާގެ ހިތުގައިވާ އެއްޗަކަށެވެ. އެހިތުގައިވާ އެއްވެސް އެއްޗެއް އެކަލާނގެޔަށް ސިއްރުވެގެން ނުވެއެވެ. ވަރަށް ވިސްނުންތެރިކަމާއެކު ، ކެތްތެރިވެ ވަޑައިގެން ހުންނަވައި އެކަލޭގެފާނުގެ ޤައުމުގެ މީސްތަކުންނާ މުޚާތަބުކުރައްވާ ވިދާޅުވިއެވެ.
އޭ ! ތިމަންކަލޭގެފާނުގެ ޤައުމުގެ މީސްތަކުންނޭވެ ! އަހަރެން ބަދަލުގައި އެއްވެސް ތަނަވަސްކަމެއް ނޭދެމެވެ. އަހަރެންނަށް އެންމެހައި ނިޢުމަތާއި ރަޙުމަތް މިންވަރުކުރައްވަނީ މާތް ﷲ އެވެ. އަހަރެންނަށް ތަބާވީ މީސްތަކުން ދޫކޮށްލައްވާކަށް އަހަރެން ނުވިސްނާނަމެވެ. ހަމަކަށަވަރުން ، އެބައިމީހުން ، އެބައިމީހުން ހެއްދެވި ، މައިވެރިވަންތަ ފަރާތާ ބައްދަލުކުރާނެއެވެ. އެހެނަސް ، ތިޔަބައިމީހުން ( މުއްސަނދިންނާއި ޤައުމުގެ ކަމުވޮށިވެގެންވާ މީހުން ) ތިވަނީ އެހުރިހާ ކަމަކުން މަޙުރޫމްވެގެންނެވެ. އޭ ! ޤައުމުގެ އެންމެހައި މީސްތަކުންނޭވެ ! އެމީހުން ، އެބަހީ ތިމަންކަލޭގެފާނަށް ތަބާވެގެންވީ މީސްތަކުން ، އެކަހެރިކޮށް ، ތިމަންކަލޭގެފާނު އެމީހުން ދޫކޮށްލައްވައިފިނަމަ ، ﷲ ގެ ޙަޟުރަތުން ތިމަންކަލޭގެފާނަށް ކުރިމަތިވެ ވަޑައިގަންނަވާކަންކަމުގައި އެހީތެރިވެވޭނީ ކާކަށް ހެއްޔެވެ ؟ އެކަމަށް ކުޅަދާނަވެގެންވަނީ ތިޔަބައިމީހުންގެ ތެރެއިން ކާކަށް ހެއްޔެވެ ؟ އެކަމަށް ، ތިޔަބައިމީހުން އެއްވެސް ވަރަކަށް ވިސްނައިލީމު ހެއްޔެވެ ؟ ތިމަންކަލޭގެފާނާއެކުގައިވަނީ ﷲ ގެ ޙަޟުރަތުން ލިބިގެންވާ މުއްސަނދިކަންކަމުގައެއް ތިމަންކަލޭގެފާނު ވިދާޅެއް ނުވަމެވެ. އަދި ، ތިމަންކަލޭގެފާނަކީ މަލާއިކަތެއްކަމުގައިވެސް ވިދާޅެއް ނުވަމެވެ. ޣައިބުގައިވާ ކަންކަން ތިމަންކަލޭގެފާނަށް އެނގިވަޑައިގަންނަވާކަމުގައެއްވެސް ވިދާޅެއް ނުވަމެވެ. އިންސާނާގެ ހިތުގައިވާ ހުރިހާކަމެއް ދެނެވޮޑިގެންވާ ފަރާތަކީ މާތް ﷲ އެވެ.
(ނުނިމޭ)
