ބްލޫ ރިބަން: މަރުފަލިޖެހުން

މަރުފައްޔަކީ ، މަރަށް ފުރާނަޔަށް ޖަހާ އެއްޗެކެވެ. އުޑުމަތި އޮތީ ބަނަކޮށްފައެވެ. އިރުއިރުކޮޅުން ވިލާގަނޑު އައިސް ކަނޑު އުފުލި ، ކަނޑުމަތީގައިވާ އުޅަނދަށް ސަލާމަތުން ކަނޑުމަތީ ނުއޮވެވޭވަރަށް ގަދަވެއެވެ. ދެމޫސުމް ބެދޭ ދުވަސް ވަރެކެވެ. އޮޑީގެ ރިޔާހުރީ ތިރިކޮށްފައެވެ. ރިޔާ ނަގައިފިއްޔާ ވައިދަށް ފަރާތުން އަންނަ ރޯޅިޔެއް ރިޔަލުގައި އަޅާ ، އޮޑި ބަންޑުން ޖަހައިލަފާނެކަމުގެ ބިރު އޮވެއެވެ. އޮޑިއޮތީ މުދަލާއި ފައިސާ އަރުވައި ބަރާކޮށްފައެވެ. އޮޑީގައި ހައެއްކަމީހުން ތިއްބެވެ.

ހުންގާނުގައި ހުރީ ދަންނަކަން ނުދަންނަ ކަނޑުކޮހެކެވެ. އެނގި އިތުރުވެފައިހުރި ކައްޕިއެކެވެ. އަމިއްލަޔަށް މަތިންބައިންޖެހިގެން އޮޑިޔަށް އަރައި ހުންގާނު އަތުލި މީހެކެވެ. މީހުން ބުނެއުޅޭގޮތުގައި އެމީހަކުވަނީ ، އެތައް އޮޑިއެއް ފަރަށް އަރުވައިލާފައެވެ. އެއީ ފުއްޕާފަ ހުންނަ މީހެއްވީމަ ، އޮޑީގެ އެހެންކުދިންވެސް ، އޭނާ އަރުވާނެ ފޮނެއް އަރުވަން ދޫކޮށްލައިގެން ތިބީއެވެ. އަނގައިން ދެރަނުވެ ، ބޮޑުބަސް ބުނާތީއެވެ. އިޙްތިރާމުގެ ޙާ އަށް ބާރުލައިގެންނެވެ.

ދެދޫލީ ފަލީގެ ދެފަލިވެސް ކުނބުގެ ދެފަރާތުގައި ، ތައްޓުމަތީ އޮތެވެ. ލާގައްފަލީގައި އިނީ ޖާނުންވަރުގަދަ ޒުވާނެކެވެ. ހަކުންފަލީގައި އިނީ ، ހެދިހުރި ހަށުގަނޑެއް ލިބިފައިވާ ، މެދުޢުމުރުގެ މީހެކެވެ. ބަނޑުފަލީގައި އިނީ އޮޑީގައިހުރި އެންމެ ޅަ ޒުވާނާއެވެ. ކަނުފަލީގައި އިނީ ، ކައިގެން ބޮޑުވެ ، ބަނޑުން އެކަން އެނގެންހުރި ، ކުޑައިކޮށް ފަލަ މީހެކެވެ. ކަންކަހަފަލީގައި އިނީ މިޒަމާނުގެ ޒުވާނެކެވެ. ތުނބުޅި ދިގުވެފައި ހިސާބަކަށް ބޯވެސް ދިގެވެ. ކޮޅުފަލީގައިވެސް އަދި އެންވަޑިފަލީގައިވެސް ތިބީ ،  ޖާނުންވަރުގަދަ ދެމީހެކެވެ.

ފަލިތަކުގެ ވާހަކަޔަކީ ، ޙުކުމެއްކުރާ ފަނޑިޔާރަކު ޙުކުމެއް އިއްވާއިރު އެދައްކާ ވާހަކަތަކާއި ފާހަގަކުރާ ނުކުތާތަކާ އެއްފަދަ އެއްޗެކެވެ. ކިޔާމީހާއަށް އަދި އަޑުއަހާމީހާއަށް އިތުރަށް ތަފްޞީލުކޮށްދޭން ޖެހޭކަހަލަ އެއްޗެކެވެ.

ދެދޫލީ ފައްޔަކީ ، ފަލިތަންޑުގެ ދެކޮޅުގައި ދޫހަރުކޮށްފައި ހުންނަ ފައްޔެވެ. ލާގައްފައްޔަކީ ، ދިހަފަލި ހުންނަ ދޯނިފަހަރުގެ ކޮޅުފައްޔާޖެހިގެން ކޮޅުފަހަށް ހުންނަ ފައްޔެވެ. ދިހަފަލި ހުންނަ ދޯނިފަހަރުގެ ފަލިތަކަށް ކިޔައިއުޅެނީ ، ކެޑެފެލި ، ލާގައްފަލި ، ސާރިމަތި ، ކާނހައް ، ބަނޑޮފަލި ، މިގޮތަށް ، ދިރުބަނލުން ފެށިގެން ކޮޅުފަސްކޮޅަށް ތަރުތީބު ކުރެވިގެންނެވެ. ހަކުންފައްޔަކީ ، މަސްދޯނިފަހަރުގެ މާވަތުގައި ބޭނުންކުރާ ފައްޔެވެ. ބަނޑުފައްޔަކީ ، މަސްދޯނިފަހަރުގެ މެދުވަތުގައި ، ބޭނުންކުރާ ފައްޔެވެ. އެއީ ކޮޅުފަހު ފައްޔާ ޖެހިގެން ހުންނަ ފައްޔެވެ.  ކަނުފައްޔަކީ ، ދޯނީގެ އެންމެ ކޮޅުފަހަށް ހުންނަ ދެފައްޔެވެ.  ކަންކަހަފައްޔަކީ ، ކަނުފައްޔެވެ.  ކޮޅުފައްޔަކީ ، އޮޑީގެ އެންމެ ދިރުނބާކޮޅުގައި ހުންނަ ފައްޔެވެ. އެންވަޑިފައްޔަކީ ، އޮޑިފަހަރުގެ ވާތްފަރާތުން ، ދިރުނބާކޮޅުން ފެށިގެން ހަތަރުވަނަ ފައްޔެވެ. ކޮންމެއަކަސް ، އޮޑިދޯނިފަހަރުގެ ފައްޔަކީ ދިރާސާކޮށް ވަކާލާތުކޮށް ހޯދަންޖެހޭ އެއްޗެކެވެ. މައްސަލައެއްގެ އިސްތިއުނާފަށް މައްސަލަ ރައްދުވާ ފަރާތުން ވަކާލާތުކުރުންފަދަ ކަމެކެވެ. އެހާވެސް ނަމާއިކަމާ އަދި ހެއްކާ ޤަރީނާ ގިނައެވެ.

އޮޑި ދަތުރުކުރަނީ ހުޅަނގު ފަރާތަށެވެ. ހުޅަނގުފަރާތުން ބޮޑުވިލާގަނޑެއް ނަގައި މުޅި އުދަރެސް ކަޅުކޮށްލިއެވެ. ވިލާގަނޑުގައި ބާރުވައި އެބަހުއްޓެވެ. ކެރިވެސް އެހާގިނައިން އެބަހުއްޓެވެ. ކަނޑުގެ ރާޅުވެސް އެހާ ގަދައެވެ. ރާޅާ ، ދެއަތަށް ދެއަތަށް އޮޑިހަލުވައިގަންނައިރު ހީވަނީ ބަންޑުންވެދާނެ ހެންނެވެ. އޮޑީގައި މުޅިންވެސް ތިބީ ، ކަނޑުމައްޗަށް ގިނަގިނައިން އަރައިއުޅޭ ކަނޑުމައްޗަށް ގަދަ ނޫކަށި ޒުވާނުންނެވެ. ކައްޕި ފިޔަވައެވެ. ކަނޑުގައި އަޅާފައި އޮތީ އުދޮއެވެ. އެހާ އޮއި ބާރެވެ. އޮޑީގެ މިސްރާބު ސީދާކުރެވޭތޯ ބަލަމުން ގެންދަނީ ކުރިމަތިން ފެންނަން އޮތް ރަށުގެ ނެރާ ދިމާއަށެވެ. ކައްޕިގެ ވިސްނުންހުރި ވަރަކުންނެވެ. އެންމެފަހުން ފަޅުވެރިންނަށް އައީ ކައްޕީގެ އަމުރެކެވެ. ހުރިހާކުދިން ފައްޔަށް އަރާށެވެ.

މެއްކުގައި ހުރި ޅާނބުގެ ތެރެޔަށް ފަލީގެ ތަނޑު ރަނގަޅަށް ވައްދައި އަތަށް ހެޔޮވަރުކޮށް ފަލިޖަހަން އެންގިއެވެ. ކުރިޔަށް އަރާބާރަށްވުރެ ބޮޑަށް ، ގަދައޮއިގާ އޮޑިގެންދަނީ އަރިހުރަހަށެވެ. ނެރާ ސީދާކޮށްގެން ފަލިޖެހިޔަސް ، ނެރު އަތުވާނެކަމުގެ އުއްމީދެއް ނެތެވެ. ރަށުގެ އުތުރުކޮޅުން ފަޅުގައި ލައްވާލައިފިއްޔާވެސް އެވީ ބޮޑުވަރެކެވެ. އެހާވެސް އޮއިބާރެވެ. ދިހަފަލީގައިވެސް ކުރިޔަށް އަރަނީ ކުޑަ ތަންކޮޅަކަށެވެ. ހުރިހާކުދިން ފަލިޖަހަންތިބީ ، ދިނރުބާކޮޅަށް ފުރަގަސްދީގެންނެވެ. އެކުދިންނަކަށް ކުރިމައްޗެއް ނުފެނެއެވެ. ކުރިމަތި ފެންނަނީ ހަމައެކަނި ކައްޕިއަށެވެ. ކައްޕީގެ ކަރުން ނާރުނަގާފައި ބާރަށް ފަލިޖަހަން އަންގައި ، ދެލޯ ބޮޑުކޮށްގެންހުރެ ، ހަޅޭއްލަވަމުން ގެންދެއެވެ. ގަޑިން މިހާރު އެގާރަޖަހައި ބޮޑުވެއްޖެއެވެ. ކައްޕީގެ އެންމެ ބޮޑު ކަންބޮޑުވުމަކީ ، އޮޑީގައިހުރި 52 މިލިއަން ރުފިޔާއެވެ. އެއީ ، ބަޔަކު ވަގަށްނަގައިގެން އުޅޭ ލާރިގަނޑަކުން ، ގައިން އެންމެ ދާކޮޅެއްވެސް ނުއޮހޮރުވައި ، ކައްޕިޔަށް ލިބެން އޮތް އެއްޗެކެވެ. ހިކިފަސްތާކަށް ލައްވައިނުލާ އޮޑިފެތިއްޖިއްޔާ ، އެލާރިތައްވެސް ގެއްލުނީއެވެ. ކައްޕިޔާ ހުރިހާ ފަޅުވެރިންވެސް ކަނޑުވީއެވެ.

އޮޑީގައިތިބި ޒުވާނުން ނެތްހިތްވަރުލާފައި ، ފަލިޖަހަމުން ގެންދިޔައެވެ. ކުރިމަތީ އޮތް ރަށް އަތުނުވާނެކަން ކައްޕިޔަށް ޔަޤީން ވިއެވެ. އެވަގުތު ، އެއްފަރާތުން އައި ރާޅަކާ  ދެފަރާތަށް ހަލުވަމުންގޮސް އޮޑި ބަންޑުން ޖަހައިލިއެވެ. ހުރިހާކުދިން ، އޮޑި ދޫކޮށްލައި  ރަށުގެ އުތުރުކޮޅުން ފަޅުތެރެ އަތުވޭތޯ ބަލަން ފަތައިގަންނަން ކައްޕި އެންގިއެވެ. އެމީހަކާ އެމީހެކެވެ. އެހެންމީހަކަށް ބަލާނެކަމެއް ނެތެވެ. އެމީހެއްގެ ސަލާމަތް އެމީހަކު ހޯދާށެވެ. ލައިގެންތިބި ގަމީހާއި ފަޓްލޫނު ދޫކޮށްލައި ހުސްޖަނގިޔާއަށް ހަދައި ، ހަށިގަނޑު ލުއިކޮށްލާ ، ކުރިމަތިން ފެންނަން އޮތް ރަށާދިމާއަށް ހުރިހާކުދިން ފަތައިގަތެވެ. އެކުދިންނަށްވެސް ކުރިޔަށް އެރޭވަރަށްވުރެ ބާރަށް އޮޔަށް ބިތަށް އެކުދިން ގެންދާކަން އެނގުނެވެ. ރަށް އަތުވާނެކަމުގެ އުއްމީދެއް ނެތެވެ.

އެކަކު އަނެކެއްގެ ޙާލަށް ނުބަލައި ފަތަމުންގޮސް ، ރަށުގެ އުތުރުކޮޅުން އުރަފަށަށް ދެވުނުކަން އެނގުނެވެ. އެހިސާބުން ވިލާގަނޑުގެ ވަޔާއި ކެރިން ، އެކަކު އަނެކަކަށް ނުފެންނަވަރު ވިއެވެ. އެންމެންނަށްވެސް ފަޅުމަތީ ފައިޖެހުނުކަމުގެ އިޙްސާސް ވިއެވެ. ދެންވީގޮތެއް ނޭނގުނެވެ. ހޭލެވުނީ ރަށުގެ އަތިރިމަތީ ފައްޖެހި އެނދުތަކެއްގައި އެންމެން ބައިތިއްބާފައި ތިއްބައެވެ. ކައްޕި ހޭއަރައިގެން އެންމެ ފުތަމަވެސް ބަލައިލީ އޮޑި ފެނޭތޯއެވެ. އޮޑި ، އޮޔާގޮސް ގެއްލިއްޖެއެވެ. އެރަށުމީހުންނަށްވެސް ، އޮޑި ގެންނަން ކަނޑުމައްޗަށް އަރާކަށް ނުކެރުނެވެ. އެކަމަކު މީހުން ސަލާމަތް ކޮށްދިނެވެ. އެމީހުންނަށް ސަލާމަތްވެވުނީ ހަމަ ކިރިޔާއެވެ. މަރަށް ފުރާނަޔަށެވެ. މަރުފަލި ޖަހައިގެންނެވެ.

މަރުފަލިޖެހުމަކީ ، ކަމަކާމެދު ވެވޭން އޮތްހައި ބާރެއްލައި އެކަމެއް ކުރަން ، މަސައްކަތްކުރުމެވެ. އެއީ ، ތިމާގެ ނަޒަރުގައި ނުވެވޭނެ ކަމަކަށް ، އަނެކާ ކުރިމަތިލައިގެން ކުރާ މަސައްކަތާމެދު ބުނެއުޅޭ ބަހެކެވެ. ކަމެއް ވާނެކަމަށް ބަލައި ، ބޮޑުބަސްބުނެ ، އެކަމެއްކުރަން އުޅޭއިރު ، އެހެން މީހުންގެ ނަޒަރުގައި އެކަމެއް ނުވާނެއެވެ. އެމީހުން ބުނާނެއެވެ. ތިޔަކަމެއް ނުކުރެވޭނެއެވެ. ތިޔަޖަހަނީ މަރުފައްޔެވެ.

މަރުފަލިޖަހައި އުޅޭ މީހުން މިޤައުމުގައިވެސް ހާދަ ގިނައެވެ. އަމިއްލަޔަށް ހަލާކުވެދާއިރުވެސް ، ދިރުމެއްނެތް އުއްމީދެއްގައި ނަފުސުގެ އަޅުންނަށް ވެގެން ، އެމީހުންނަށް ހަމަ ނުވިސްނެނީއެވެ.

ލޯ އަނދިރިމީހެއްގެ ފެނުން އަލުން އިޢާދަވެއްޖެނަމަ ، އޭނާ އެންމެފުރަތަމަވެސް ކުރާނެކަމަކީ ، އޭނާއަށް މަގުދައްކައިދިން އަސާގަނޑު އެއްލައިލުމެވެ. ކަނޑުވާމީހާ ހިކިފަސްތަނަކަށް ދެވުނީމާ ، އޭނާ އެންމެ ފުރަތަމަވެސް ކުރާނެކަމަކީ ، ސަލާމަތުން ހިކިފަސްތަނަކަށް އޭނާ ގެނެސްދިން ފިލާގަނޑު ، މޫދަށް ދޫކޮށްލުމެވެ. އެއީ ، ދުނިޔޭގެ އާދައެވެ.