ވޯޓާސް ލިސްޓަށް ޝަކުވާ ހުށަހެޅުމަށް ބާއްވާ މަގުމަތީ ޙަރަކާތެއް ރަސްފަންނުގައި އިލެކްޝަންސް ކޮމިޝަނުން ފަށައިފިއެވެ.
މިޙަރަކާތް ކުރިއަށްދާނީ މިއަދު ހަވީރު 4:00 އިން މިރޭ 10:00 އަށެވެ. ވޯޓާސް ލިސްޓަށް ޝަކުވާ ހުށަހެޅުމުގެ ފުރުޞަތު މި ޙަރަކާތުގެ ތެރެއިން އެންމެންނަށް ވެސް ވަނީ ހުޅުވާލެވިފައެވެ.
ރައްޔިތުންގެ މަޖިލީސް އިންތިޚާބު ބޭއްވުމަށް ހަމަޖެހިފައިވަނީ އޭޕްރިލް މަހު 6 ވަނަ ދުވަހުއެވެ. މަޖިލީހުގެ އިންތިޚާބުގައި ވޯޓުލެވޭ މީހުންގެ ލިސްޓު އާންމު ކުރައްވައި، އެއަށް ޝަކުވާ ހުށަހެޅުމުގެ ފުރުސަތު އިލެކްޝަންސް ކޮމިޝަން (އީސީ) އިން ހުޅުވާލައިލެއްވީ އިއްޔެވެ. ޝަކުވާ ހުށަހެޅުމުގެ މުއްދަތު ހަމަވާނީ ފެބްރުއަރީ 9 ވަނަ ދުހުއެވެ. ވޯޓާސް ލިސްޓު ނުވަތަ ވޯޓުލެވޭ މީހުންގެ ލިސްޓް މިހާރުވަނީ ސަރުކާރުގެ ގެޒެޓްގައި ޝާޢިއު ކުރައްވައިފައެވެ.
މަޖިލީސް އިންތިޚާބުގައި ވޯޓު ލުމުގެ ޙައްގު މިފަހަރު ލިބިފައިވަނީ 264،589 މީހުންނަށެވެ.
