ރ. ފައިނުގައި ތަރައްޤީކުރާ އެއާޕޯޓު ހެދުމަށް ކުރިން ހަދައިފައިވާ އެންވިޔަރަންމަންޓް އިމްޕެކްޓް އެސެސްމެންޓް (އީއައިއޭ) އަލުން ހަދާ ގޮތަށް އީޕީއޭ އިން ނިންމައިފިއެވެ.
އެންވިޔަރަންމަންޓް ޕްރޮޓެކްޝަން އެޖެންސީ (އީޕީއޭ) އިން އެގޮތަށް ނިންމެވީ އެ ޕްރޮޖެކްޓާ ބެހޭ ގޮތުން ރައްޔިތުން ހުށަހަޅައިފައިވާ ޝަކުވާތަކަށް ބެއްލެވުމަށް ފަހުއެވެ.
އީޕީއޭގެ ޑިރެކްޓަރ ޖެނެރަލް އިބްރާހީމް ނަޢީމް ވިދާޅުވީ ރައްޔިތުންގެ ދަނޑުބިންތައް ހަލާކުވުމާއި، އެތައް ރުއްގަހެއް އެރަށުން މަދުވެ ދެން ދިމާވެދާނެ ތިމާވެށީގެ އެތައް ކަމަކާ ގުޅިގެން ރައްޔިތުންގެ ޝަކުވާތައް ލިބިފައިވާ ކަމަށެވެ. "އެހެން ކަމުން އަޅުގަނޑުމެން މި ނިންމީ އަލުން އީއައިއޭ ހަދައި އޭގެ ރިޕޯޓު ހުށަހަޅުމުން އެކަން ކުރިއަށް ގެންދަން،" ނަޢީމް ވިދާޅުވިއެވެ.
އެރަށުގައި އެއާޕޯޓެއް ހެދުމަށް އެ ރަށުން 5792 ރުއްގަސް ކަނޑަންޖެހޭކަމަށް ކުރިގެ އީއައިއޭ ރިޕޯޓުގައި ބުނެފައިވެއެވެ. އެއީ އެރަށުގައި ހެދިފައިވާ ރުއްގަހުގެ 38 އިންސައްތަ އެވެ. އެ ޢަދަދަށް އެރުން ރުއްގަސް ކަނޑައިފި ކަމަށްވާނަމަ އެ ސަރަޙައްދުގެ ފެންފަށަލައާއި، ފިނިހޫނު މިނަށް ބަދަލު އަންނާނެ ކަމަށް ވެސް ބުނެފައިވެއެވެ. އަދި ވެލިގަނޑަށް ވެސް ބަދަލު އައިސް ނޭދެވޭ އަސަރުކުރާނެ ކަމަށް ރިޕޯޓުގައި ބުނެފައިވެއެވެ. ފަޅު ހިއްކައިގެން އެއާޕޯޓު ހެދުމުން މޫދާއި ފަރުތަކަށް ގެއްލުން ވާނެއެވެ. އެންމެ ބޮޑު ގެއްލުން ލިބޭނީ ރުއްގަސް ކެނޑުމުން ކަމަށް ވެސް އީއައިއޭ ރިޕޯޓުގައި ބުނެފައިވެއެވެ. ފައިނު އެއާޕޯޓު ތަރައްޤީ ކުރެވެނީ ފަޅުން 8.3 ހެކްޓަރުގެ ބިން ހިއްކައިގެންނެވެ.
ފައިނުގައި ހެދިފައިވާ ގަސްތައްކުގެ ތެރޭގައި ބޮޑެތި ނިކަ، ފުނަ، އުނި، ދިއްގާ ފަދަ އެތައް ބާވަތެއް ހިމެނެއެވެ.
ފައިނުގައި އެއާޕޯޓެއް އެޅުމަށް ނިންމެވީ ރައީސް ޔާމީންގެ ވެރިކަމުގައެވެ. އެމަސައްކަތް ޙަވާލު ކުރައްވައިފައިވަނީ އައިލެންޑް އޭވިއޭޝަނާއެވެ. ފައިނު އެއާޕޯޓުގެ ރަންވޭގެ ދިގުމިނަކީ 1320 މީޓަރެވެ. ފުޅާ މިނަކީ30 މީޓަރެވެ. އެތަނުގައި ހަދާ ޓެކްސީ ވޭގެ ދިގުމިނަކީ 60 މީޓަރެވެ. ފުޅާ މިނަކީ 15 މީޓަރެވެ. އަދި 227.5 މީޓަރު ދިގު 45 މީޓަރު ފުޅާ އޭޕްރަން އޭރިއާއެއް ވެސް ހެދުމަށްވަނީ ކަނޑައަޅައިފައެވެ.
