ރައީސް ޔާމީނާއެކު ސިޔާސީ މަސައްކަތް ނުކުރައްވާނެ ކަމަށް މޯލްޑިވްސް ނޭޝަނަލް ޕާޓީ (އެމްއެންޕީ) ގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމެއްގައި ޕާޓީގެ ރައީސް ކާނަލް (ރ) މުޙައްމަދު ނާޒިމް ވިދާޅުވެއްޖެއެވެ.
ނާޒިމް ވިދާޅުވި ގޮތުގައި ރައީސުލްޖުމްހޫރިއްޔާގެ މަގާމުގައި ރައީސް ޔާމީން ހުންނަވަނިކޮށް އެމަނިކުފާނުގެ އެކައުންޓަށް އެއް މިލިއަން ޑޮލަރު ޖަމާވުމަކީ އޭނާ ގަބޫލު ކުރައްވާ ކަމެއް ނޫނެވެ. އެއީ އެކަން އޮވެގެން ވާނެ ގޮތެއް ނޫނެވެ. އަދި މީގެ އިތުރަށްވެސް ރައީސް ޔާމީންގެ އަރިހުގައި މަސައްކަތް ކުރެއްވިއިރު ކުރެއްވިފައިވާ ތަޖުރިބާތަކެއް އެބަހުރި ކަމަށާއި އެ ތަޖުރިބާގެ ވާހަކަ އާއްމުކޮށް ދައްކަވަން ބޭނުންފުޅު ނުވާ ކަމަށްވެސް އޭނާ ވިދާޅުވިއެވެ.
ނާޒިމް ވިދާޅުވި ގޮތުގައި ޕީޕީއެމާއެކު މަސައްކަތް ކުރުމަކީ މައްސަލައެއް ކަމަކަށް އޭނާ ދެކެވަޑައެއް ނުގެނެއެވެ. އެކަމަކު ކޮންމެ ޕާޓީއަކާއެކުވެސް މަސައްކަތް ކުރައްވާނީ ޕާޓީގެ އިސް ބޭފުޅުންގެ މެދުގައި މަޝްވަރާ ކުރެވި ނިމޭ ގޮތެއްގެ މައްޗަަށް ކަމުގައިވެސް އޭނާ ވިދާޅުވިއެވެ.
އުތުރުތިލަފަޅުގެ އެއްބަސްވުމާ ބެހޭ ގޮތުން ވާހަކަފުޅު ދައްކަވަމުން ނާޒިމް ވިދާޅުވި ގޮތުގައި އިންޑިއާ ސިފައިން ދާއިމީ ގޮތެއްގައި ރާއްޖޭގައި ތިބުމަކީ އޭނާ ތާއީދު ކުރައްވާ ކަމެއް ނޫނެވެ. މައިގަނޑު ސަބަބަކީ ދިވެހި ރައްޔިތުން އެ ގޮތް ބޭނުން ނުވާކަން އެނގިވަޑައިގަތުމެވެ. އެހެންވީމާ މަޖިލީހުގެ ކޮމިޓީތަކުގައި ޕާޓީގެ މެންބަރުން ރަސްމީކޮށް ހިމެނިގެން ދިޔައީމާ އެ އެއްބަސްވުން އޮތް ގޮތެއް ބައްލަވަން މަސައްކަތް ކުރައްވާނެއެވެ.
ނާޒިމް އިތުރަށް ވިދާޅުވި ގޮތުގައި އޭނާގެ ޑިފެންސް މިނިސްޓަރުކަމުގައި އިންޑިއާ ސިފައިން ކީއްކުރަންތީ އެއްވެސް ގައުމެއްގެ ސިފައިން އުތުރުތިލަފަޅުގައި ބާއިތިއްބާކަށް މަޝްވަރާއެއް ނުކުރެއެވެ. އަދި އެފަދަ އެއްބަސްވުމެއްވެސް ނޯންނާނެއެވެ. އުތުރުތިލަފަޅު ހަދަން މަޝްވަރާ ކުރެވުނު ނަމަވެސް އޭނާ މަގާމުން ވަކިވެވަޑައިގަތީ އެ މަޝްވަރާ ނުނިމެނީސް ކަމަށްވެސް ނާޒިމް ވިދާޅުވިއެވެ.
