މަޑި ނުވަތަ ރާރާގުޑި އެރުވުމަކީ ދުނިޔޭގެ ވަރަށްގިނަ ޤައުމުތަކުގައި މުބާރާތެއްގެ ގޮތުގައި އަދި މުނިފޫހިފިލުވުމަށް ، ކުޅިވަރު ޙަރަކާތެއްގެ ގޮތުގައި ބާއްވާ ކަމެކެވެ. އިންޑިއާއަކީ ބައިނަލްއަޤްވާމީ ގުޑިއެރުވުމުގެ މުބާރާތް ބާއްވާ ޤައުމެކެވެ. ދެކުނި އޭޝިއާގެ ވަރަށްގިނަ ޤައުމުގައި ގުޑި އަރުވައެވެ. އިންޑިއާގައި ގުޑިއެރުވުމުގެ ފޯރި އެންމެ ގަދައީ ގުޖުރާތުގައެވެ. ކޮންމެ އަހަރެއްގެ ޖެނުއަރީމަހުގެ 14 ވަނަދުވަހަކީ ، އިންޑިއާގައި ގުޑިއެރުވުމަށް ޚާއްޞަކޮށްފައި އޮންނަ ދުވަހެކެވެ.
ރާއްޖޭގައި މިހާރު އެހާ ގިނައިން ގުޑިއެއް ނުއަރުވައެވެ. އަތޮޅުތެރޭގެ ބައެއް ރަށްރަށުގައި ކޮންމެވެސް ވަރަކަށް ގުޑި އަރުވައެވެ. ރާއްޖޭގައި ، ކުޅިވަރެއްގެ ގޮތުގައި ގުޑިއެރުވުމަކީ މިހާރު ކޮށްއުޅޭކަމެއް ނޫނެވެ.
ރާރާގުޑީގެ އެންމެ މުހިންމު އެކައްޗަކީ އެގުޑީގެ ބޮލުރޮއްޖެވެ. ބޮލުރޮއްޖަކީ ، ރީތިކޮށް އުޑުމަތީގައި ގުޑިއަރުވާފައި ބޭއްވުމަށްޓަކައި ވަރަށް މުހިންމު ރޮއްޖެކެވެ. ބޮލުރޮދި ކެނޑިއްޖެނަމަ ، އެހިސާބުން އެ ނިމުނީއެވެ. އަތްއަތަށް ގޮސް ގުޑީގެ ކޮންޓްރޯލް ގެއްލެއެވެ. ވަޔަކަށްވެސް ކޮންޓްރޯލެއް ނުކުރެވެއެވެ. ގުޑިއަރުވައިގެން ހުންނަ މީހާއަކަށްވެސް ގުޑި ކޮންޓްރޯލެއް ނުކުރެވެއެވެ. މަތީގައި އޮތިއްޔާ ގުޑި އުޅޭނީ އުޅޭނެ ގޮތަކަށެވެ. ރާރާ އަޑުވެސް ގުޑިން ކެނޑިގެން ދާނެއެވެ. އެންމެފަހުން ދެން ފެންނާނީ ބިންމައްޗަށް ވެއްޓޭ ތަނެވެ.
މި މިސާލާމެދު ، ދޮންބެއްޔާ ފުންކޮށް ވިސްނައިލިއެވެ. ބޮލުރޮދި ކެނޑިގެން މަގުމައްޗަށް ނުކުމެ އުޅޭ މީހުން ފެންނަލެއް ގިނަކަމުންނެވެ. އިންސާނަކަށްވީތީ ވިސްނަން ހުންނަ އެއްވެސް އެއްޗެއް އެމީހުންގެ ސިކުނޑިއަކަށް ނުވަދެއެވެ. ބުނެފަ ނުބުނާނެ އެއްޗެއް ނުއޮވެއެވެ. ކޮށްފަ ނުކުރާނެކަމެއް ނުއޮވެއެވެ. އެއީ ކޮންކަހަލަ ބައެއް ހެއްޔެވެ ؟ ލޮލަށް ފެންނަ ކަންކަމާއި ތަންތަނެއް ނުފެންނާނެއެވެ. ކޮށްފަ ނުކުރާނެކަމެއް ނޭނގޭނެއެވެ. މީހުންކިޔާ އެއްޗެއްގެ އަޑެއް ނުއިވޭނެއެވެ. ފެނުނަސް ޤަބޫލެއް ނުކުރާނެއެވެ. އިވުނަސް ނާހާނެއެވެ. މަގުހިނގޭނީ ކަނަކު ޢިޝާނަމާދަށް ދާހެންނެވެ. ދޮންބެއްޔާ ހިތަށް އެރިއެވެ. އެއީ ، ރާރާ ގުޑިއެއްގެ ބޮލުރޮދި ކެނޑޭހެން ، ބޮލުރޮދި ކެނޑިފަތިބޭ އިންސާނުން ނޫންބާވައެވެ ؟
