މިއަހަރު ސެޕްޓެމްބަރު 23 ގައި ރާއްޖޭގައި ބާއްވާ ރިޔާސީ އިންތިޚާބުގައި ޕީޕީއެމްގެ ރިޔާސީ ކެންޑިޑޭޓު ރައީސް ޔާމީނާއި އެމަނިކުފާނުގެ ރަނިންމޭޓް ޑރ. މުހައްމަދު ޝަހީމް އަލީ ސައީދު މިރާއްޖޭގެ މިނިވަންކަން ނަގަހައްޓަވައި ގައުމު ތަރައްގީ ކުރައްވާނެ ކަމަށް ޕީޕީއެމްގެ ސެކްރެޓަރީޖެނެރަލް ޑރ. އަބްދުﷲ ޚަލީލު ވިދާޅުވެއްޖެއެވެ.
އޭނާ ވިދާޅުވީ މި ދެބޭފުޅުންނަކީ އިސްލާމީ ސަގާފަތާއި، ދިވެހިވަންތަ ދިރިއުޅުމެއް ދިވެހިންނަށް ހޯއްދަވައިދެއްވާނެ ދެބޭފުޅުން ކަމަށެވެ. އަދި ރާއްޖޭގެ މިނިވަންކަމާއި ތަރައްގީއާއި ތަހުޒީބު އައު ހަރުފަތްތަކަކަށް އެދެބޭފުޅުން ގެންގޮސް ދެއްވާނެ ކަމަށްވެސް އޭނާ ވިދާޅުވިއެވެ.
ރައީސް ޔާމީންގެ ރަނިން މޭޓަކަށް ޑރ. ޝަހީމް ހަމަޖެއްސެވިކަން ރައީސް ޔާމީން އިއުލާން ކުރެއްވީ ޕީޕީއެމުން ރޭ ބޭއްވި ކައުންސިލްގެ ކުއްލި ބައްދަލުވުމެއްގައެވެ. ރައީސް ޔާމީންގެ ރަނިންމޭޓަކަށް ޑރ. ޝަހީމް ހަމަޖެއްސެވިތާ މާގިނައިރެއް ނުވަނީސް އެމަނިކުފާނުވަނީ ވަރަށް ޚާއްސަ ޓްވީޓެއް ކުރައްވައިފައެވެ
ޓްވީޓުގައި ވިދާޅުވެފައިވަނީ މިއަހަރު ބާއްވާ ރިޔާސީ އިންތިޚާބު އެއްބުރުން ކާމިޔާބު ކުރެއްވުމަށްޓަކައި އެންމެހައި ދިވެހި ރައްޔިތުން ރައީސް ޔާމީނަށް ބައިއަތު ހިފުމަށެވެ. "ރައީސް ޔާމީންގެ ފަރާތްޕުޅުގައި ދިވެހި އެންމެހައި ރައްޔިތުން އެއްބައިވަންތަވެ، އިލްމުވެރިންނާއި ޒުވާނުންނާއި ގައުމުގެ އެންމެހައި ކަނބަލުން މި އިންތިޚާބު ފުރަތަމަ ބުރުން ކާމިޔާބު ކުރުމަށް މަސައްކަތް ކުރެއްވުމަށް އެދެން،" ޝަހީމް ކުރެއްވި ޓްވީޓުގެ ވިދާޅުވެފައިވެއެވެ.
މައުލޫމާތު ލިބިފައިވާ ގޮތުގައި ޑރ. ޝަހީމް ރިޔާސީ ކެންޕޭނަށް ވަރަށް އަވަހަށް ރަށްރަށަށށް ފުރައިވަޑައިގަންނަވާނެއެވެ. ޝަހީމަކީ މީގެ ކުރިން އިސްލާމިކް މިނިސްޓަރުކަން ދެފަހަރެއްގެ މަތިން ކުރައްވައިފައިވާ ބޭފުޅެކެވެ. އަދި އެމިނިސްޓްރީގެ ސްޓޭޓު މިނިސްޓަރުކަންވެސް ކުރެއްވިއެވެ.
