ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ސްރީލަންކާއަށް މިއަދު ފުރާވަޑައިގެންފިއެވެ. ރައީސް އޮފީހުން ވިދާޅުވީ މިއީ އެމަނިކުފާނު އެޤައުމަށް ކުރައްވާ ނުރަސްމީ ދަތުރުފުޅެއް ކަމަށެވެ. މިދަތުރުފުޅުގައި ތިން ދުވަސް ހޭދާވާނެ ކަމަށް ވެސް ރައީސް އޮފީހުން ވިދާޅުވެފައިވެއެވެ.
ރައީސް އިބްރާހީމް މުޙައްމަދު ޞާލީހު ވެރިކަމާ ޙަވާލުވެ ވަޑައިގެންނެވިފަހުން މިނޫނީ އަމިއްލަ ދަތުރުފުޅެއްގައި ރާއްޖެއިން ބޭރަށް ވަޑައެއްނުގަންނަވައެވެ. އެމަނިކުފާނު ވެރިކަމާ ޙަވާލުވެ ވަޑައިގެންނެވީ ހުސްވި އަހަރު ނޮވެމްބަރުމަހު 17 ވަނަ ދުވަހުއެވެ.
ނުރަސްމީ ދަތުރުފުޅެއްގައި ރާއްޖެއިން ބޭރަށް ވަޑައިނުގެންނެވިޔަސް އެމަނިކުފާނުވަނީ ރަސްމީ ދަތުރުފުޅެއްގައި މިދިޔަމަހު އިންޑިއަށް ވަޑައިގެންފައެވެ. އެއީ އެމަނިކުފާނު ވެރިކަމާ ޙަވާލުވެ ވަޑައިގެންނެވުމަށްފަހު ޤާއުމުން ބޭރަށް ކުރެއްވި ރަސްމީ ފުރަތަމަ ދަތުރުފުޅެވެ.
ރައީސް ސްރީލަންކާއަށް ވަޑައިގެންނެވީ އެމަނިކުފާނުގެ ޢާއިލާއާ އެކުގައި ކަމަށް ރައީސް އޮފީހުން ވިދާޅުވިއެވެ. އެމަނިކުފާނު އެނބުރި ރާއްޖެ ވަަޑައިގަންނަވާނީ އާދީއްތަ ދުވަހު ހަވީރުއެވެ.
