ދާދި ފަހުން އިސްތިއުފާދެއްވި ސްރީލަންކާގެ ރައީސު ގޮތާބޭ ރާޖަޕަކްސަ އަންނަ އޮގަސްޓު މަހުގެ ފުރަތަމަ ދުވަހު ކޯޓަށް ހާޒިރުވެވަޑައިގަތުމަށް އެގައުމުގެ ސުޕްރީމް ކޯޓުން އަމުރެއް ނެރެފިއެވެ. އޭނާއަށް ކޯޓުން އަމުރުކޮށްފައި ވަނީ ކޯޓަށް ހާޒިރުވެވަޑައިގެން، އެ ގައުމު އިގުތިސާދީ ގޮތުން 'އިނދަޖައްސާލުމުގައި' ޒިންމާވާ ފަރާތްތަކާ ދެކޮޅަށް ބަޔަކު ހުށަހަޅާފައިވާ މައްސަލަައަށް ޖަވާބުދާރިވެވަޑައިގަތުމަށެވެ.
ސުޕްރީމް ކޯޓުގެ ފަސް ފަނޑިޔާރުންގެ ބެންޗަކުން ނިންމާފައި ވަނީ ގޮތާބޭ ރާޖަޕަކްސާ އާއްމު ރައްޔިތެއްގެ ހައިސިއްޔަތުން ޖަވާބުދާރީވެވަޑައިގަންނަވަން ޖެހޭކަމުގައެވެ.
ގޮތާބޭ ހާޒިރުވެވަޑައިގަތުމަށް ސުޕްރީމް ކޯޓުން މިއަދު އަމުރު ނެރުނުއިރު، ކޯޓުން ވަނީ އޭނާގެ ބޭބޭފުޅު މަހިންދަ ރާޖަޕަކްސާއާއި ކޮއްކޯފުޅު ބަސިލް ރާޖަޕަކްސާ ގައުމުން ބޭރަށް ވަޑައިގަތުން މަނާކޮށްފައިވާ މުއްދަތު އޮގަސްޓު މަހުގެ 2 ވަނަ ދުވަހާ ހަމައަށް އިތުރުކޮށްފައެވެ.
ސްރީލަންކާގެ ސުޕްރީމް ކޯޓުން މިއަަމުރު ނެރުނު އިރު ގޮތާބޭ ރާޖަޕަކްސާ ހުންނެވީ ސިންގަޕޫރުގައެވެ. މި ޖުލައި މަހުގެ 12 ވަނަ ދުވަހުގެރޭ ގައުމު ދޫކުރައްވައި ދިިވެހިރާއްޖެއަށް ވަޑައިގަތުމަށް ފަހު އޭނާ ވަނީ މި މަހުގެ 14 ވަނަ ދުވަހު ސިންގަޕޫރަށް ވަޑައިގެންފައެވެ. އޭނާ ސިންގަޕޫރަށް ވަޑައިގަތުމަށް ފަހު އެ ގައުމުގެ ސަރުކާރުން ބުނެފައި ވަނީ އޭނާ ސިޔާސީ ހިމާޔަށް އެދިވަޑައިގެންފައި ނުވާކަމަށާ، ސިޔާސީ ހިމާޔަތް ނުދޭ ކަމަށެވެ. އަދި އޭނާއަށް 14 ދުވަހު ވިޒިޓް ޕާސްއެއް ދޫކޮށްފައިވާ ކަމަށެވެ.
ގޮތާބޭގެ ވިޒިޓް ޕާހުގެ މުއްދަތު މާދަމާ ހަަަމަވެއެވެ. އެހެންނަމަވެސް، މިއަދު ސިންގަޕޫރުގެ ބައެއް ނޫސްތަކުން ބުނެފައިވާ ގޮތުން ސިންގަޕޫރު ސަރުކާރުން ވަނީ އޭނާގެ ވިޒިޓް ޕާސް 14 ދުވަހަށް އިތުރުކޮށްދީފައެވެ.
އަނެއްކޮޅުން ސްރީލަންކާގެ ކެބިނެޓްގެ ތަރުޖަމާނު އިއްޔެ ވިދާޅުވެފައިވާ ގޮތުގައި ގޮތާބޭ ރާޖަޕަކްސާ ވަަރަށް އަވަހަށް ގައުމަށް އެނބުރިވަޑައިގަންނަވާނެއެވެ.
އެހެންނަމަވެސް، ސިންގަޕޫރު ސަރުކާރުން މިހާރު އޭނާ އެގަމުގައި އިތުރު 14 ދުވަހަށް ހުރުމުގެ ހުއްދަދީފައިވާއިރު، އޭނާ ގައުމަށް އެނބުރިވަޑައިގަންނަވާނެކަމާމެދު ގިނަ ބަޔަކު ސުވާލުއުފައްދައެވެ.
