ކޮވިޑް 19 ގެ ސަބަބުން މުދަލުގެ އަގޮޑުކޮށް ވިއްކާ ކަމަށްވާނަމަ އެ މުދަލެއް ނަގާފައި ބަހަންވެސް ފަސްޖެހިވަޑައި ނުގަންނަވާނެ ކަމަށް އިކޮނޮމިކް މިނިސްޓަރ ފައްޔާޒް އިސްމާޢީލް ވިދާޅުވެއްޖެއެވެ.
ރާއްޖެއަށް ކާބޯތަކެތި އެތެރެކޮށްވިއްކާ ފަރާތްތަކާއި އިކޮނޮމިކް މިނިސްޓްރީ ގުޅިގެން މިހާރު ކުރިއަށްދާ ނޫސްވެރިންގެ ބައްދަލުވުމުގައި ފައްޔާޒު ވިދާޅުވީ މީހުން މުދަލުގެ އަގުބޮޑުކޮށް ވިއްކާތޯ ވަރަށް ގާތުން ބައްލަވަމުން ގެންދަވާ ކަމަށެވެ. އެގޮތުން މުދަލުގެ އަގު ކޮންޓްރޯލް ކުރަންވެއްޖެއްޔާ އެކަންވެސް ކުރައްވާނެ ކަމަށް ވިދާޅުވިއެވެ. އެހެންނަމަވެސް އަދި އެހިސާބަށް ކަންކަން ނުދާ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ޑިޓޯލްފުޅި ފަދަ އެއްޗި ބޮޑު އަގުގައި ވިއްކުމުން ގަތް އަގާއެކު މީހުން ސޯޝަލްމީޑިއާގައި އެ ދައުރު ކުރަމުންދާތަން ފެނިވަޑައިގަންނަވާ ކަމަށް ވިދާޅުވިއެވެ. އެހެންނަމަވެސް އެއީ އަގުކޮންޓްރޯލް ކޮށްފައިވާ އެއްޗެއް ނޫންކަމަށާއި، އޭއީ ގާނޫނީ ގޮތުން މަނާކަމެއްނޫން ކަމަށް ވެސް ވިދާޅުވިއެވެ. އެމީހަކު ބޭނުން އަގެއްގައި އެފަދަ އެއްޗެހި ވިއްކުމުގެ މިނިވަންކަން އެބައޮތް ކަމަށް ވެސް ވިދާޅުވިއެވެ. ވިޔަފާރި ވެރިއާއަށް އެކަން އެގޮތަށް ކުރުމުގެ ފުރުސަތު ލިބެނީ އެޖާގަ ރައްޔިތުންދޭތީ ކަމަށް ވެސް މިނިސްޓަރ ވިދާޅުވިއެވެ. ފައްޔާޒު ވިދާޅުވީ ކަންބޮޑުވާ ހިސާބަށް ނުދާ ކަމަށާއި ތަކެތި އަގުބޮޑު ކުރުމުގެ ހާލަތު އަމިއްލައަށްނުއުފެއްދުމަށް ވެސް މިނިސްޓަރ އިލްތިމާސް ކުރެއްވިއެވެ.
ތަކެތީގެ ޑީމާންޑު ބޮޑުވެ މާމައްޗަށް ކަންތައް ދާކަމަށްވާނަ ކޮންޓްރޯލް އުސޫލެއް ގާއިމް ކޮށް ކާޑެއް ތައާރަފްކޮށް އެކާޑަށް އެކަނި މުދާލީބޭގޮތް ހެދިދާނެ ކަމަށް ވެސް މިނިސްޓަރ ވިދާޅުވިއެވެ. އެހެންނަމަވެސް ރައްޔިތުންނަށް އެފަދަ ތަކުލީފެއް ޖައްސަން ސަރުކާރުން ބޭނުންނުވާ ކަމަށް ވެސް ވިދާޅުވިއެވެ. އެފަދަ ހާލަތު އުފެއްދުމުގެ ފުރުސަތު ރައްޔިތުން ނުދިނުމަށް އެމަނިކުފާނު ރައްޔިތުންނަށް ގޮވައިލެއްވިއެވެ.
މި ޕްރެސްގައި ބައިވެރިވި ކުންފުނިތަކުން ބުނެފައިވަނީ ކާބޯތަކެތީ ހުސްވިޔަ ނުދޭނެ ކަމަށެވެ. އަދި ކާބާތަކެތި ލިބުމުގައި ވެސް އެއްވެސް ދަތިކަމެއްނެތް ކަމަށް ވެސް އެމީހުން ބުންޏެވެ. އެމީހުން ބުނީ ރައްޔިތުން ހާސް ނުވުމަށާއި ޕްރޮޑްކްޝަން ނުހުއްޓޭ ކަމަށެވެ. އެހެންކަމުން ރައްޔިތުން ޕެނިކަށް ނުގޮސް ހަމަޖެހިގެން ތިބުމަށް ކުންފުނިތަކުން ބުންޏެވެ. ހޯލްސޭލް ކުރާ ފަރާތްތަކުން މުދާގަނެގެން ގޮސް އެބަލްކުކޮށްގެން އަގުބޮޑުކޮށް އެއްވެސް ބަޔަކު ވިއްކައިގެން ނުވާނެ ކަމަށާއި އެފަދަ މީހުންނާމެދު ވިޔަފާރީގެ ގުޅުން ބާއްވަން ފަސޭހައެއް ނުވާނެ ކަމަށް ވެސް ބައެއް ކުންފުނިތަކުން ބުންޏެވެ.
މިބައްދަލުވުމުގައި ހޭޕީމާކެޓު، ޔުނައިޓެޑް ފުޑުސަޕްލަޔަރ، ފެންޓަސީ ފަދަ ބޮޑެތި ކުންފުނިތަކުން ބައިވެރިއެވެ.
