ނިއުކުލިޔާ ހަތިޔާރާއި، ހަކަތަ އުފެއްދުމަށް ބޭނުންކުރާ މާއްދާ %20 އަށް ފައްކާކުރަން އީރާނުން ފަށައިފިކަން އިންޓަނޭޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) އަށް 9 ދުވަސް ކުރިން އަންގާފައިވާ ކަމަށް އީރާނުން އެ އެޖެންސީއަަށް ކަނޑަޅާފައި ހުންނަވާ މަންދޫބު ކާޒިމް ޣަރީބް ވިދާޅުވެއްޖެއެވެ. އައިއޭއީއޭއިންވެސް ވަނީ މިކަން ކަށަވަރުކޮށްދީފައެވެ.
ޔުރޭނިއަމް %20 އަށް ފައްކާކުރުމަކީ ނިއުކުލިޔާ ހަތިޔާރު އުފެއްދުމަށް މަގުފަހިކޮށްދޭނެ ކަމެކެވެ. އެހެންކަމުން ޔޫރަޕްގެ ގައުމުތަކުންނާއި އެމެރިކާއިން ވަނީ މިކަންކުށްވެރިކޮށްފައެވެ. އަދި މިއީ 2015 ވަނަ އަަހަރުގެ ނިއުކުލިޔާ އެއްބަސްވުން 'ދިރުވަން' ކުރާ މަސައްކަތަށް އެޅޭ ހުރަހަކަށް ވެދާނެކަމަށް ބުނެފައެވެ. ނިއުކުލިޔާ އެއްބަސްވުމަށް އެމެރިކާ އެނބުރި އައުމާ ގުޅޭ މަޝްވަރާތައް ޖޫން މަހުގެ 20 ދުވަހު މެދުކަނޑާލާފައި ވާއިރު، މަޝްވަރާތައް ފަށާނެ ދުވަހެއް އަދި ނިންމާފައި ނުވެއެވެ.
"އީރާނުން ނިއުކުލިޔާ ހަކަތައާ ގުޅޭގޮތުން އަމަލުކުރަން ބުނެފައިވާ ކަންކަަމަށް އަމަލުނުކުރުން އިތުރުކުރަމުން ދާކަމީ ކަންބޮޑުވާން ޖެހޭ ކަމެއް. ޚާއްސަަ ނިއުކުލިޔާ ހަތިޔާރު އުފައްދާ ދަރަޖައިގެ ތަހުލީލުތައް ކުރުން ފާހަގަކޮށްލަން ޖެހޭ. މިއީ އީރާނުން އަނެއްކާވެސް ފަހަަތަށް އެޅި ކަންބޮޑުވާންޖެހޭ ފިޔަވަޅެއް. ވަކިން ޚާއްސަކޮށް ނިއުކުލިޔާ އެއްބަސްވުމަށްެ އެނބުރި ދިއުމަށް އެމެރިކާ ބޭނުންވާކަން އިޚްލާސްތެރިކާއެކު ހާމަކޮށްފައި ވަނިކޮށް (މިކަން ކުރުމަކީ ކަންބޮޑުވާން ޖެހޭ ކަމެއް.)" އެމެރިކާ ޑިޕާޓްމަންޓް އޮފް ސްޓޭޓް (ޚާރިޖީ ވުޒާރާ) ގެ ތަރުޖަމާނު ނެޑް ޕްރައިސް ވިދާޅުވިއެވެ.
ފްރާންސާއި، ޖަރުމަނާއި، އިނގިރޭސި ވިލާތުންވެސް ވަނީ އީރާނުން އެޅި ފިޔަވަޅާމެދު "ނިހާޔަތަށް ކަންބޮޑުވުން" ފާޅުކޮށްފައެވެ.
"ޔުރޭނިއަމް މެޓަލް އުފެއްދުމުގެ މަދަނީ ބޭނުމެއް އީރާނަށް ނުއޮންނާނެ. (އެހެންކަމުން) މިއީ ނިއުކުލިޔާ ހަތިޔާރު އުފެއްދުމުގެ މަގުގައި އެޅި ބޮޑު ފިޔަވަޅެއް." އިނގިރޭސި ވިލާތުގެ ޚާރިޖިއްޔާއިން ނެރުނު ތިން ގައުމުގެ ގުޅިފައިވާ ބަޔާނުގައި ވެއެވެ.
އީރާނާއި އެމެރިކާއިން ދަނީ 2015 ވަނަ އަހަރުގެ އެއްބަސްވުމަށް އެމެރިކާ އެނބުރިއައުމާ ގުޅޭ ނުސީދާ މަޝްވަރާތައް ފާއިތުވި އެޕްރީލް މަހުއްސުރެ ކުރަމުންނެވެ. ތިންވަަނަ ފަރާތެއް މެދުވެރިވެގެން ކުރިއަށްދާ މިމަޝްވަރާތަަކާ ގުޅޭގޮތުން ދެ ފަރާތުން، އަދި މަޝްވަރާތަކުގައި ބައިވެރިވާ އެހެން ފަރާތްތަކުން އުއްމީދީ ވާހަކަތަކެއް ދޭތެރެ ދޭތެރެއިން ދެއްކި ނަމަވެސް، އަދި މިހާތަނަށް މިމަޝްވަރާތަކުން އެދެވޭ ނަތީޖާއެއް ނެރެވިފައި ނުވެއެވެ. އީރާނުން އަލަށް މިއެެޅި ފިޔަވަޅާއެކު މަޝްވަރާތަަކަށް އިތުރު އުނދަގޫތަކެއް ކުރިމަތިވާނެއެވެ.
