ރިލްވާން މަރާ ގުޅޭ ރިޕޯރޓްގެ މަސައްކަތްކުރުމަށް ސަލާމަތީ ޚިދުމަތްތަކާ ބެހޭ ކޮމެޓީ (241ކޮމެޓީ)ގެ މެމްބަރުން ޗުއްޓީއަށް ވަޑައިނުގެން މަސައްކަތްކޮށްދެއްވުމަށް ރައްޔިތުންގެ މަޖިލީހުގެ ރައީސް، ކުރީގެ ރައީސް މުޙައްމަދު ނަޝީދު އެދިވަޑައިގެންފިއެވެ. އެމައްސަލައަކީ ސީރިއަސް މައްސަލައަކަށް ވުމުން މިސެޕްޓެމްބަރމަހު އެމަސައްކަތުގައި 241 ކޮމެޓީގެ މެމްބަރުން އުޅުއްވުމަށް ރައީސް ނަޝީދު އެދިވަޑައިގެންނެވިއެވެ. އަދި އެމަސައްކަތުގައި އެކޮމެޓީގެ މެމްބަރުން އެއްބާރުލުން ވަރަށް ބޭނުންފުޅުވާ ކަމަށްވެސް މަޖިލީހުގެ ރައީސް ވިދާޅުވިއެވެ.
މިއަދުގެ ޖަލްސާއަކީ ރައްޔިތުންގެ މަޖިލީހުގެ މިދައުރުގެ އެންމެ ފަހު ޖަލްސާ އެވެ. ޖަލްސާ ފަށްޓަވަމުން މަޖިލީހުގެ ރައީސް ވިދާޅުވީ މިއަދަށްފަހު މެމްބަރުން ޗުއްޓީއަށް ވަޑައިގެންނެވި ނަމަވެސް ދައުރު ނުނިންމަވައި ބޭއްވުމަށް ގަސްތު ކުރައްވާ ކަމުގައެވެ. އެއީ ޗުއްޓީ ތެރޭގައިވެސް މަޖިލީހުގެ ޖަލްސާއެއް ބާއްވަން ޖެހިދާނެތީ ކަމަށް އެމަނިކުފާނު ވިދާޅުވިއެވެ.
ނޫސްވެރިޔާ ރިލްވާން ޢަބްދުﷲގެ މަރާގުޅޭ ރިޕޯރޓު މަޖިލީހަށް ހުށަހެޅި ބަހުސްގެ މަރުޙަލާވަނީ ގެންގޮސްފައެވެ. ރިޕޯރޓްގައި ފާހަގަ ކޮށްފައިވާ މައްސަލަތަކާ ގުޅިގެން، ހުށަހެޅުންތަކެއް ހުށަހެޅި ވަނީ ތާއީދުވެސް ލިބިފައެވެ.
ތުޅާދޫ ދާއިރާގެ މެމްބަރ ޙިސާން ޙުސައިން ވަނީ މިމައްސަލައިގައި ތިން ހުށަހެޅުއްވުމެއް ހުށަހެޅުއްވައިފައެވެ. ފުރަތަމަ ހުށަހެޅުއްވުމަކީ ގެއްލުވާލާފައިވާ މީހުންނާއި ގޮތް ނޭނގޭ މަރުތަކުގެ މައްސަލަ ބަލާ ރިޔާސީ ކޮމިޝަނުންގެ ރިޕޯރޓް ދިރާސާކުރުމަށްފަހު ފުލުހުންގެ ޤާނޫނާއި ކަމާބެހޭ އެހެން ޤާނޫނުތައް ދިރާސާކޮށް އެ ޤާނޫނުތަކަށް ގެންނަންޖެހޭ އިޞްލާހޫތައް ފާހަގަކޮށް އެ އިސްލާޙުތައް ގެނައުމެވެ. ދެވަނަ ހުށަހެޅުމަކީ ރިޕޯރޓްގައި ފާހަގަކޮށްފައިވާ މައްސަލަތައް ބެލުމަށްޓަކައި އެކަމަށް ޚާއްޞަ އިޖުރާތުތައް ކަނޑައަޅައި އެ އިޖްރާތުތައް ޤާނޫނެއްގެ ސިފައެއްގައި ގެނައުމެވެ. ތިން ވަނަ ހުށަހެޅުމަކީ ރިޕޯރޓްގައި ފާހަގަކޮށްފައިވާ މައްސަލަތައް ކުރިއަށްދާގޮތް ބަލާ އެކަން ދިރާސާކުރުމަށް ދައުލަތުގެ ކަމާބެހޭ އެންމެހާ މުއައްސަސާތައް ހިމެނޭ ގޮތަށް ޓާސްކްފޯހެއް ރައްޔިތުންގެ މަޖިލީހުގެ ފަރާތުން އެކުލަވާލެއްވުމެވެ. މިހުށަހެޅުންތަކަށް ފޭދޫ ދާއިރާގެ މެމްބަރ މުޙައްމަދު ނިހާދު ވަނީ ތާއީދު ކުރައްވައިފައެވެ. މިއަދު ބާއްވާ މަޖިލީހުގެ ޖަލްސާގައި މިމައްސަލައާ މެދު ގޮތެއް ނިންމަވާނެއެވެ.
މަޖިލީހުގެ ޤައިދުގައި ބުނާ ގޮތުން ދައުރު ނިންމާ ރައްޔިތުންގެ މަޖިލީހުގެ މެމްބަރުން ޗުއްޓީއަށް ދާންޖެހެނީ މިދިޔަ އޯގަސްޓް މަހުގެ 29 ވަނަ ދުވަހުން ފެށިގެންނެވެ. ނަމަވެސް މުހިންމު މަސައްކަތްތަކެއް ހުރުމުން ޗުއްޓީން އެއްހަފާތާގައި މަސައްކަތް ކުރުމަށް މެމްބަރުން ނިންމައިގެން މިހަފްތާގައި މަސައްކަތް ކުރިއަށް ގެންދެވީއެވެ. މިއަދުގެ އެޖެންޑާގައި ހިމެނޭ މަސައްކަތްތައް ނިންމުމަށް ޖަލްސާ ވަގުތު ދިގުކުރުމަށްވެސް މެމްބަރުން މިއަދުގެ ޖަލްސާގައި ވަނީ ފާސްކުރައްވައިފައެވެ.
