މާލޭގައިހުރި ކެމިކަލް ގުދަންތައްވަނީ ވަރަށްފަހުންވެސް ބަލައި ޗެކްކޮށްފައި ކަމަށް އެމްއެންޑީއެފް ފަޔަރ އެންޑް ރެސްކިއު ސާވިސްގެ ކޮމާންޑަރ ކާނަލް ޢަބްދުﷲ އިބްރާހީމް ވިދާޅުވެއްޖެއެވެ. އޭނާ ވިދާޅުވީ ދޭތެރެދޭތެރެއިން ކެމިކަލް ގުދަންތައް ޗެކު ކުރުމަކީ އެމްއެންޑީއެފުން ކުރައްވާ ކަމެއް ކަމަށެވެ. އެގޮތުން އެފަދަ ގުދަންތައް މީހުން އުޅޭހިސާބުގައި ނުވަތަ ގޭގައި ބެހެއްޓުމުގެ ނުރައްކާތެރިކަން އެނގޭތީ އެކަމަށް ޙައްލެއް އޮތްތޯ ބެލުމަށް ސަރުކާރާ ގުޅިގެން މަސައްކަތް ކުރައްވަމުން ގެންދަވާ ކަމަށް ވެސް އޭނާ ވިދާޅުވިއެވެ. އެއެއްޗެހި ރައްކާތެރިކޮށް ބެލެހެއްޓޭނެ ގޮތެއް ހޯދައިދީފައި ނޫނީ އެ އެއްޗެހި ބޭރުކުރެވެން ނޯންނަ ކަށްވެސް ޢަބްދުﷲ ވިދާޅުވިއެވެ.
ކެމިކަލް ގުދަނެއްގައި ރޯވެ މިރޭހިނގި އަލިފާނުގެ ހާދިސާގައިވަނީ އެކަކު މަރުވެފައެވެ.
ޢަބްދުﷲ ވިދާޅުވީ ސައިކަލްތައް ޕާކޮށްފައި ހުރުމުހގެ ސަބަބުން އަލިފާން ރޯވި ސަރަޙައްދަށް ދާން އެމްއެންޑީއަށް ދަތިވި ކަމަށްވެސް ވިދާޅުވިއެވެ. އަލިފާން ނިއްވަން ފެށުމާއެކު އިތުރު ގެއެއްގައި އަލިފާން ރޯވެފައި ނުވާ ކަމުގެ ޔަޤީންކްވެސްދެއްވާ ކަމަށް ވެސް އޭނާ ވިދާޅުވިއެވެ.
