ރައީސް އިބްރާހީމް މުޙައްމަދު ޞާލިޙް ރައީސް ކަމުގެ ހުވައި ކުރެއްވުމުގެ އުފަލުގައި މިއަދު ފެށި "ދުޅަހެޔޮ ހަށިހެޔޮ ޢީދު" ގެ ބައެއް ކުޅިވަރުތަކުގައި އެމަނިކުފާނު ބައިވެރިވެވަޑައިގެންފިއެވެ.
މިޙަރަކާތުގައި އެމަނިކުފާނުގެ އިތުރަށް ނާއިބު ރައީސް ފައިޞަލް ނަސީމް ވެސް ބައިވެރިވެ ވަޑައިގެންނެވިއެވެ. އަދި ރައްޔިތުންގެ މަޖިލީހުގެ ރައީސް ޤާސިމް އިބްރާހީމް ވެސް ބައިވެރިވެ ވަޑައިގެންނެވިއެވެ. އަދި ވަޒީރުންގެ މަޖިލީހުގެ މެމްބަރުންނާއި، ރައްޔިތުންގެ މަޖިލީހުގެ ބައެއް މެމްބަރުން ވެސް މިޙަރަކާތުގައި ބައިވެރިވެ ވަޑައިގެންނެވިއެވެ.
ރައީސް ޞާލިޙު ވަނީ މި ޙަރަކާތް ތަކުގައި ބައިވެރިވި އެންމެހާ ބޭފުޅުންނާ ބައްދަލު ކުރައްވައިފައެވެ. އެ ބޭފުޅުންނަށް ބައްދަލު ކުރައްވައި ރައީސް ވިދާޅުވީ މިފަދަ ހަރަކާތްތައް ކުރިއަށްއޮތް ދުވަސްތަކުގައިވެސް ކުރިއަށް ގެންދަވާނެ ކަމަށެވެ. މި ޙަރަކާތް އެހައި ފުރިހަމަ ވެގެންދިޔައީ ހުރިހާ ރައްޔިތުން ދެއްވި އެއްބާރުލުމުގެ ސަބަބުންކަމަށް ވެސް ވިދާޅުވިއެވެ. ރައީސުލްޖުމްހޫރިއްޔާ ވަނީ މިރޭ ކުރިއަށްދާ ޖާފަތުގައި ބައިވެރިވުމުގެ ދަޢުވަތު އެންމެހާ ރައްޔިތުންނަށް ދެއްވައިފައެވެ.
