ރަޝިއާ – ޔުކްރޭން ހަނގުރާމައިގާ ޕުޓިން ކާމިޔާބު ކޮށްފިއެވެ. އެހެންނަމަވެސް، މިޙަޤީޤަތް ޤަބުލުކުރާކަށް އެއްވެސް މީހަކު ބޭނުމެއް ނުވެއެވެ. ދުނިޔެވެސް ބޭނުމެއް ނުވެއެވެ. އެކަމަކު، ޙަޤީޤަތްވާނީ ޙަޤީޤަތަށެވެ. ރަޝިއާގެ ތެލާއި ޤުދްރަތީ ގޭސް ގަތުން ހުއްޓައިނުލާނެކަމަށް ޖަރުމަނުން ބުނިބުނުމަކީ، މިހާތަނަށްވެސް، އެއްވެސް އަސާސެއް އޮތްވާހަކައެއްކަމަކަށް ވިސްނިފައެއް ނެތެވެ. ރަޝިއާއިން ޔުކްރޭނަށްދޭ ޙަމަލާތައް ކުރިޔަށް ގެންދިޔައިރުވެސް މެއެވެ. ޗައިނާވެސްވަނީ، ރަޝިއާއަށް ތާއީދުކޮށް، ޔުކްރޭނަށް ޙަމަލާދިނުމަކީ، ޤައުމީ ސަލާމަތަށްޓަކައި ރަޝިއާއިންކުރި ކަމެއްކަމަށް ބުނެ، ރަޝިއާއަކީ، ޗައިނާގެ އެންމެގާތް އަދި "މުހިންމު ބައިވެރިއެއް" ކަމުގައި ބުނެފައެވެ. ރަޝިއާއިން ޔުކްރޭން ހިފިހިފުން، ކުށްވެރިކުރުމަށް ޗައިނާ ތައްޔާރެއްނޫނެވެ.
ޖަރުމަންގެ ޗާންސެލަރގެ ބަޔާނަކީ، 2008 ގައި އެމެރިކާގެ އިޤްތިޞާދު ކޮޅަށްޖެހުމަށް އެޅިފިޔަވަޅުގެމަތިން ހަނދާންކޮށްދިން ބަޔާނެކެވެ. އެމެރިކާގެ އިޤްތިޞާދު ހަލާކުވެގެންދިޔަ އެއްސަބަބަކީ، ދަރަންޏަށް ފައިސާދޭމީހުންނާއި ބޭންކްތަކުގެ މުޢާމަލާތު ހަރުކަށިވުމުންކަމަށްބުނެ، އެމީހުންނަށް އެންގީ ދަރަނިތަކަށް ލުއިދިނުމަށެވެ. ބޭންކްތަކުގެ ވެރިން، ރައްޔިތުންގެ ފައިސާ ބޭނުންކުރީ، އެމީހުންގެ އަމިއްލަ ބޯނަސްތަކާއި ފައިދާއަށާއި، ދުވަސްވީ މުދަލުގެ ޖަމާގަތުމަށެވެ. އޭގެއިތުރަށް، ޚިދުމަތުގެ އަގުބޮޑުކޮށް، މުއައްޒަފުންގެ ޢަދަދު މަދުކޮށް، އެތައްބަޔަކު ވަޒީފާއިން ވަކިކުރިއެވެ. އެއިން އެކަކުވެސް އިޖްތިމާޢީ ޢަދާލަތާމެދު ވިސްނާލާފައެއްވެސް ނެތެވެ. އަނެއްކާވެސް، އެމީހުން އެނބުރިދިޔައީ އިހުގެ ޙާލަތަށް، އިޤްތިޞާދު އިތުރަށް ގޯސްވުމުގެ ފިޔަވަޅުތަކާ ދިމާއަށެވެ. އެކަން އެކުރީ ކީއްވެތޯ ކުރެވުނު ސުއާލަށް އެމީހުންދިނީ ވަރަށް އާދައިގެ ޖަވާބެކެވެ. ބޭންކް ތަކަކީ އެހައި ފަސޭހައިން ފެއިލްވާވަރަށްވުރެ މާބޮޑެތި މާލީ އިދާރާތަކެއްކަމުގައި ބޭންކްތަކުން ހާމަކުރިއެވެ. އެހެން ޢިބާރާތަކުން ބުނާނަމަ، އެވަގުތުވެސް، ރައްޔިތުން ބަރޯސާވީ، އެބައިމީހުންގެ ދުޝްމަނުންނަށެވެ. ބޭންކްތަކުގެ ޚުދުމުޚުތާރު އަދި ހަރުކަށި ބަހަށެވެ. އެއީ ޤަބޫލުކުރަން ބޭނުންނުވާ ކަމެއްކަމަށްވިޔަސް، އެޙާލަތު މަޖުބޫރުކުރީ، އެކަމަށް އެއްބަސްވެ، ހަނުތިބުމަށެވެ. އަދިވެސް އެމެރިކާގެ ރައްޔިތުން އެތިބީ އެޙާލަތުގައެވެ. އިޤްތިޞާދު ރަނގަޅުވުމުގެ ކުޑަވެސް ނިޝާނެއް ފެންނަމުންނެއް ނުދެއެވެ. އެހެންމީހުންނާ ދިމާއަށް އިނގިލި ދިއްކުރެވޭވަރަށްވުރެ، އަމިއްލަ ޙާލަތު މާގޯހެވެ. މިކަންވެސް ޤަބޫލުކުރަނީ ދަތިޙާލުގައި އުޅޭ ރައްޔިތުންނެވެ. ސަރުކާރަކުން އެކަން ޤަބޫލެއް ނުކުރެއެވެ.
މިވާހަކަ މިމޭރުމުން ދައްކާމީހުންނަކީ، ބޭވަފާތެރި، ބޭކާރުވާހަކަ ދައްކާމީހުންކަމަށް ލޭބަލް ކުރެވިގެން ހިނގައިދާނެއެވެ. އެހެންނަމަވެސް ޙަޤީޤަތް ވާނީ ހަމަ ޙަޤީޤަތަށެވެ. ޑީމޮކްރަސީގެ ހަމަތަކާއި އިންސާނީ ޙައްޤާބެހޭގޮތުން އަނގަ ހުޅުވައިލާ މީހުންނަކީ، އިދިކޮޅު ޚިޔާލުގެމީހުންކަމަށް ވަރަށް ފަސޭހައިން ބެލެވެއެވެ. އެންމެންނަށް އެނގޭ "ބޮޑު ސިއްރު" އެއީ، އެބުނާ "މިނިވަން ދުނިޔޭގައި" އެއްކަނަކަށްލައި، މީހުންގެ ދިރިއުޅުމާއި ފުރާނަ ސަލާމަތްކުރަން ބޭނުންކުރެވޭ އެއްޗަކަށް ނުވެއެވެ. ބުއްދީގެ ބޭނުންކޮށްގެން، މިވިސްނުމުންވިސްނާއިރު، ރަޝިއާގެ ސަލާމަތާއި އިޤްތިޞާދާ އަދި އަދި އެނޫންވެސް ކަންކަމަށް އޮތް ނުރައްކާ ޤަބޫލުނުކޮށް، ޔުކްރޭނާ އަދި ޔުކްރޭނުގެ މުސްތަޤްބަލާމެދު އެއްޗެއް ބުނުމަކީ އަދި ފިޔަވަޅެއް އެޅުމަކީ ކުރެވިދާނެކަމެއް ނޫނެވެ. އެކަން އެހެން ކޮށްފިނަމަ، ފަހުންއެކަމާމެދު ހިތާމަކުރަން ޖެހޭނެކަމީ ޝައްކެއްއޮތް ކަމެއްނޫނެވެ.
ރަޝިއާއިން ޔުކްރޭން ހިފުމަކީ، "ބޮޑު ގޯހެއް" ކަމަށް، ވަރަށްގިނަ ނޫސްވެރިން، މިހިނގައިދާ މަހެއްހައި ދުވަހުގެ ތެރޭގައި، އެބައިމީހުންގެ ޚިޔާލު ފައުޅުކޮށްފައި ވެއެވެ. އެބައިމީހުންގެ ހިތުގައި އެއްވެސް ޝައްކެއްނެތިއެވެ. ވަރަށް ހަރުކަށި ޢިބާރާތް ބޭނުންކޮށް، އެބައިމީހުންގެ ހިތުގެ އުދާސްތައް ބަންޑުންކޮށްފައި ވެއެވެ. ކޯވިޑްގެ ޢާލަމީ ވަބާ ނިމުމަކަށް އަންނަކަން ބަޔާންކޮށް، ލިޔުންތައް ލިޔުނީވެސް ހަމަ އެމީހުންނެވެ. އެމީހުން ބުނަނީ، ޕުޓިންގެ އަތް މާ ދިގުކޮށްފިކަމުގައެވެ. ޕުޓިންގެ އަތް ފޯރަންޖެހޭ ހިސާބު ނިންމަން އެއީ ކޮންބަޔެއް ހެއްޔެވެ ؟ ޕުޓިންގެ އަތް ފޯރަންޖެހޭ ހިސާބު ނިންމާނީ ޕުޓިންނެވެ. އެއީ ޕުޓިންގެ އަމިއްލަ އިޚްތިޔާރު އޮތް، އަދި ޕުޓިންގެ ޙައްޤެކެވެ. އެހެންމީހުންނަށްވެސް އެ ޙައްޤު ލިބިފައި އޮންނަ ބީދައިންނެވެ.
އެމީހުން އެބުނަނީ، ނޭޓޯއާއި ހުޅަނގުގެ ބައިވެރިންގެބާރު، ރަޝިއާއަށް އޮޅިފައި އޮތްކަމުގައެވެ. ޕުޓިން ކަންބޮޑުވެފައި ހުރިކަމުގައެވެ. އަދި ދުނިޔެއާ ވަކިން އެކަނިވެރިކަމުގައި މާގިނަދުވަސް ހޭދަކޮށްފިކަމުގައެވެ. ފަހަރެއްގައި، ޕުޓިންގެ ވިސްނުމާއި ފިކުރު، އެހެންމީހުންނަށް ނޭނގެނީކަމަށްވެސް ވެދާނެއެވެ. އެއީ ޕުޓިން އެކުރަހާ "ބޮޑު މަންޒަރު" ހުޅަނގަށް ނުވަތަ އެހެންމީހުންނަށް ނުފެންނަނީކަމަށް ނުވަތަ ބަލަން ބޭނުންނުވަނީކަމަށް ވެދާނެއެވެ. އެހެންމީހުންނަކަށް ހަމަ ނޭނގެއެވެ.
ވަގުތަށްބަލާއިރު، ހުޅަނގާއި އެމެރިކާގެ ރައްޔިތުންނަށް، ޚާއްޞަކޮށް އެމެރިކާގެ ރައްޔިތުންނަށް، ޓްރަމްޕާއި ޕުޓިންގެ ވިސްނުމާއި ފިކުރު ކުޑަކޮށްވެސް ނޭނގެއެވެ. އެމެރިކާގެ ގިނަމީހުންނަކީ، ކަންނެތް، ރުޅިގަދަ އަދި އަމިއްލައެދުން ބޮޑު ބަޔެކެވެ. އެކަމަކު އެމީހުންނަކީ، ބުއްދިފިލައި ގޮސްފައިވާ ބައެއްނޫނެވެ. އެއީ، އަސާސެއްގެ މަތީގައި ތިބޭ އެކިފެންވަރުގެ އެކިމަސައްކަތުގައި މަސްއޫލުވެއުޅޭ އަދި އެހެންމީހުންނަށް ވިސްނައިގަންނަން ނޭނގޭފަދަ ބަޔެކެވެ. ޔުކްރޭނުގެ ރެޕޮރިއްޒާ އަވަށުގެ އެނަހޮޑާ ނިއުކުލިއަރ ޕަވަރޕްލާންޓަށް ބޮންއެޅި ހާދިސާއަށް ވިސްނާލާއިރު، އެއީ ޚައްޞާސް ބައިނަލްއަޤްވާމީ ކަމެކެވެ. އާދައިގެ ކަމެއްނޫނެވެ. އަދި ހުރިހާގޮތަކުންބަލާއިރުވެސް ޢުދުވާނީ ޢަމަލެކެވެ. ރަޝިއާއިން ދުނިޔެއަށް އެދިން މެސެޖް ސާފުނުވެއްޖެނަމަ، ކޮންމެފަދަގޮތެއްވެސް ވެދާނެއެވެ. ރަޝިއާކުރަންއުޅޭ ކަމަކަށް ހުރަސްއަޅައިފިމީހެއްގެ ދުވަސް ދުއްވާލާނެކަން އެކަމުން ދޭހަވެއެވެ. މުޅި ސަރަޙައްދު ގޮއްވާލަފާނެއެވެ. ކިތަންމެ ގަދަބަސްބުނެފައި އަދި ކިތަންމެ މޭފުއްޕާފައި ކުރިމައްޗަށް ނުކުތަސް ރަޝިއާ ޖެހިލުމެއްނުވާނެއެވެ. ކުރުކޮށް ބުނާނަމަ އެއީ ސިކުނޑިން ނިންމާ ނިންމުމެކެވެ. ކުޅިކުޅިވަރަށް ކުރާކަމެއްނޫނެވެ. އެހެނެއްކަމަކު، އެއީ ޓެރަރިޒަމްގެ ޢަމަލެއްވެސް މެއެވެ.
މިހުނަރާއި ރޭވުން ޞުލްޙައިގެ ވާހަކަތަކާއި އިންސާނީ އެހީގެ ކަންކަމުގައިވެސް ބޭނުން ކުރެވޭނެއެވެ. ބެލެނިވެރިކަމެއްނެތް ޞުލްޙައެއްގެ ހަތަރު އަގޮޅިއަކަށް ގެންދާނެއެވެ. ހަނގުރާމައިން ރައްކައުތެރިވާން ބޭނުންވާމީހުން ފިލަން މަގުދައްކާނެއެވެ. އަދި އެމީހުން ފިލަން ދުއްވައިގަތީމަ ބޮންއަޅާނެއެވެ. ނުވަތަ ޙަމަލާ ދޭނެއެވެ. ކޮންމެވެސް އެއްމަގެއްގައި ގޮވާބޮން ވަޅުލާނެއެވެ. މިއީ ބައިނަލްއަޤްވާމީ މައްސަލައެކެވެ. އެއީ އެންމެފުރިހަމަގޮތުގައި ރޭވިގެން ހިންގޭ ހަނގުރާމައިގެ ކުށެކެވެ. މިހުންނަނީ، ވީހައިގިނަބަޔަކަށް އަނިޔާއާއި ގެއްލުންލިބޭގޮތަށް ރޭވިގެން ހިންގޭ ޖަރީމާ އެވެ.
ބަޙުސަކަށްދާއިރު، ރަޝިއާ ސިފައިން ޔުކްރޭނަށް އަރައި ޔުކްރޭނު ހިފީ، އެހައި އަވަހަކަށްނޫނެވެ. ހިފެންއޮތްވަރަށްވުރެ ލަސްކޮށް ވަގުތުދީގެންނެވެ. އެއީ ރަޝިއާގެ ރޭވުމެއްގެ މަތިން ހިނގައިދިޔަ ކަމެކެވެ. ހަނގުރާމކުރަންޖެހޭ ޙާލަތުގައި އެމެރިކާއިން ޢަމަލުކޮށްފައިވާ ގޮތް ތަފާތެވެ. ނިކަން ވިސްނާލާށެވެ ! އެމެރިކާއިން 2003 ވަނައަހަރު، ޢިރާޤަށްއަރައި ޢިރާޤު ހިފުމަށް މަހަކަށްވުރެ ގިނަދުވަސް ވިއެވެ. އަދި އިތުރު 17 އަހަރުވަންދެން، އެމެރިކާގެ ސިފައިން ޢިރާޤުގައި ބައިތިއްބިއެވެ. އޭގެ ބަދަލުގައި އެމެރިކާއަށް ލިބުނީ ކޮންއެއްޗެއް ހެއްޔެވެ ؟ ލިބުނު ހަމަ އެކައްޗެއްވެސް ނެތެވެ. އެމެރިކާއިން ޢިރާޤުހިފީ ނުބައި އަސާސެއްގެ މައްޗަށް ބަލާފައެވެ. އަމިއްލަ ސިޔާސީ އެދުމެއް އިސްކޮށް، ވެރިކަންބަދަލުކުރުމުގެ އަސާސް އަޞްލަކަށް ބަލައިގެންނެވެ. އެމެރިކާއަކީ، ބަޖެޓުން އެތައްސަތޭކަ ބިލިއަން ޑޮލަރެއް ޢަޝްކަރީ ޚަރަދުތަކަށް ހޭދަކުރާ ޤައުމެކެވެ. ބަޖެޓްގެ ތިންބައިކޮށްފަ އެއްބައި ހޭދަކުރަނީ ޢަޝްކަރީ ޚަރަދަށެވެ. މިކަމުން، ރައްޔިތުންނަށް ލިބޭ މަންފާއެއްނެތެވެ. ހިންގަންތިބޭ މީހުން ފަޚުރުވެރިވެލަން އޮންނަ ފައިދާ ނޫން އެހެންކަމެއް ޙާޞިލެއްނުވެއެވެ. ޢާންމު ރައްޔިތުންނަށް ދެލޯބޮޑުކޮށްފައި، އަނގަހުޅުވުންނޫންކަމެއް ނެތެވެ. ދުނިޔޭގެ ލީޑަރުން ބާރުހޯދާގޮތާއި ޢަޝްކަރީ ބާރުވެރިކަން އެއީ ރައްޔިތުންނަށް ވަޒަންކުރެވެން އޮންނާނެކަމެއްނޫނެވެ. ވެރިކަމަށް އައިމަ އަތަށްލިބޭ ބާރު ބޭނުންކުރާނީ އިތުރު ބާރު ހޯދުމަށެވެ. އެއީ ދުނިޔޭގެ އާދައެވެ.
ރަޝިއާގެ ޢަމަލުން ދުނިޔެ ބައިބައިކޮށްލައިފިއެވެ. އެމެރިކާގައި ރިޕަބްލިކަން ޕާޓީގެ މެންބަރުންގެ ޝަޢުޤު އޮތީ ބައިބައި ވެފައެވެ. ޕުޓިން މަރައިލުމަށް އޭގެތެރެއިން އެއްބަޔަކު އެބަ ގޮވައެވެ. އަނެއްބަޔަކު ގޮވަނީ، ޔުކްރޭނަށް އެހީވުމަށް ތަންކޮޅެއްބޮޑަށް އުޅެން ވެއްޖެކަމަށެވެ. ހަމައެއާއެކު، ގޭހުގެ އަގުބޮޑުވާތީ ޝާކުވާވެސް ކުރެއެވެ. އެކަމަކު، އެމެރިކާއިން ޢިރާޤަށް އަރައި އެޤައުމު ހިފިއިރު، ވެރިކަމުގައިހުރި ބުޝް ގެ ހިތްވަރުގަދަކަމަށް ތަޢުރީފުކޮށް އަތްތިލަބަޑި ޖެހިއެވެ. އެއްބަޔަކު ބުނާގޮތުގައި ޔުކްރޭން – ރަޝިއާގެ ހަނގުރާމަޔަކީ، ދުނިޔެ ހޭލައްވައިލި ކަމެކެވެ. ދުނިޔޭގެ ހަމައާއި އިންސާފު އޮޅެނީ މިހިސާބުންނެވެ. ރައްޔިތުން އިންތިޚާބުކޮށްފައިތިބި ބަޔަކު އެކިޔާ އެއްޗެއްގައި އަސާސެއް އެބައޮތް ހެއްޔެވެ؟ ނެތެއްނޫން ހެއްޔެވެ؟
ސެނެޓްގެ ރިޕަބްލިކަނުންގެ " ފިނި ބަޙުސް " ގައި ރަޝިއާއާއި ޔުކްރޭން ޞުލްޙަކުރުމުގެ އެއްވެސް ވާހަކައެއް ނުދައްކައެވެ. ހައްތާވެސް ފިޔަވަޅު އެޅުމުގެ ވާހަކައެވެ. ދަތިކުރުމުގެ ފިޔަވަޅާއި ޔުކްރޭނަށް ހަތިޔާރު ދިނުމުގެ ވާހަކަނޫން ވާހަކައެއް ނެތެވެ. އަދަބެއްދިނުން ފިޔަވައި އެމީހުންގެ ވިސްނުމަށް އެހެން އެއްވެސް ކަމެއްނާދެއެވެ. ދުނިޔޭގެ ޞުލްޙަ އޮންނާޏެ ޙާލަތު މިހިސާބުން ވަޒަން ކޮށްލެވޭނެއެވެ. މިއީ ދުނިޔޭގެ އެންމެ ބޮޑު އަދި ފަޚުރުވެރި ބޮޑުބާރުގެ ވިސްނުން ހުރިގޮތެވެ. މިއެންމެންނަކީ، ރަނގަޅަށްވިއްޔާ ޤަވާޢިދުން ރަޝިއާއިން ލާރިލިބޭމީހުންނެވެ. އެއްގޮތަކުން ނުވިއްޔާ އަނެއްގޮތަކުންނެވެ. އެބައިމީހުންގެ ވިސްނުމަކީ ދުނިޔެ ބައިބައިކޮށްލުން ނޫން އެހެން ކޮންކަމެއް ހެއްޔެވެ؟ ވެގެން މިއުޅޭގޮތަކާމެދު، ވިސްނައި ފިކުރުކުރާ މީހަކަށް މިނޫން އެހެން އެއްޗެއް އެނގޭނެ ހެއްޔެވެ؟
ތިޔައީ، ރަޝިއާއިން ޤަވާޢިދުން ފައިސާލިބޭ ނުވަތަ ރަޝިއާގެ ފައިސާ ދައުރުވާ މަގުން ބައެއްލިބޭ އެމެރިކާގެ ސެނެޓްގައި ރިޕަބްލިކަން ޕާޓީ ތަމްސީލުކުރާ މެމްބަރެކެވެ. އެހެންނޫންކަމަށްވިޔަސް، ވިސްނުމާއި ފިކުރުންނާ އަދި ޢަމަލުން ފެންނަނީ، ދުޝްމަނަކަށް އެހީވާތަނެވެ. ސަބަބަކީ، އެމީހުން މިހާރުވެސް ތިބާ ބޭޒާރުކޮށްލަފާނެއެވެ. ބޭޒާރުކޮށްލެވޭވަރަށް ތިބާ ހުންނާނީ ތާށިވެފައެވެ. އެމެރިކާގެ ސިޔާސީ މީހުން ގަނެލުމުގައި ޕުޓިންއަށް އެއްވެސް ދަތިކަމެއް ކުރިމައްޗެއް ނުވާނެއެވެ.
ރަޝިއާއިން، ޔުކްރޭން ހިފުމަށްފަހު އަވަށްޓެރި އެހެން ޤައުމުތަކާ ދިމާކޮށްފާނެކަމުގެ ބަޙުސް މިހާރުއޮތީ ފެށިފައެވެ. އެއީ އެއްވެސް އަސާސެއް އޮތްކަމެއްނޫނެވެ. ޕުޓިން، އެވަރުގެ ގޯހެއް ނުހަދާނެއެވެ. މި ހަނގުރާމައިގާ ޕުޓިންގެ ވިސްނުން ވަރަށްސާފެވެ. މަޤްޞަދު އެއޮތީ ފެންނާށެވެ. އެންމެންނަށްވެސް އެކަން އެނގޭނެއެވެ. އެހެން އެއްވެސް ޤައުމެއްހިފާކަށް ރަޝިއާއަކުން ނުވިސްނާނެއެވެ. އަދި އަމްދުން، ޔުކްރޭނުގެ ސަރުކާރު ޙިޞާރުކުރާކަށް ރަޝިއާއަކަށް ނުޖެހޭނެއެވެ. މި ހަނގުރާމައިގެ އަޞްލަށް ބަލާއިރު، މިކަމެއް ހިނގާތާ އެތައް އަހަރެއްވެއްޖެކަމުގެ އިޙްސާސް ކުރެވެއެވެ. އެކަމަކު މިހަނގުރާމަޔަށް މިވީ އެންމެ ދެހަފްތާއެވެ. ޕުޓިންއަށް މިކަން އެނގެއެވެ. މުޅިދުނިޔެ އޮތީ ކޯވިޑްގެ ޢާލަމީ ވަބާގައި ނުތަނަވަސްކަމެއްގެ ތެރޭގައިކަން ޕުޓިންއަށް އެނގެއެވެ. އަދި ޟަރޫރީ ބޭނުންތަކަށް ބޭނުންވާ ތަކެތި ދުނިޔޭގައި މަދުވެފައި އޮތްކަންވެސް ޕުޓިން އަށް އެނގެއެވެ. އެއީ، ދުނިޔޭގެ ޤުދްރަތީ ވަޞީލަތްތައް މަދުވަމުންދާތީއެވެ. ދުނިޔޭގެ އާބާދީއަށް އާމްދަނީ ލިބޭނެގޮތްތައް ދުނިޔެއިން ދަތިވަމުންދާތީއެވެ. މިކަންކަމަށްބަލާއިރު ރަޝިއާއަކީ، ތެލުގެ ބާވަތްތަކާއި ދަގަނޑާއި ލަކުޑި އަދި ގަސްކާނާގެ ބާވަތްތައް އަދި އެލްމެނިއަމްގެ އުފެއްދުންތައް އެންމެގިނައިން އުފައްދާ ބޭރުކުރާ ޤައުމެވެ. މިއީ، ދުނިޔޭގެ ގިނަ ޤައުމުތަކުގައި ފުދޭވަރަށް ލިބެން ނުހުންނަ ޤުދްރަތީ ވަޞީލަތެވެ. ކާބޯތަކެއްޗާއި މަތިންދާބޯޓު އަދި ކާރަކީ އެމެރިކާއިން އުފައްދާ އެންމެގިނައިން ބޭރުކުރާ ބާވަތްތަކެވެ. އެލްމެނިއަމްގެ ބާވަތަކާނުލައި ކާބޯތަކެއްޗެއް ނުއުފެއްދޭނެއެވެ. ތެލުގެ ބާވަތަކާ ނުލައި ޕްލާސްޓިކް ފުޅިއެއް ނުއުފެއްދޭނެއެވެ. ތެލާނުލައި މަތިންދާ ބޯޓަކަށް ނުއުދުހެވޭނެއެވެ. އަދި ކާރެއްވެސް ނުދުއްވޭނެއެވެ. ހުޅަނގުގެ ޤައުމުތަކުން ރަޝިއާއާ ދެކޮޅަށް ދަތިކުރުމުގެ ފިޔަވަޅުއެޅީ، ދެއަތްމޭމަތީ ބާއްވައިގެންނެވެ. ދެލޯމަރާފައެވެ. ފޭހުނު އިލޮށި ހެރޭނީ ތިމާމެންގެ އަމިއްލަ ލޮލަށްކަން އެނގި ތިބެއެވެ. ރަޝިއާގައި އުފައްދާ އެތައްބާވަތެއްގެ ރޯމިޓީރިއަލަށް މުޅިދުނިޔެ އޮންނަނީ ބަރޯސާ ވެފައެވެ.
ރަޝިއާއިން ފަށައިގެން އެއުޅެނީ ތިމާވެށީގެ ހަނގުރާމައެކެވެ. ތަފާތު ހަނގުރާމައެކެވެ. ދުނިޔޭގެ ބޮޑުން، ތިމާވެށީގެ ވާހަކަ ދައްކަން ހަނދާންނެތިފައި ތިއްބައެވެ. މިއީ މިހަނގުރާމައިގެ އެންމެ ނަލަ ބަޔެވެ. އެހެންނަމަވެސް އެއީ އެންމެ މުހިންމު އެކައްޗެވެ. ޕުޓިން، ތިމާވެށީގެ ހަނގުރާމައިގާ އަތްލައިފިއެވެ. މިއީ، އެތައް ދިހައަހަރަކުއްސުރެ މިކަން މިހެނވެދާނެކަމަށް ތަޖްރިބާކާރުން ބުނަމުން އަންނަ ކަމެކެވެ. ޔުކްރޭނަކީ މީގެ ފެށުމެވެ. ޤުދްރަތީ ވަޞީލަތްތައް ލިބިގެންވާ ޖަމާޢަތްތަކަކީ، ކުރިމަގުގައި އެންމެ ބާރުގަދަ ޖަމާޢަތްތަކަށްވެގެން ދާނެއެވެ. އަދި އޭގެ ފައިދާ އެމީހުން ހޯދަމުން ގެންދާނެއެވެ. އިމްޕޯޓަށް ބަރޯސާވެގެން ތިބޭމީހުންގެ ބާރު ކެނޑިގެންދާނެއެވެ. ދެމެހެއްޓެނިވި ހަކަތައިގެ ވިސްނުމެއް ތަންފީޒުނުކުރާ ބަޔަކީ، ދުނިޔެއިން އެންމެ ބާކީވާނެ މީހުންނެވެ.
ހަނގުރާމަޔަށްބަލާއިރު، ރަޝިއާ މިހަނގުރާމަ ކާމިޔާބުކޮށްފިއެވެ. އެތައްބަޔެއްގެ ފުރާނައިގެ އަގުގައެވެ. ދުނިޔޭގެ އައު އިޤްތިޞާދު، ހުޅަނގުގެ މީހުންނަށްވުރެބޮޑަށް ޕުޓިންއަށް އެނގެއެވެ. އޭނާގެ އަމިއްލަ ޤައުމުގެ ރައްޔިތުންވެސް މިހަނގުރާމައިގާ ދައްޗާއި ނުރައްކަލާ ކުރިމަތިލާންޖެހޭނެކަންވެސް ޕުޓިންއަށް އެނގެއެވެ. އަދި އަމިއްލަ ރައްޔިތުންގެ ނުރުހުމާއި ނަފުރަތު އަމާޒުވާނެކަންވެސް ޕުޓިންއަށް އެނގެއެވެ. މިހުރިހައިކަމަކާއެކުވެސް، ދުނިޔެއަށް އެހައި މުހިންމު ރޯމިޓީރިއަލްސް ގެ ބޮޑުބައިއޮތީ، ޕުޓިންގެ މުށުތެރޭގައިކަން ޕުޓިންއަށް އެނގެއެވެ.
ރަޝިއާ އަތްމަތީގައި ދުނިޔެއަށް ބޭނުންވާ ރޯމިޓީރިއަލްސްގެ ބޮޑުބައި އޮތްއިރު، އެހެންހުރިހައި އެއްޗެއްގެ ކޮންޓްރޯލް އޮތީ ޗައިނާއަތްމަތީގައެވެ. ޗައިނާއަކީ އަބަދުވެސް ރަޝިއާގެ ގާތް ބައިވެރިޔެކެވެ. ޗައިނާއަކީ އެމެރިކާ ނަގާފައި ދުނިޔޭގެ އެންމެބޮޑު އިޤްތިޞާދެވެ. ޗައިނާއިން މިސްރާބުޖަހައިފައިއެވަނީ، އެމެރިކާ ފަހަތަށް ޖައްސައިލައި 2030 ވަނައަހަރު އަންނައިރު ޗައިނާއަކީ ދުނިޔޭގެ އެންމެ ބާރުގަދަ އިޤްތިޞާދީ ބާރުކަމަށް ވުމަށެވެ. ޗައިނާއޮތީ ރަޝިއާއާ އެކުގައެވެ. އިންސާނީ ޙައްޤުތަކާ ރަޝިއާއިން ކިތަންމެވަރަކަށް ޚިލާފުވިޔަސް، އެއީ ޗައިނާއަށް މައްސަލައެއް ނޫނެވެ. މިހަނގުރާމައިގާވެސް ޗައިނާއިން އަންނަނީ، ރަޝިއާގެ އަމިއްލަ މަޞްލަޙަތާއި ޤައުމީ ސަލާމަތަށް ވިސްނުން ބަހައްޓައިގެން، ދުނިޔެއިން ރަޝިއާއާމެދު އަޅާ ދަތިލުރުމުގެ ފިޔަވަޅުތައް އެޅުމަށް ގޮވައިލަމުންނެވެ. އަދި ޗައިނާއިން ވަނީ ޞުލްޙަވެރިކަމާއެކު، މިހަނގުރާމަ ނިންމަން މަސައްކަތްކުރުމަށް އިސްނަގާފައެވެ.
ދުނިޔޭގެ ބޮޑެތިކުންފުނިތަކުގެ އުފެއްދުން، ރަޝިއާގައި ވިއްކުން ހުއްޓުވިދާނެއެވެ. ޔަހޫދީން ކުރާ އެކިވިޔަފާރިތައް ހުއްޓުވިދާނެއެވެ. އެޕްލް ކުންފުނީގެ ސްމާރޓްފޯން ރަޝިއާގައި ވިއްކުން މަނާކުރެވިދާނެއެވެ. އެހެނަސް، ފޯން އުފެއްދުމަށް ދުނިޔޭގެ ބިމުން އުފެދޭ، ރަޝިއާގައިހުރި ރޯމިޓީރިއަލްސް ހޯދަން ރަޝިއާއަށް ސަލާންޖަހަންޖެހޭ ދުވަސް އެހައި ދުރެއްނުވާނެއެވެ. އަޞްލު ޙަޤީޤަތަކީ، ރަޝިއާއަކީ، ހުއްޓުވައިލަން ނުވަތަ އިނދަޖައްސާލެވޭވަރަށްބޮޑު ބޮޑު އަދި ބިޔަ،ޤުދްރަތީ ވަޞީލަތްތަކުން މުއްސަނދި ޤައުމެއްކަމެވެ. ދުނިޔެ، މިހަނގުރާމައިގާ ކާމިޔާބުހޯދަން ބޭނުންނަމަ، ވާންޖެހޭ އަޞްލު ޤުރުބާނީއަށް ތައްޔާރުވާން ޖެހެއެވެ. ޕުޓިންއަކީ ބޭނުމެއްނެތް މީހަކަށް ހަދަންޖެހެއެވެ. ރަޝިއާއާ ނުލައި ދުނިޔޭގައި އުޅެވޭނެގޮތް ހޯދަން ޖެހެއެވެ. އެކަންއެހެން ވާނީ، ދުނިޔޭގެ އިޤްތިޞާދާއި އަދި އިޖްތިމާޢީ ޢަދާލަތު އަލުން އަތުރައި ތަރުތީބުކޮށްގެންނެވެ. މިކަން މިމަގުން ކުރެވޭވަރަށްވުރެ ދުނިޔެ އޮތީ ބައިބައި ވެފައެވެ. އެއްކަމެއްގައި އެއްގަލަށް އެރޭވަރަށްވުރެ ވާދަވެރިތަނަކަށް ބަދަލުވެފައެވެ. އަޞްލަކީ އެމެރިކާއެވެ. އެހެންކަމުން، ޔުކްރޭން އަދި ރަޝިއާ ހަނގުރާމައިގާ ކާމިޔާބު އޮތީ ރަޝިއާ އަތްމަތީގައެވެ. އެމެރިކާއަށްވެސް އަދި ހުޅަނގުގެ ޤައުމުތަކަށްވެސް ލިބޭނެ ކާމިޔާބީއެއް އަދި ފެންނާކަށް ނެތެވެ.
