ރ. މަޑުއްވަރީގައި ޙަރަކާތްތެރިވާ ހަރުކަށި ފިކުރުގެ މީހުން ހޯދުމަށް ފުލުހުންނާއި ސިފައިން ގުޅިގެން މިއަދު ފެށި ޚާއްސަ އޮޕަރޭޝަނުގައި މިހާތަނަށް ދެމީހަކު ބަންދު ކޮށްފި ކަމަށް ފުލުހުން ވިދާޅުވެއްޖެއެވެ.
މި އޮޕަރޭޝަނުގައި ފުރަތަމަ ބަންދުކޮށްފައިވަނީ ޢުމުރުން 30 އަހަރުގެ ފިރިހެނެކެވެ. ދެވަނައަށް ބަންދުކޮށްފައިވަނީ ޢުމުރުން 34 އަހަރުގެ މީހެކެވެ. އެމީހާ ބަންދުކުރީ މިއަދު ހަވީރު 6:04 ގައި ކަމަށް ފުލުހުން ވިދާޅުވިއެވެ. އެހެންނަމަވެސް މި ދެމީހުންނާ ބެހޭ އިތުރު އެއްވެސް ތަފްސީލެއް ފުލުހުން ނުދެއްވައެވެ.
މިއީ އެރަށުގައި ހަރުކަށި ފިކުރުފަތުރައި ދައުލަތުގެ އާއްމު ނިޒާމުން ބޭރުވެ ވަކިޖަމާއަތްތައް ހަދައިގެން ޓެރަރިސްޓް ޖަމާއަތްތަކުން ހިންގާ ޓެރަރިޒަމް ދިފާއުކޮށް ހެދުމާއި އަންހެނުންނާއި ކުޑަކުދިންނަށް ލިބެންވާ ހައްގުތަކުން އެމީހުން މަހުރޫމް ކުރުން ފަދަ އަމަލު ހިންގަމުންދާ ބަޔަކު އެރަށުގައި އުޅާކަމަށް ލިބުނު މަޢުލޫމާތަކާ ގުޅިގެން ފަށައިފައިވާ އޮޕަރޭޝަނެކެވެ.
މި އޮފަރޭޝަނުގައި ފުލުހުން ގެންދަނީ އެފަދަ މީހުން އުޅޭ ކަމަށް މަޢުލޫމާތު ލިބިފައިވާ ގެތައް ބަލައި ފާސްކުރަމުންނެވެ. އޮޕަރޭޝަން ކުރިއަށްދާއިރުވެސް ޤާނޫނީ ގޮތުން ފިޔަވަޅު އަޅަންޖެހޭ ފަރާތްތަކާ މެދު ފިޔަފަޅު އަޅަމުން ގެންދާނެ ކަމަށް ފުލުހުން ވަނީ ވިދާޅުވެފައެވެ.
އެފަދަ ފިކުރުގެ މީހުންވަނީ ކުޑަކުދިންނަށް ކޮންމެހެން ދޭންޖެހޭ ވެކްސިން ދިނުމަށް ވެސް ދެކޮޅުހަދައިފައެވެ. އަދި ތައުލީމް ދިނުމުން ވެސް އެކުދިން މަހުރޫމުކޮށް ގޭ ބަންދުކޮށްގެން ގެންގުޅޭ ކަމުގެ މަޢުލޫމާތު ވަނީ ލިބިފައެވެ.
