ކީރިތި ރަސޫލާގެ ހަޔާތްޕުޅުން ޢިބްރަތް ހާސިލުކޮށް، އެއްބައިވަންތަކަމާއި ހަމަހަމަކަމުގެ ޢުޞޫލުތަކަށް ޙުރްމަތްތެރިކޮށްހިއްތަވައި، އަޅުގަނޑުމެންގެ މެދުގައިވާ އުޚުއްވަތްތެރިކަމުގެ ގުޅުން އިތުރަށް ބަދަހިކޮށް، ޞުލްޙަމަޞްލަޙަތު ދެމެހެއްޓުމުގެ މަތިވެރި ޢަޒުމް އިތުރަށް ވަރުގަދަ ކުރަންޖެހޭ ކަމަށް މޯލްޑިވްސް ރިފޯމް މޫވްމަންޓް (އެމްއާރުއެމް) އިން ބުނެފިއެވެ.
އެޕާޓީން މިހެން ބުނެފައިވަނީ ކީރިތި ރަސޫލާގެ ޢީދުމީލާދު ދުވަހުގެ އުފާފާޅުކޮށް ނެރެފައިވާ ބަޔާނެއްގައެވެ.
"މިއަދަކީ، މިއަހަރުގެ ބަރަކާތްތެރި ރަބީޢުލްއައްވަލް މަހުގެ ބާރަވަނަ ދުވަހެވެ. މިއުންމަތުގެ މާތް ނަބިއްޔާ محمّد رسول اللّه صلّى اللّه عليه وسلّم ދުނިޔޭގެ އަލިކަން ދެކިވަޑައިގެން ދުވަހުގެ ގޮތުގައި އެންމެހައި މުސްލިމުން އުފާފާޅުކުރާ ދުވަހެވެ. އެމް.އާރް.އެމް ގެ ފަރާތުން މިބަރަކާތްތެރި ދުވަހުގެ ތަހުނިޔާ އެންމެހާ ދިވެހި ލޮބުވެތި ރައްޔިތުންނަށް ފޮނުވަމެވެ." އެ ބަޔާނުގައިވެއެވެ.
މިދުވަސް ފާހަގަ ކުރުމުގެ ބޭނުމަކީ ކީރިތި ރަސޫލާގެ ވަސްމީރު ޒިކުރާއިން ޢިބްރަތްތެރި ފިލާވަޅުތަކެއް ޙާޞިލް ކުރުން ކަމަށް ވެސް އެބަޔާނުގައި ބުނެފައިވެއެވެ. އަދި އެކަލޭގެފާނު ގެނެސްދެއްވި މަތިވެރި ހިދާޔަތުގައި އަބަދުމެ ހިފެހެއްޓުމުގެ عزم އާކޮށް އާލާކުރުމާއި އެކަލޭގެފާނުގެ މަތިވެރި ޚުލްގުފުޅާއި ގެންގުޅުއްވި މާތް ރީތި އުޞޫލުތައް ޢަމަލީ ގޮތުން ނަމޫނާއަކަށް ބެލުން ކަމަށް އެބަޔާނުގައިވެއެވެ.
"ކީރިތި ރަސޫލާގެ މަތިވެރި ސީރަތްފުޅަށް ނަޒަރު ހިންގާލައިފިނަމަ، އެކަލޭގެފާނުގެ އެންމެ ޚާއްސަ ސިފަފުޅަކީ، އޯގާތެރިކަމުގެ ނުވަތަ ރަޙުމަތުގެ ނުވަތަ އެންމެންނަށްވެސް ރަޙުމް ކުރެއްވުމުގެ މާތް ސިފަފުޅުކަން ސާބިތުވެގެން ދެއެވެ. އެކަލޭގެފާނު އެންމެންނަށް އޯގާތެރިވެ ވަޑައިގަތެވެ. އެންމެންނަށް ރަޙުމް ކުރެއްވިއެވެ. އެކަލޭގެފާނުގެ އަނބިއަނބިކަނބަލުންނަށާއި، ބޭފުޅުންނަށާއި، ގާތްތިމާގެ ބޭފުޅުންނަށެވެ. އަޞްޙާބު ބޭކަލުންނަށެވެ. ދެނެވަޑައިގަންނަވާ މީހުންނަށާއި ދެނެވަޑައިނުގަންނަވާ މީހުންނަށެވެ. އަދި އެއްވެސް މީހަކާމެދު ހިތްޕުޅު ނުބައެއް ނުކުރައްވައެވެ. އެއްވެސް މީހަކަށް ކުޑައިމިސް ބަސްފުޅެއް ވިދާޅެއް ނުވެއެވެ. "
ރަސޫލާގެ ޢީދުމީލާތު މިއަދު ފާހަގަކުރަމުންދާއިރު އެންމެ އިސްކަން ދޭންވީ ކަމަކީ، އެކަލޭގެފާނު ކޮންމެ ކަމެއްގައިވެސް ދައްކަވާފައިވާ މަތިވެރި ނަމޫނާއަށް ތަބާވެ ޢަމަލުކުރުން ކަމަށްވެސް ބުނެފައިވެއެވެ. ވަކިން ޚާއްސަކޮށް އެންމެންނާމެދުވެސް އެކަލޭގެފާނު ގެންގުޅުއްވި މާތް ރީތި ގޮތްތައް ދަސްކުރުމެވެ. އަޅުގަނޑުމެންނަކީ އެންމެންނަށްވެސް އޯގާތެރިވާ އެންމެންނަށްވެސް ރަޙުމްކުރާ، އެންމެންނަށްވެސް ކަމޭހިތާ، އެއްވެސް މީހަކާމެދު ކުޑައިމިސް ބަހެއް ނުބުނާ އިޙުސާންތެރޮ ބަޔަކަށް ވޭތޯ ގަދައަޅައި މަސައްކަތް ކުރުމަށް ވެސް އެބަޔާނުގައި އެދިފައިވެއެވެ.
