މިހާލަތުގައި އެރަށްޔިތުންނާއިމެދު (ސްރީލަންކާ) އަޅާލުމަކީ ކޮންމެހެން ބޭނުންތެރިކަމެއް ކަމަށް ކުރީގެ ރައިސް ޑރ. މުހައްމަދު ވަހީދު ހަސަން ވިދާޅުވެއްޖެއެވެ.
އެމަނިކުފާނު ކުރެއްވި ޓްވީޓެއްގައި ރައީސް ޑރ. ވަހީދު ވިދާޅުވީ މިހާލަތަކީ ލަންކާގެ އެތައް ރައްޔިތުންނެއް ބިކަ ހާލުގައި ޖެހިފައިވާ ދަނޑިވަޅަކަށްވާއިރު، މިހާލަތުގައި އެރަށްޔިތުންނާއިމެދު އަޅާލުމަކީ ކޮންމެހެން ބޭނުންތެރިކަމެއް ކަމަށެވެ.
މިހާލަތުގައި ލަންކާގެ ރައްޔިތުންނަށް އެއްވެސް ބަޔަކު ޚިޔާނާތްތެރި ވެގެން ނުވާނެކަމަށް ވެސް ވިދާޅުވިއެވެ.
ސްރީލަންކާގެ ރައީސް އިސްތިއުފާ ދެއްވުމަށް އެޤައުމުގެ އެތައް ހާސް ރައްޔިތުން ކުރަމުންދާ މުޒާހަރާގައި ނަތީޖާ ނެނެރެވެނީސް ލަންކާގެ ރައީސް ގޮތަބަޔަ ރާޖަޕަކްސަ ވަނީ ފިއްލަވައިގެން ރާއްޖެ ވަޑައިގެންފައެވެ.
ޑރ. ވަހީދު ވަނީ ލަންކާގެ ރައީސް ގޮތަބަޔަ ރާއްޖެ ވަޑައިގަތުމަށް ޖާދަގީ ރާއްޖެއިން ޢަމަލުކޮށްފައިވާ ގޮތާއިމެދު ކަންބޮޑުވުން ވެސް ވަނީ ފާޅު ކުރައްވާފައެވެ.
ސްރީލަންކާގެ އިޤްތިޞާދީ ހާލަތާ ގުޅިގެން ވެރިރަށް ކޮލަމްބޯގައި ފެށި މުޒާހަރާތަކުގެ ބައިވެރިން ރިޔާސީ ގަނޑުވަރަށް ވަދެ އެ ތަން ހިސާރު ކުރުމާ ގުޅިގެން ރާޖަޕަކްސަ ވަނީ އިސްތިޢުފާ ދެއްވައި، އައު ސަރުކާރެއް އެކުލަވައިލުމަށް ފުރުޞަތު ދެއްވާނެ ކަމުގައި ވިދާޅުވެފައެވެ.
ނަމަވެސް، އޭގާ ކުރިން، އެމަނިކުފާނާއި އަނބިކަނބަލުންނާއި ދެ ހަށިފާރަވެރިން ދަތުރު ކުރި ކަމުގައި ރޮއިޓަރސްއިން ބުނެފައިވެއެވެ.
ސްރީލަންކާގެ ހާލަތު ގޯސްވެ ކުރިމަތިވި ފާޑުކިޔުންތަކާއި މުޒާހަރާތަކާ ގުޅިގެން ރައީސް ގޮތަބަޔާ ރާޖަޕަކްސްގެ ބޭބޭފުޅު މަހިންދަ ރާޖަޕަކްސް ވަނީ މޭ މަހުގެ ތެރޭގައި ބޮޑުވަޒީރުގެ މަޤާމުން އިސްތިޢުފާ ދެއްވާފައެވެ.
އޭނާ މި ވަގުތު ހުންނެވީ ކޮލަމްބޯގައެވެ. އަދި، ކުރީގެ މާލީ ވަޒީރު ކަމުގައިވާ ބަސިލް ރާޖަޕަކްސަ ފިއްލަވައިގެން ޤައުމު ދޫކޮށް ވަޑައިގަންނަވަން އުޅެނިކޮށް ވަނީ ހުއްޓުވާފައެވެ.
