ޢުމުރުން ދުވަސްވީ މީހުންނަށް ދޭ މާލީ އިނާޔަތް ނާޖާއިޒް ގޮތުގައި ބޭނުންކުރަމުންދާކަމަށް ކަމާބެހޭ މުއައްސަސާތަކުން ހާމަކުރައްވައިފިއެވެ. ކަމާ ބެހޭ މުއައްސަސާ ތަކުން މިކަން ހާމަކުރެއްވީ ޢުމުރުން ދުވަސްވީ މީހުންނަށް ކުރާ އަނިޔާތަކާ ދެކޮޅަށް ހޭލުންތެރި ކުރުވުމަށް ބޭއްވި ޕެނަލް ޑިސްކަޝަންނެއްގައެވެ. މިއީ ބައިނަލް އަޤްވާމީ ގޮތުން ފާހަގަކުރާ، ދުވަސްވީ މީހުންނަށް ކުރާ އަނީޔާތަކާ ދެކޮޅަށް ހޭލުންތެރި ކުރުމުގެ ދުވަސް ފާހަގަ ކުރުމަށް ޖެންޑަރ މިނިސްޓްރީއާއި ޤައުމީ ޔުނިވަރސިޓީ ގުޅިގެން ބޭއްވި ޕެނަލް ޑިސްކަޝަނެކެވެ.
ޕެނަލިސްޓުންގެ ތެރެއިން ޖެންޑަރ މިނިސްޓްރީން ބައިވެރި ވަޑައިގެންނެވި ޢަބްދުﷲ އަޝްރަފު ވިދާޅުވީ ޢުމުރުން ދުވަސްވީ މީހުންނާ މެދު ހިންގޭ ކޮންމެ ނޭދެވޭ ޢަމަލަކީ އަނިޔާއެއް ކަމުގައެވެ. އަނިޔާގެ ގޮތުގައި ރިޕޯރޓް ކުރެވޭ މައްސަލަތަކުގެ ތެރޭގައި ޖިސްމާނީ، ޖިންސީ، ނަފްސާނީ، އަދި އިހްމާލުވުމުގެ މައްސަލަ ތަކުގެ އިތުރުން މާލީ މައްސަލަތައްވެސް ރިޕޯރޓް ކުރެވެމުންދާކަމަށް ވިދާޅުވިއެވެ. މާލީ މައްސަލަތަކުގެ ގޮތުގައި ޖެންޑަރ މިނިސްޓްރީން ފާހަގަކުރެއްވީ ޢުމުރުން ދުވަސް ވީމީހުންނަށް ދޭ ދައުލަތުން ކޮންމެ މަހަކުދޭ 5000 ރުފިޔާގެ މާލީ އިނާޔަތުގެ މައްސަލަތަކެވެ.
ހިއުމަން ރައިޓްސް ކޮމިޝަންގެ މެމްބަރ ޝިފާނާ ވިދާޅުވީ ޢުމުރުން ދުވަސް ވީމީހުންނަށް ލިބޭ މާލީ އިނާޔަތަކީ އެފަދަ މީހުން ބަލަހައްޓާ މީހުންނަށް ލިބެންޖެހޭ އެއްޗެއްގެ ގޮތުގައި ވެސް ބައެއް ފަރާތްތަކުން ދެކެމުންދާކަމުގައެވެ. މާލީ އިނާޔަތާ ހެދި އާއިލާގެ ތެރޭގައި އަރައިރުންވެ މަސްލަހަތު ގެއްލޭ ހިސާބަށް ކަންތައްތައް ދާކަންވެސް އޭނާ ފާހަގަކުރެއްވިއެވެ. މިފަދަ ކަންތައްތަކާ ހެދި ޢުމުރުން ދުވަސްވީ މީހުންނަށް ނަފްސާނީ މައްސަލަތަކާވެސް ކުރިމަތިލާން ޖެހޭކަން ޝިފާނާ ފާހަގަކުރެއްވިއެވެ.
ޢުމުރުން ދުވަސްވީމީހުންނަށް ކުރާ އަނިޔާގެ މައްސަލަ ތަކުގެ ތެރެއިން ހިއުމަންރައިޓްސް ކޮމިޝަނަށްވެސް އެންމެ ގިނަ އަދަދަކަށް ހުށަހެޅެނީ އިހުމާލު ވުމުގެ މައްސަލައެވެ. އާއިލާގެ ފަރާތުން ބަލާނެ ބަލަދުވެރިއަކު ނެތުމުގެ މައްސަލަތައްވެސް ޞިފާނާ ފާހަގަކުރެއްވިއެވެ. މިއަހަރުގެ ފުރަތަމަ ތިންމަސްދުވަހުގެ ތެރޭގައި ޢުމުރުން ދުވަސްވީ މީހުންގެ އަށް މައްސަލައެއް އެކޮމިޝަނަށް ހުށަހެޅުނެވެ.
ޢުމުރުން ދުވަސްވީ މީހުންނާ ގުޅޭ ގޮތުން ފުލުހުންނަށް ހުށަހެޅޭ މައްސަލަތަކަށް ރިޢާޔަތްކުރައްވާ ފޯރަމްގައި ވާހަކަދެއްކެވި ފުލުސް އޮފިސަރ މުޙައްމަދު ޝަރީފު ވިދާޅުވީ ޢުމުރުން ދުވަސްވީ މީހުންނަށް ލިބޭ އިނާޔަތް ދެވެނީ އެންމެ އެކަށީގެންވާ ފަރާތްތަކަށްތޯވެސް ދެނެގަންނަންޖެހޭކަމުގައެވެ. ޢާއިލާގެ ފަރާތުން ޢުމުރުން ދުވަސްވީ މީހާ ބަލަހައްޓާ ފަރާތްނޫން އެހެން ފަރާތްތަކަށް މާލީ އިނާޔަތުގެ މަންފާ ލިބޭކަން ހުށަހެޅޭ މައްސަލަތަކަށް ބަލާއިރު ފާހަގަކުރެވޭ ކަމަށް ޕެނަލް ގައި ވާހަކަ ދެއްކެވި ފުލުސް އޮފިސަރ ވިދާޅުވިއެވެ.
ފުލުހުންނަށް ހުށަހެޅޭ މައްސަލަތަކުގެ ތެރޭގައިވެސް އިހްމާލު ވުމުގެ މައްސަލަތައް ކަންބޮޑުވާން ޖެހޭ މިންވަރަށް ފާހަގަކުރެވޭކަމަށް ވިދާޅުވިއެވެ.
"އާއިލާގެ ކޮންމެވެސް އެއްފަރާތަކުން ޒިންމާ އުފުލައިގެން އުޅޭ ޙާލަތްތަކުގައިވެސް، އާއިލާގައި ދެން ތިބޭ އެހެން މީހުންގެ ފަރާތުން އެހީތެރިކަމާއި އެއްބާރު ނުލިބޭ، ބަލަހަށްޓާފަރާތަށް ބުރަ ބޮޑުވުމުން ވެސް އިޙުމާލުވުމުގެ މައްސަލަ ކުރިމަތިވޭ" ފުލުސް އޮފިސަރ މުޙައްމަދު ޝަރީފު ވިދާޅުވިއެވެ.
