އަންނަ އަހަރަށް ލަފާކޮށް ސަރުކާރުން ހުށަހެޅި ބެޖެޓް ބަހުސް ރައްޔިތުންގެ މަޖިލީހުގެ މިއަދުގެ ޖަލްސާގައި ފަށްޓަވާނެއެވެ.
މިއަދުގެ ބަހުސް މަޖިލީހުގައި ފަށްޓަވާއިރު ބަޖެޓް ދިރާސާކުރެއްވުމުގެ މަސައްކަތް ބަޖެޓް ކޮމެޓީން ވަނީ ފަށްޓަވައިފައެވެ. އިއްޔެ ވަނީ މަރުކަޒީ ބޭންކް، އެމްއެމްއޭގެ ގަވަރުނަރާއި އޮޑިޓަރޖެނެރަލްގެ ލަފާވެސް ބަޖެޓަށް ހޯއްދަވައިފައެވެ. ދެ ބޭފުޅުންވެސް ވަނީ އަންނަ އަހަރުގެ ބެޖެޓާ ގުޅިގެން ބޮޑެތި ކަންބޮޑުވުންތަކެއް ފާޅުކޮށްފައެވެ.
ގަވަރުނަރު ޢަލީ ޙާޝިމް ވިދާޅުވީ އެމްއެމްއޭގެ ލަފާ ފިނޭންސް މިނިސްޓަރ އަޑުއެއްސެވިނަމަ ދައުލަތުގެ ބަޖެޓް ތައްޔާރު ކުރާނީ މިހާރު އެބަޖެޓް ހުށަހަޅާފައިވާ ގޮތަށް ނޫން ކަމަށެވެ. އެމްއެމްއޭ އިން ސިނާރިއޯ ތަކެއް ދިންނަމަވެސް ބަޖެޓް އެކުލަވާލައްވައިފައި ވަނީ އެހުރިހާ ސިނާރިއޯތަކަށް ރިޢާޔަތްކޮށްގެންނޫންކަމަށް ވެސް ގަވަރުނަރ ފާހަގަ ކުރެއްވިއެވެ.
ސަރުކާރުގެ މިހާރުގެ ޕޮލިސީތައް ކުއްލިއަކަށް ހުއްޓާލައިފިއްޔާ، އަންނަ ޝޮކް މާބޮޑުވާނެކަމަށް ބޭރުގެ މާލީ އިދާރާތަކުން ބުނެފައިވާއިރު ފިނޭންސް މިނިސްޓަރ އެއްސެވީ އެލަފާގެ އެއްބައިކަމަށް ގަވަރުނަރ ފާހަގަ ކުރެއްވިއެވެ. ގަވަރުނަރު ވިދާޅުވީ އަންނަހަރުގެ ބަޖެޓްގައި ހިމެނޭ މަޝްރޫއުތަކަކީ، ރާއްޖޭގައި މިހާރު މިއޮތް އިގްތިސާދީ ހާލަތާ ނުބައްދަލު މަޝްރޫއުތަކެއްކަމަށެވެ. މަޝްރޫޢުތަކަށް ބޭނުންވާ ބޭރުފައިސާ ކަށަވަރުކޮށްފައިވަނީ ނޫނީ މަޝްރޫޢުތައް ނުފެށުމަށްވެސް ލަފާދެއްވިއެވެ. ފައިސާ ހޯދުމުގައި ކޮންސެޝަނަލް ފައިނޭންސިން އަށް އިސްކަން ދިނުމަށް ވެސް ގަވަރުނަރ ވަނީ ލަފާދެއްވައި ފައެވެ.
ބެޖެޓް ކޮމެޓީން މިނިވަން މުއައްސަސާތަކާ ވެސް ވަނީ ބައްދަލުކޮށް ފައެވެ. ގިނަ އެމުއައްސާސާތަކުން ވިދާޅުވީ ޤާނޫނީ ޒިންމާ އަދާކުރެވޭ ވަރަށް ވެސް ބަޖެޓް ނެތް ކަމަށެވެ. ފިނޭންސް މިނިސްޓްރީން ބަޖެޓް އެކުލަވާލުމަށް ދެއްވި ލަފަޔާ އެގޮތަށް ބެޖެޓް އެކުލަވާލެއްވި ނަމަވެސް ބަޖެޓް ހުށަހެޅުމުންވެސް އެ މުއައްސަސާތަކުން ހުށަހެޅި ބަޖެޓް ކުޑަކޮށްފައިވާކަމަށެވެ.
މިމަހު 19 ގެ ނިޔަލަށް ބަޖެޓް ދިރާސާކޮށް ނިންމުމަށް ވަނީ ސުންގަޑި ކަނޑައަޅައިފި އެވެ. މިމަހު ނަވާރަ ވާ ބުރާސްފަތި ދުވަހަށް ބަޖެޓު ދިރާސާކޮށް ނިންމެވި ނަމަވެސް އެމުއްދަތަށް ބަޖެޓު ދިރާސާކޮށް ނިންމާ ނުލެވިއްޖެނަމަ ވަގުތު އިތުރުކުރުމަށް ވެސް ބަޖެޓް ކޮމެޓީން ނިންނެވިއެވެ.
ބަޖެޓު ފާސްކުރުމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ކަނޑައަޅާފައިވަނީ މިމަހުގެ 26ވަނަ ދުވަހަށެވެ. ބަޖެޓް ބަހުސަށް 21 ގަޑިއިރު ހޭދަވާނެކަމަށް ވަނީ ލަފާކުރައްވައިފައެވެ. ބަޖެޓު ދިރާސާކޮށް ހުށަހަޅާ ރިޕޯޓަށް ބަހުސް ކުރުމަށް ވެސް 10 ވަރަކަށް ގަޑިއިރު ހޭދަވާނެކަމަށް ވެސް ވަނީ ލަފާކުރައްވައިފައެވެ.
އަންނަ އަހަރަށް ލަފާކޮށް މަޖިލީހަށް ހުށަހެޅީ 34.7 ބިލިއަން ރުފިޔާގެ ބަޖެޓެކެވެ. ބަޖެޓްގެ ދެބައިކުޅައެއްބައި ދަރަނިވެރިވާނެކަމަށް ވަނީ ލަފާ ކުރައްވައިފައެވެ. ޖުމުލަ އާމްދަނީ އާއި ހިލޭ އެހީގެ ގޮތުގައި ލިބޭނެކަމަށް އަންދާޒާ ކޮށްފައިވަނީ 17.8 ބިލިއަން ރުފިޔާއެވެ.
