ރާއްޖޭގެ އުތުރާއި މެދާއި ދެކުނުގެ އަތޮޅުތަކުގެ ރަށްރަށަށް އުދައަރައިފާނެ ކަމަށް ލަފާކޮށް މެޓު އޮފީހުން ވައިޓް އެލޭޓް މިއަދު ނެރެފިއެވެ. އުދައަރައިފާނެ ކަމަށް ލަފާކޮށްފައިވަނީ މެންދުރުފަހު 1:00 އާއި 5:00 ދެމެދުގައެވެ. އިއްޔެވެސް ވަނީ ބައެއް ރަށްރަށަށް އުދަ އަރައިފައެވެ.
ރާއްޖޭގެ އާއްމު މޫސުމަށް ބަލާއިރު ރާއްޖޭގެ އެކިހިސާބަށް ގުގުރުމާއެކު ވިއްސާރަކުރާނެއެވެ. އަދި އުތުރާއި މެދު ތެރޭގެ ބައެއް ރަށްތަކަށް ބޯކޮށް ވާރޭވެހުންވެސް އެކަށީގެންވާ ކަމަށްވެސް މެޓުން ލަފާކޮށްފައިވެއެވެ.
ދެކުނުގެ އަތޮޅުތަކަށް އިރާއި އިރުދެކުނުން ގަޑިއަކު 3 މޭލާއި 13 މޭލާ ދެމެދުގެ ބާރު މިނުގައި ވައި ޖެހޭނެ ކަމަށާއި އެހެން ހިސާބުތަކަށް އުތުރާއި އިރު އުތުރުން ގަޑިއަކު 8 މޭލާއި 18 މޭލާ ދެމެދުގެ ބާރު މިނުގައި ވައި ޖެހޭނެއެވެ. ވިލާގަނޑުގައި ގަޑިއަކު ގާތްގަނޑަކަށް 35 މޭލުގެ ބާރުމިނަށް ވައިގަދަވުން އެކަށީގެންވާ ކަމަށްވެސް މެޓުން ވިދާޅުވެފައިވެއެވެ.
ދެކުނުގެ އަތޮޅުތަކުގެ ކަނޑުތައް އާދައިގެ ވަރަކަށް މަޑުވާނެ ކަމަށާއި އެހެން ހިސާބު ތަކުގެ ކަނޑުތައް އާދައިގެ ވަރަކަށް ގަދަ ވެފައި ވިލާގަނޑުގައި ގަދަ ވާނެއެވެ.
