ހަރުކަށި ފިކުރަކީ ކޮބައިކަމާއި ހަރުކަށި ފިކުރު ދެނެގަންނާނެ ގޮތް ނެޝަނަލް ކައުންޓަރ ޓެރެރިޒަމް ސެންޓަރ (އެންސީޓިސީ) އިން އާއްމުކޮށްފި އެވެ.
އެންސީޓީސީން މިއަދު އާންމުކޮށްފައިވާ ގޮތުގައި ހަރުކަށި ފިކުރަކީ ޤާނޫނުއަސާސީގެ ރޫޙާއި ޤާނޫނީ ހަމަތަކާއި، އާންމު އިޖްތިމާޢީ އުޞޫލުތަކަށް ބަހާއި އަމަލުން އިންކާރުކޮށް، އެކަންކަމާ ދެކޮޅަށް ވަކާލާތު ކުރުމުގައި ހަރުކަށިވެ، އަނިޔާވެރިވުމާއި، އިހާނެތިކޮށް ހިތުމުގެ ފިކުރެވެ.
ހަރުކަށި ފިކުރުގެ ތަފަޞީލް ހާމަކުރައްވަމުން އެންސީޓީސީއިން ހާމަކޮށްފައިވާ ގޮތުގައި ހަރުކަށި ފިކުރަކީ އެތަނެއްގެ ޘަޤާފަތާއި، ޒަމާންވީ އާދަކާދަތަކާއި، ހަމަތަކާ އުސޫލުތަކުގެ މައްޗަށް ބިނާވެގެންވާ ސާފު ސީދާ މަގުން އެއްކިބާވެ، އެތަނެއްގައި އޮންނަ ޤާނޫނާއި ޤަވާޢިދުތަކުގެ އިންތަކުން ބޭރުވެ ތިބެ، އެބައެއްގެ ފިކުރަށް ތަބާވާ މީހުން ފިޔަވައި އެހެން މުސްލިމުންނަކީ މުސްލިމުން ނޫން ކަމަށް ބުނެ، އެގޮތަށް ދެއްކުމަށް މަސައްކަތްކުރުމެވެ. އަދި ރައްޔިތުންގެ މުދަލުން ވައްކަން ކުރުމާއި ފޭރުން އެއީ ހުއްދަ ކަމެއް ކަމުގައި ބުނެ އެކަމަށް ވަކާލާތުކޮށް، މީސްތަކުންނަށް އިހާނެތިކޮށް ހިތާ އަނިޔާވެރިވުމެވެ. މީގެ އިތުރުން މީހުންގެ ފުރާނައާއި މުދަލަށް ގެއްލުން ދިނުމަކީ ލާޒިމް ކަމެއް ކަމަށް ދައްކުވައިދީ، އެކަންކަން އެ ގޮތަށް ކުރުމަށް ހިތްވަރުދީ އެކަންކަން އެގޮތަށް ކުރުމުގެ ފިކުރަކީވެސް އަރުކަށި ފިކުރެވެ.
އެންސީޓީސީ ހާމަކޮށްފައިވާ ހަރުކަށި ފިކުރުގެ މީހުން ދެނެގަންނާނެ ގޮތް:-
1- ހަރުކަށި ފިކުރަށް ތަބާވާ މީހުން ފިޔަވައި އެހެން މުސްލިމުންނަކީ ޠާޢޫތުން ކަމަށާ މުސްލިމުން ނޫން ކަމަށް ބުނެ، އެގޮތަށް ދެއްކުމަށް މަސައްކަތްކޮށް، ރައްޔިތުންގެ މުދަލުން ވައްކަން ކުރުމާއި ފޭރުމަކީ ހުއްދަ ކަމެއް ކަމުގައި ބުނެ އެކަމަށް ވަކާލާތުކޮށް، މީސްތަކުންނަށް އިހާނެތިކޮށް ހިތާ އަނިޔާވެރިވެ، މީހުންގެ ފުރާނަޔާއި މުދަލަށް ގެއްލުން ދިނުމަކީ ލާޒިމް ކަމެއް ކަމަށް ދައްކުވައިދީ، އެކަންކަން އެގޮތަށް ކުރުމަށް ހިތްވަރުދީ އެކަންކަން އެގޮތަށް ކުރާ މީހުންނެވެ.
2- ދިވެހި ދައުލަތަކީ ކުފުރުގެ ދައުލަތެއް ކަމަށް ބުނެ، އެކަމަށް ވަކާލާތުކޮށް ދިވެހި ޤައުމިއްޔަތަށް އިންކާރު ކުރާ މީހުންނެވެ.
3- ދިވެހިރާއްޖޭގެ ޤާނޫނުއަސާސީއަކީ ބާތިލް އެއްޗެއް ކަމަށް ބުނެ، އެކަން އެގޮތަށް ދެއްކުމަށް ވަކާލާތުކޮށް، ދިވެހިރާއްޖޭގެ އެންމެހާ ޤާނޫނުތަކާއި ޤަވާއިދުތަކާއި އުޞޫލުތަކަށް ޚިލާފުވެ، ދިވެހި ޘަޤާފަތާއި ޒަމާންވީ އާދާކާދަތަކަށް އިންކާރުކޮށް ދިވެހި މުޖްތަމަޢުގެ އެއްބައިވަންތަކަން ގެއްލުވާލައި، މުޖްތަމަޢު ބައިބައިކުރަން މަސައްކަތްކުރާ މީހުންނެވެ.
އެގޮތުން އެފަދަ މީހުންގެ ޢަމަލުތައް ހުންނާނެ ގޮތްވެސް އެންސީޓީސީ އިން ވަނީ ހާމަ ކޮށްފައެވެ.
އެކަންކަމުގެ ތެރޭގައި ހިމެނެނީ:-
(ހ) ޤައުމީ ދިދަ އާއި ދިވެހި ދައުލަތުގެ ނިޝާނާއި، ޤައުމީ ސަލާމް ބަލައިނުގަތުން.
(ށ) ސުކޫލްތަކުގެ ޤައުމީ ތައުލީމީ މަންހަޖުތައް ބަލައިނުގަތުމާއި، ދަރިވަރުން ސުކޫލަށް ހާޒިރުނުކުރުން.
(ނ) މި ފިކުރަށް މަގުފަހިވާ ގޮތަށް ވަކާލާތު ކުރުން.
(ރ) ބައިނަލްއަޤްވާމީ ޞިއްހީ މިންގަނޑުތަކުން ކުދިން މަހުރޫމް ކުރުމާއި، ދިވެހިރާއްޖޭގެ އަންނަން އޮތް ޖީލަށް ނުރައްކާވާފަދަ ފަނާކުރަނިވި ވިސްނުން ކުރިއަރުވާ ފެތުރުން.
(ބ) އިންސާނީ ޙައްޤުތަކަށް ބެލުމެއްނެތި އަންހެންނާއި، ކުޑަކުދިން ނިކަމެތިކޮށް، ކައިވެނި ކުރުވިކަމަށް ބުނެ، ތުއްތު ކުދިންނަށް ޖިންސީ ގޯނާ ކުރުން. ހިމެނެއެވެ.
