ހެޔޮޢަމަލެއްކުރުމަކީ އެހައި އުނދަގޫކަމެއްނޫނެވެ. އަދި އަމްދުން، އިސްލާމީ އުޞޫލުތަކުން ބަށްޓަންވެފައި އޮންނަ ސުލޫކެއްގެ އަހުލުވެރިންނަކީ، ހެޔޮޢަމަލުކުރުމަށް ހިތްއެދޭނެ ނުވަތަ އެކަމަށް ދެވިހިފައިފައި ތިބޭނެ ބަޔެކެވެ. ކުދިކުދި ހެޔޮޢަމަލުން ތިބާގެ ދުވަސް ފުރިހަމަކުރެވިއްޖެނަމަ، އެއީ ބާއްޖަވެރިކަމުން ފުރިގެންވީ ދުވަހެކެވެ. އެހެނީ، ކުދިކުދި ހެޔޮޢަމަލަކީ، ބޮޑެތި ހެޔޮޢަމަލަށް ވާގިދޭ އެއްޗެކެވެ. ތިމާގެ ސިކުނޑި، ހެޔޮކަންކަމުން ކައްސައިނުލައި، ނުބައި އާދަތަކަށް އަރައިގަތުމުން ދުރުހެލިވުމަށް މަގުދައްކައިދެނީ އިސްލާމީ މަތިވެރި، ރިވެތި އާދަތަކެވެ. އެފަދަ އާދަތަކެއްގެ މަތީ ދެމިހުންނަ މީހަކީ ނަސީބުލިބިއްޖެ މީހެކެވެ. ދީނުގެ ނަމުގައި، އެއްވެސް އަސާސެއްނެތް ޙުއްޖަތްތަކުން ދީނަށް ނިސްބަތްވާ ހެޔޮޢަމަލުތައް ކިލަނބުކޮށް ހައްދުފަހަނައަޅައިދިއުމީ ހެޔޮކަމެއްނޫނެވެ. ދީނަކީ އުނދަގުލެއް ނުވަތަ ތަކުލީފަކަށްވާވަރަށް، ހައްދުންބޭރަށް ގެންދާނަމަ، ހެޔޮޢަމަލުތަކަށް މީހުންކުރާ އުއްމީދަށް އުނިކަން ލިބޭނެއެވެ. ﷲ ޙަލާލުކުރައްވައިފައިވާ ކަންކަން ޙަރާމްކޮށް، ރަސޫލުޞައްލަﷲ ޢަލައިހި ވަސައްލަމަގެ ސުންނަތް އޮޅުވައިލައި، ސުންނަތުން އެއްކަމެއްގައި ވާރިދުވެފައިހުންނަ އެކި ރިވާތަކުން އުނދަގޫގޮތް އިޚްތިޔާރުކުރުމީ، ދީނާދުރަށް މީސްތަކުން ގެންދިއުމަށް އެޅޭ ބާރެކެވެ. އިންސާނާގެ ހިތް، ހެޔޮޢަމަލަށް ލެނބުމަށް ކުރިމަތިކުރުވޭ ހުރަހެކެވެ.
ކީރިތި ޤުރުއާނުގެ މާއިދަތު ސޫރަތުގެ 87 ވަނަ އާޔަތުގައި ﷲ ތަޢާލާ ވަޙީކުރައްވައި އަންގަވައިފައި ވެއެވެ.
يٰأَيُّهَا ٱلَّذِينَ آمَنُواْ لاَ تُحَرِّمُواْ طَيِّبَاتِ مَآ أَحَلَّ ٱللَّهُ لَكُمْ وَلاَ تَعْتَدُوۤاْ إِنَّ ٱللَّهَ لاَ يُحِبُّ ٱلْمُعْتَدِينَ
"އޭ އީމާންވެއްޖެ މީސްތަކުންނޭވެ! ތިޔަބައިމީހުންނަށްޓަކައި ﷲ، ޙަލާލުކުރައްވައިފައިވާ ރަނގަޅުކަންތަކާއި ތަކެތި، ތިޔަބައިމީހުން ޙަރާމް ނުކުރާށެވެ! އަދި، ތިޔަބައިމީހުން ހައްދުފަހަނަޅައި ނުދާށެވެ! ހަމަކަށަވަރުން، ހައްދުފަހަނަޅައިދާމީހުންދެކެ ﷲ ލޯބިވެވޮޑިގެން ނުވެތެވެ."
ނަމާދަށް ބަންގިގޮވުމުގެ އިންތިޒާރުގައި، ގޭގައި ޤުރުއާން ކިޔަވައިލަން އިނުމީ ހެޔޮވެގެންވާ ޢަމަލެކެވެ. އެކަމަކު، ބަންގިގޮވަންދެން، ގޭގައި ގޭމްކުޅެންއިނުމީ ހެޔޮޢަމަލެއްނޫނެވެ. މަގުމެދުގައި އޮންނަ ތޫނު އެއްޗެއް އެއްފަރާތްކޮށްލުމަކީ ހެޔޮ ޢަމަލެކެވެ. އެކަމަކު، މަގުމަތީއޮންނަ ތޫނުއެއްޗެއް އެއްފަރާތްކޮށްލުމުގެ ނިޔަތުގައި މީހުން ހިނގާ ދުވާރުމައްޗަށް ލުމަކީ ހެޔޮކަމެއްނޫނެވެ. ފަޤީރުންނަށް އެހީވެ ޞަދަޤާތް ކުރުމަކީ، ހެޔޮ ޢަމަލެކެވެ. އެހެނަސް، ދުލަށްއައިހައި އެއްޗެއްގޮވައި، ޞަދަޤާތް ލިބިގަންނަމީހާ ހިތުގައި ޖައްސައި ރޮއްވައިފައި ދޭ ޞަދަޤާތަކީ ހެޔޮޢަމަލެއްނޫނެވެ. ނަމާދަށް މިސްކިތަށް ދާން، މަގުހުރަސްކުރާ މީހާ، މަގުހުރަސްކުރަން ފުރުޞަތުދީ، ދުއްވާތަކެތި މަޑުކޮށްލުމަކީ ހެޔޮ ޢަމަލެކެވެ. އެހެނަސް، އުނދަގޫވާވަރަށް ބަރުގޮނުއަޅައި، ރުޅިއައިސްގެން، މަޑުކޮށްގެން އިނުމަކީ ހެޔޮ ޢަމަލެއްނޫނެވެ. ހެޔޮޢަމަލަކީ މިފަދައިން އޮންނަ ކަމެކެވެ.
