ހުއްޓިފައިވާ އިސްރާއިލް ފަލަސްތީން ސުލްހައިގެ ވާހަކަތައް އަލުން ފެށުމަށް ކުރެވޭ މަސައްކަތުގެ ދަށުން މުހިންމު ބައިނަލްއަޤްވާމީ ކޮންފަރެންސެއް ފްރާންސްގެ ވެރިރަށް ޕެރިހުގައި ފެށިގެން ކުރިއަށް އެބަދެއެވެ. ހަތްދިހަ ގައުމަކުން މިކޮންފަރެންސްގައި މަންދޫބުން ބައިވެރިވެ ، ފަލަސްތީން މަސްއަލައަށް ހުށައަލާފައިވާ ދެދައުލަތް އެކުވެވޭ ހައްލު ތަންފީޒުކުރުމަށް ތާއީދު ކުރާނެކަމަށް ޚަބަރުތައް ބުނެފައިވެއެވެ. ޕެރިސް ކޮންފަރެންސަށް ފަލަސްތީންގެ އިސްއޮފިޝަލުން ތާއީތު ކުރައްވާފައިވީނަމަވެސް އިސްރާއިލުންވަނީ ކޮންފަރެންސްގައި ބައިވެރިނުވާނެ ކަމަށް ބުނެފައެވެ . އިސްރާއިލުންބުނެފައިވަނީ މި ކޮންފަރެންސަކީ ވަކިއަތަކަށް ޖެހިފައިވާ ކޮންފަރެންސެއް ކަމުގައެވެ . މިކޮންފަރެންސްގައި ބައިވެރިވެ މަޝްވަރާތައް އަޑުއެހުމަށް އިސްރާއިލް އަދި ފަލަސްތީންގެ އިސްއޮފިޝަލުންނަށް ދައުވަތު ދީފައިވީނަމަވެސް އެންމެފަހުގެ ނިންމުންތައް ނިންމުމުގައި ފަލަސްތީން އަދި އިސްރާއިލްގެ ދައުރެއް ނޯންނާނެ ކަމަށް ޚަބަރުތައްބުނެއެވެ.
ފަލަސްތީންގެ ސުލްހައިގެ ވާހަކަތަކުގެ ބުރެއް އެންމެ ފަހުން ބާއްވާފައިވަނީ ދެހާސް ސާދަވަނަ އަހަރުގެ އެޕްރިލްމަހުގެތެރޭގައެވެ.
ހިފާފައިވާ ސަރަހައްދުތަކުގައި އިސްރާއިލުން އިތުރު ގެތައް އަޅަމުން ގެންދާ ގެންދިއުން ކުށްވެރިކޮށް އަލިފުދާލުން މިދިޔަމަހު ގަރާރެއް ފާސްކުރައްވާފައިވާތީ އިސްރާއިލަށް ބައިނަލްއަޤވާމީ މުޖްތަމިއުގެ ނުރުހުމުގެ ނަޒަރު އަނެއްކާވެސްވަނީ އަމާޒުވެފައެވެ. މިޤަރާރު ފާސްކުރުމުގައި ރައިސް އޮބާމާގެ ސަރުކާރުގެ ދައުރެއް އޮތްކަމަށް އިސްރާއިލުން ބުނި ނަމަވެސް ވައިޓްހައުސްއިންވަނީ އެކަން ދޮގުކޮށްފައެވެ.
