ރޭ ނިމުނު ކްރިކެޓް ވޯލްޑްކަޕް 2019 ގެ ޗެޕްޕިއަންކަން އިނގިރޭސިވިލާތުން ހޯދައިފިއެވެ. ފައިނަލް މެޗުގައި ބައްދަލު ކުރީ އިނގިރޭސިވިލާތާއި ނިވް ޒޭލަންޑެވެ. މެޗުގެ އާއްމު ކުޅުން ނިމުނީ ދެ ޓީމު އެއްވަރު ވެގެންނެވެ. ފުރަތަމަ ކުޅުނީ ނިވް ޒީލަންޑެވެ. އެ ޓީމުން 50 އޯވަރުގެ ތެރޭގައި 8 ވިކެޓަށް 241 ލަނޑު ހެދިއެވެ. ޖަވާބުގައި ކުޅެން އަރައި އެންމެން ނުބައި ވެގެން އިނގިރޭސިވިލާތަށްވެސް ހެދުނީ 241 ލަނޑެވެ.
ދެ ޓީމު އެއްވަރު ވުމުގެ ސަބަބުން ދެން އޮތީ ސުޕަރއޯވަރެވެ. ކޮންމެ ޓީމަކުން އެއް އޯވަރު އުކީއެވެ. ފުރަތަމަ އުކީ ނިވް ޒީލަންޑުންނެވެ. އެ އޯވަރުގައި އިނގިރޭސިވިލާތުން 15 ލަނޑު ހެދިއެވެ. ޖަވާބުގައި ކުޅެން އަރައި ނިވް ޒީލަންޑަށް ހެދުނީ 15 ލަނޑެވެ. އޯވަރުގެ އެންމެ ފަހު ބޯޅައިން ނިވް ޒީލަންޑަށް އޮތީ 2 ލަނޑު ހަދަން ޖެހިފައެވެ. އެ ޓީމުގެ ގުޕްޓިލް ބޯޅަ ޖަހާފައި ދުއްވައިގަތެވެ. އެއް ލަނޑު ހަދާފައި މޮޅުވާން ބޭނުން ނަމަ ދެވަނަ ލަނޑު ހަދަން ނުދުވެ ފަރު ޖެއްސޭނޭ އެއްވެސް ގޮތެއް ނެތެވެ. އެހެންވީމާ ދުއްވައިގަތީއެވެ. އެ ލަނޑު ފުރިހަމަ ނުކުރެވި އޭނާ ރަންއައުޓް ވީއެވެ. އެހެންވީމާ ސުޕަރ އޯވަރުވެސް އެއްވަރުވީއެވެ. ނަތީޖާ ނެރުނީ މެޗުގައި ޖެހި ބައުންޑަރީއަށް ބަލައިފައެވެ. ގިނަ ބައުންޑަރީ ޖަހާފައި އޮތީ އިނގިރޭސި ޓީމުންނެވެ.
މިއީ އިނގިރޭސިވިލާތަށް ކްރިކެޓްގެ ދުނިޔޭގެ ތަށި ލިބުނު ފުރަތަމަ ފަހަރެވެ.
ރޭގެ މެޗުގެ މޮޅު ކުޅުންތެރިއަކަށް ހޮވުނީ އިނގިރޭސިވިލާތުގެ ބެން ސްޓޯކްސް އެވެ. މުޅި މުބާރާތުގެ އެންމެ މޮޅު ކުޅުންތެރިއަކަށް ހޮވުނީ ނިވް ޒީލަންޑްގެ ކެޕްޓަން ކޭން ވިލިއަމްސަން އެވެ.
