ޕީޕީއެމްގެ މެމްބަރުންތަކެއް އެހެން ޕާޓީތަކުން އޮޅުވާލައިގެން ގެންދިޔަކަމަށް ދައްކާ ވާހަތަކަކީ ސާބިތުކޮށްދެވޭ ވަރުގެ ވާހަތަކެއް ނޫން ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގް ވިދާޅުވެއްޖެއެވެ.
އޭނާ މިހެން ވިދާޅުވީ ޕީޕީއެމްގެ 5،000 މެމްބަރުން އޮޅުވާލައިގެން އެހެން ޕާޓީތަކަށް ބަދަލުކުރި ކަމަށްބުނެ އިލެކްޝަންސް ކޮމިޝަނަށް މައްސަލައެއް ހުށަހެޅުމުންނެވެ.
ޕީޕީއެމްގެ ސެކެޓްރީ ޖެނެރަލް މުޙައްމަދު ޠަލާލް ކުރެއްވި ޓުވީޓެއްގައި ވިދާޅުވެފައިވަނީ މިދިޔަ އަހަރުގެ އޮކްޓޯބަރު މަހުން ފެށިގެން މިހައިތަނަށް ޕީޕީއެމްގެ 5،000 އަށްވުރެ ގިނަ މެމްބަރުން އެހެން ޕާޓީތަކަށް އޮޅުވާލައިގެން ގެނެސްގޮސްފައި ވާކަމަށެވެ.
މިމައްސަލަ ބަލައި މެމްބަރުން އަލުން ޕީޕީއެމްއަށް ވެއްދޭނެ ގޮތެއް ހަމަޖެއްސުމަށް އިލެކްޝަންސް ކޮމިޝަނުގައި އެދިފައިވާކަމަށް ވެސް އެ ޓްވީޓުގައި ބުނެފައިވެއެވެ.
" ޕާޓީތަކުން މެމްބަރުން ބަދަލުވުމާއި، ނޭނގި މެމްބަރުން ބަދަލުވުމަކީ ވަރަށް ގިނައިން މި ކޮމިޝަނަށް ހުށަހަޅާ މައްސަލައެއް. މިކަމަކީ އެކޮމިޝަނަށް ކުރެވޭނެ މާބޮޑުކަމެއް އޮތް މައްސަލައެއް ނޫން." ފުއާދު ވިދާޅުވިއެވެ.
ފުއާދު އިތުރަށް ވިދާޅު މި މައްސަލައަށް ހައްލު ގެނައުމަށް އިލެކްޝަންސް ކޮމިޝަނުން، ސިޔާސީ ޕާޓީތަކާ ބައްދަލުކޮށްފައިވާ ކަމަށެވެ. އަދި ޕާޓީތަކުން ހުށަހަޅާ ފޯމުތަކަކީ ޞައްޙަ ފޯމުތަކަށް ހެދޭނީ ޕާޓީތަކުންނާއި އާންމު މެމްބަރުން ވެސް އެކަމަށް ތެދުވެރިވެގެންކަމަށް އޭނާ ވިދާޅުވިއެވެ.
އެ ކޮމިޝަނުން މިހާރުނިންމާފައިވަނީ ސިޔާސީ ޕާޓީތަކުގެ މެންބަރަކަށް ވުމަށް ސައްޙަ ނޫން ފޯމު ހުށައެޅުމުގެ މައްސަލަ ހައްލުކުރުމަށް، ސިޔާސީ ޕާޓީތަކުން އިލެކްޝަންސް ކޮމިޝަނަށް ހުށަހަޅާ ފޯމުތައް ވަކި މުއްދަތަކަށް އާންމު ކުރުމަށެވެ.
އެހެންވެ، މިބަދަލާއެކު އޮޅުވާލައިގެން ހުށަހަޅާ ފޯމުތަކާއި، އެއް ޕާޓީން އަނެއް ޕާޓީއަށް މެމްބަރުން ބަދަލުކުރާ މައްސަލައަށް ކޮންމެވެސް ވަރެއްގެ ހައްލެއް ލިބިގެންދާނެކަމަށް އުއްމީދު ކުރައްވާ ކަމަށް ފުއާދު ވިދާޅުވިއެވެ.
