ރ. މަޑުއްވަރީން އިތުރު ތިން މީހަކު ބަންދުކޮށްފި ކަމަށް ފުލުހުން ވިދާޅުވެއްޖެއެއެވެ.
މިއީ ހަރުކަށި ފިކުރާދެކޮޅަށް ފުލުހުންނާއި ކަމާބެހޭ އިދާރާތައް ގުޅިގެން އެރަށުގައި ހިންގަމުން ގެންދާ އޮޕަރޭޝަނުގެ ތެރެއިން ބަންދު ކުރި ތިންމީހުންނެވެ. އެމީހުން ބަންދު ކޮށްފައިވަނީ އިއްޔެ ކަމަށް ފުލުހުން މިއަދު ވިދާޅުވިއެވެ.
"ރ. މަޑުއްވަރީގައި ފުހުންނާއި ކަމާބެހޭ އިދާރާތަކުން ގުޅިގެން ކުރިއަށް ގެންދާ އޮޕަރޭޝަންގެ ތެރެއިން 2020 ޖެނުއަރީ 7 ވަނަ ދުވަހު 22 އަހަރުގެ ދިވެހި ފިރިހެނަކާއި 26 އަހަރުގެ ދިވެހި ފިރިހެނަކާއި 28 އަހަރުގެ ދިވެހި ފިރިހެނެއް ރ. މަޑުއްވަރިން ފުލުހުންގެ ބެލުމުގެ ދަށަށް ގެނެސްފައިވޭ،" ފުލުހުން ވިދާޅުވިއެވެ.
މީގެ ކުރިން ވެސް އެރަށުން ވަނީ ތިން މީހުން ބަންދުކޮށްފައެވެ. ހަރުކަށި ފިކުރުގެ ރާއްޖޭގައި ފަތުރާ މީހުން ގެންދަނީ އެމީހުންގެ ފަނާކުރަނިވި އެފިކުރު ފެތުރުމުގެ މަސައްކަތް ރެއާދުވާލު ކުރަމުން ކަމަށް ނެޝަނަލް ކައުންޓަރ ޓެރަރިޒަމް ސެންޓަރުން ވެސް ވަނީ ވިދާޅުވެފައެވެ. އެ ފިކުރު ފަތުރާ މީހުން ގެންދަނީ ރެއާދުވާލު އިންޓަރނެޓާއި ސޯޝަލް މީޑިއާ ބޭނުންކޮށްގެން އެފިކުރު ފަތުރަން މަސައްކަތް ކުރަމުން ކަމަށް އެސެންޓަރުން ވިދާޅުވެފައިވެއެވެ.
"ހަރުކަށި ފިކުރުތައް ފަތުރާ މީހުން ރެއާދުވާލު އިންޓަރނެޓު ވަސީލަތްތަކާއި ސޯޝަލް މީޑިއާގެ ވަސީލަތްތަކާއި ސިއްރިޔާތުގައި އެބައިމީހުންގެ ފަނާކުރަނިވި ފިކުރުތައް ފަތުރަން ގިނަގުނަ ރޭވުންތައް ރާވައި އެބައި މީހުންގެ ފިކުރު ފެތުރުމަށްޓަކައި މަސައްކަތް ކުރަމުންދެއެވެ.،" އެންސީޓީސީ އިން ވިދާޅުވެފައިވެއެވެ.
ޓެރަރިޒަމާއި ހަރުކަށި ފިކުރަކީ މުޅި އިންސާނިއްޔަތަށް ކުރިމަތިވެފައިވާ ބޮޑު ނުރައްކަލެއް ކަމަށާއި އަންނަންއޮތް ޖީލުތައް ފިކުރީގޮތުން ކުރިއަރާ ދިއުމާއި ޤައުމީ ތަރައްގީގެ ލަނޑުދަނޑިތައް ހާސިލް ކުރުމަށް އޭގެ ސަބަބުން ބޮޑެތި ގޮންޖެހުންތައް ކުރިމަތިވަމުން އަންނަ ކަމަށްވެސް އެސެންޓަރުން ވިދާޅުވެފައިވެއެވެ.
"އެހެން ކަމުން މިކަންކަމަށް އެންމެހާ ލޮބުވެތި ރައްޔިތުން ސަމާލުވެ ވަޑައިގަތުމަށް މިސެންޓަރުގެ ފަރާތުން އިލްތިމާސް ކުރަމެވެ. އެގޮތުން މިފަދަ ނުރައްކާތަކާމެދު ސަމާލުވެލައްވައި ހަރުކަށި ފިކުރު ފަތުރާ ފަރާތްތަކާ ބެހޭ މައުލޫމާތު ސަލާމަތީ ޚިދުމަތްތަކަށް ފޯރުކޮށް ދެއްވަމުން ގެންދިއުމަށް ދަންނަވަމެވެ." އެންސީޓީސީން ވިދާޅުވެފައިވެއެވެ.
އެންސީޓީސީން މި ބަޔާން މިރޭ ނެރުއްވީ އެމްއެންޑީއެފްގެ ސްޓޭޓަސް ޔެލޯ 2 އަށް ބަދަލުކޮށް ހަތިޔާރާއެކު ރާއްޖޭގެ އެކިސަރަހައްދު ތަކުގައި މިރެއިން ފެށިގެން ހަރަކާތްތެރި ވަމުން ދަނިކޮށްނެވެ.
އެމްއެންޑީއެފްގެ އެލަރޓް ސްޓޭޓަސް "ޔެލޯ 2" އަށް ބަދަލު ކުރާނީ ޤައުމުގެ ސުލްޙަ މަސަލަސްކަމާއި އަމަންއަމާންކަމަށް ބުރޫއަރާފަދަ ކަމަކާ ކުރިމަތިވާނެ ކަމަށް ބެލެވުން ނުވަތަ އެފަދަ މަޢުލޫމާތެއް ލިބުންނެވެ
