އިބްރާހީމް މުހައްމަދު ސާލިހު (އިބޫ) ގެ ވެރިކަމުގައި ގއ. ދާންދޫގައި ބޭންކް އޮފް މޯލްޑިވްސްގެ ޚިދުމަތް ފަށްޓަވާނެ ކަމަށް އެމަނިކުފާނު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ގއ. އަށް މިހާރު ކުރައްވަމުން ގެންދަވާ ދަތުރުފުޅުގައި އެރަށަށް ވަޑައިގެން ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައެވެ.
އިބޫ ވިދާޅުވީ އާމްދަނީ އިތުރުވަމުންދާ މިންވަރަކަށް އެފައިސާ ރައްކާކުރެވޭނެ އިންތިޒާމްވެސް ހަމަޖެހެން ޖެހޭނެ ކަމަށެވެ. އެހެންނަމަވެސް މިހިސާބަށް އައިއިރުވެސް އެ ޚިދުމަތް އެރަށަށް ލިބިފައިނުވާ ކަމަށެވެ. އެ ޚިދުމަތަށް ބޭނުންވެފައި ދާންދޫ ރައްޔިތުން ތިބޭތާ ވަރަށް ދުވަސް ވެއްޖެ ކަމަށް ވެސް އިބޫ ވިދާޅުވިއެވެ.
ބޭންކު ޚިދުމަތުގެ އިތުރަށް އެރަށުގައި ފެނާއި ނަރުދަމާ ޚިދުމަތް ވެސް ގާއިމް ކޮށްދެއްވާނެ ކަމަށް އެމަނިކުފާނު ވިދާޅުވިއެވެ.
