ފްރާންސްގައި މިހާރު ކުރިއަށްދާ ޔޫރޯ ފުޓްބޯޅަ މުބާރާތުގެ ކުއާޓާ ފައިނަލުގައި ރޭ ފަސޭހަކަމާއެކު އައިސްލެންޑުގެ މައްޗަށް ކުރި ހޯދައިގެން ފްރާންސް ފައިނަލަށް ހިނގައްޖެއެވެ.
މިމުބާރާތުގެ ކުއާޓާގެ ފަހު މެޗުގައި ފްރާންސް މޮޅުވީ 5-2 އިންނެވެ. ރޭގެ މުޅި މެޗުގައިވެސް ގިނަ ވަގުތު ބޯޅަ ހިފަހައްޓައިގެން ރަނގަޅަށް ކުޅެފައިވަނީ ފްރާންސެވެ. މެޗުގެ ފުރަތަމަ ލަނމޑު ފްރާންސްއިން ޖެހީ މެޗުގެ 12 ވަނަ މިނެޓުގައެވެ. އެ ލަނޑު ކާމިޔާބުކޮށްދިނީ އޮލިވިއާ ޖިރޫ އެވެ. އޭނާ އެ ލަނޑު ކާމިޔާބުކުރީ އައިސްލެންޑުގެ ޕެނަލްޓީ އޭރިޔާ ތެރެއިން އުފެއްދި ހަމަލާއަކުންނެވެ.
އޭގެފަހުން މެޗުގެ 20 ވަނަ މިނެޓުގައި ޕައުލް ޕޮގްބާ ވަނީ ލަނޑެއްޖަހައި މެޗުގެ ލީޑު ފުޅާކޮށްފައެވެ. ފްރާންސްގެ ތިން ވަނަ ލަނޑު މެޗުގެ 42 ވަނަ މިނެޓުގައި ކާމިޔާބުކޮށްދިނީ ޑިމިޓްރީ ޕަޔެޓް އެވެ. ރޭގެމެޗުގެ ފުރަތަމަ ހާފުގެ އެންމެ ފަހު މިނެޓުގައި ގްރީޒްމަން ޖެހި ލަނޑާއެކު ފުރަތަމަ މެޗުގެ ފުރަތަމަ ހާފް ފްރާންސްއިން ނިންމާލީ 4 – 0 ގެ ތަފާތުބޮޑު ނަތީޖާއަކުންނެވެ.
އެހެންނަމަވެސް ބައެއް ބަދަލުތަކާއެކު ދެވަނަ ހާފަށް ނުކުތް އައިސްލެންޑުންވަނީ ލަނޑެއް ޖެހުމަށް ގިނަ މަސައްކަތްތަކެއް ކޮށްފައެވެ. އެގޮތުން މެޗުގެ 56 ވަނަ މިނެޓުގައި ކޮލްބެއިން ސިގްތޯސަން އެޓީމަށް ލަނޑެއްކާމިޔާބުކޮށްދީ ސުން ކަނޑުވާލިއެވެ. އޭގެފަހުންވެސް މެޗުގައި ޖުމުލަގޮތެއްގައި ރަނގަޅު ކުޅުމެއް ދެއްކީ ފްރާންސް އިންނެވެ. އެގޮތުން މެޗުގެ 65 ވަނަ މިނެޓުގައި ފްރާންސުން ވަނީ އަނެއްކާވެސް އިތުރު ލަނޑެއް ޖަހައިފަ އެވެ. ހިލޭ ޖެހުމަކުން ޕަޔެޓް ދިން ބޯޅައަކުން އެ ލަނޑު ކާމިޔާބުކޮށްދިނީ ފުރަތަމަ ލަނޑު ވެސް ކާމިޔާބުކޮށްދިން ޖިރޫ އެވެ.
ރޭގެ މެޗުގެ އެންމެ ފަހު ލަނޑު ޖެހީ އައިސްލެންޑުންނެވެ. އައިސްލެންޑަށް އެ ލަނޑު ކާމިޔާބުކޮށްދިނީ ބިރްކިޔާ ބިޔާނަސަން އެވެ. ސެމީގައި އަންނަ ބުރާސްފަތި ދުވަހުގެ ރޭ ފްރާންސް ނުކުންނަން ޖެހޭނީ ދުނިޔޭގެ ޗެމްޕިއަން ޖަރުމަނާ ދެކޮޅަށެވެ.
