ދުނިޔެއަކީ ، ވަކިގޮތަކަށް ހިނގަމުން އަންނަ ތަނެކެވެ. މީހަކު ހަމަ ، ބޭނުންވާހާ ގޮތަކަށް ދުނިޔެއެއް ނުހިނގާނެއެވެ. ދުނިޔެ ހިނގާނީ ، އޭގެ އަމިއްލަޒާތުގައި ، އެ ހިނގާ ގޮތަކަށެވެ. އެއީ ޤުދުރަތީ ނިޒާމެކެވެ. މީހާ ހިނގަންވާނީ ދުނިޔެ ހިނގާ ގޮތަށެވެ. ދުނިޔެ ހިނގާގޮތަށް ހިނގަން ނޭނގޭމީހާއަށް ، ދުނިޔޭގައި ހިނގަން އުނދަގޫ ވާނެއެވެ.
ދުނިޔެއަށް އަލިކަންދެނީ އިރުންނެވެ. އިރުން އުފައްދާ ހޫނަކީ ދުނިޔެއަށް ދިރުންގެނެސްދޭ އެއްޗެކެވެ. އިރުގެ އަލިކަން ނެތްނަމަ ، ދުނިޔެ ދެމިއޮތުމަށް ދަތިވާނެއެވެ. ދުވަހަކަށް އިރުއަރާފައި ، އެދުވަހުގެ ގަޑިނިމުމުން ، އެ އިރު އޮއްސޭނެއެވެ. އެހެނަސް ، އެ އިރު އެ އޮއްސެނީ ވަކިބަޔަކަށެވެ. ދުނިޔޭގެ ވަށައިގެން ބުރުއަޅަމުންދާއިރު ، ދުނިޔޭގެ ކޮންމެވެސް ހިސާބަކަށް އެ އިރު ހުންނާނީ އަރާފައެވެ. ދުނިޔެ ދެމިއޮތުމަށް އެ އިރުން ބޭނުންވާ މާއްދާތައް ހުހެއް ނުވާނެއެވެ. އެ މާއްދާތައް ދުނިޔެއަށް ފޮނުވުމުގައި ދެމިއޮންނާނެއެވެ. އަބަދަކު ، ދުނިޔޭގައި ދިރިއުޅޭ އެންމެންނަށް ، އެއްއިރެއްގައި ، އެ އިރެއް ދުނިޔެއަކަށް ނުފެންނާނެއެވެ. އެއްބަޔަކަށް އިރުއަރާއިރު ، އަނެއްބަޔަކަށް ، އެ އިރު އޮއްސޭނެއެވެ.
އެރުމާއި އޮއްސުމަކީ ޤުދުރަތީ ނިޒާމެކެވެ. ވަރަށްގިނަ ޙާލަތްތަކުގައި މިނިޒާމުގެ ހަމަތައް އެއްގޮތް ވެއެވެ. ދުނިޔަވީ ކަންކަމުގައި އެކަން އެގޮތަށް އޮންނައިރު ، ސިޔާސީ ކަންކަމުގައިވެސް ، އެރުމާއި އޮއްސުން އޮވެއެވެ. ޤައުމެއްގެ ތަރައްޤީއާއި އެ ޤައުމެއްގައި ދެމިއޮންނަ ވަޠަނީ ރޫޙަކީވެސް ، އެރުމާއި އޮއްސުމާގުޅިފައި އޮންނަ މުހިންމު ޙާލަތެކެވެ.
ދުނިޔޭގައި ކުރިއަރައި ގޮސްފައިވާ ޤައުމުތަކަށް ، ކާމިޔާބީއަކާ ހަމަޔަށް ވާޞިލުވެވެނީ ، އިރުއަރައި އޮއްސުމުގެ ތެރެއިން ، އެ ޤައުމެއްގެ އެންމެން އެއްބައިވެ ، ރެޔާއި ދުވާލު އެކުގައިމަސައްކަތް ކޮށްގެންނެވެ.
ދުނިޔޭގައި ކުރިއަރައިފައިވާ ޤައުމުތަކުން ، ޖަޕާނަކީ އޭގެ މިސާލެކެވެ. ހީރޯޝީމާއަށް އެމެރިކާއިން ބޮންއަޅައި އެތަން ސުންނާފަތިކޮށްލީ ، އެއީ ޖަޕާނުގެ އިޤްތިޞާދީ މައި ރަށް ކަމަށް ވާތީއެވެ. އިޤްތިޞާދީގޮތުން އިނދަޖައްސައިލުމަށްޓަކައެވެ. ހީރޯޝީމާއަށް ބޮން އެޅުމުންވެސް ، ޖަޕާނުން އަމާން ނުދިނުމުން ، ދެން އެމެރިކާއިން ބޮންއެޅީ ނަގަސާކީއަށެވެ. އޯގަސްޓް 1945 ގައި ، ދެވަނަ ބޮޑުހަނގުރާމައިގާ އެއްވެސް ޝަރުތެއްނެތި ، ޖަޕާނުން ހަތިޔާރު ބަހައްޓައި އަމާންދިން އިރު ، ޖަޕާނު އޮތީ ސުންނާފަތި ވެފައެވެ. ޖަޕާނުގެ 2.5 މިލިއަން މީހުން މަރުވިއެވެ. ޢާންމު ރައްޔިތުންގެ ތެރެއިން 5 ލައްކަ މީހުން މަރުވިއެވެ. ދުނިޔޭގައި ދިރިތިބި ބަޔަކުތިބީ ، އެބައިމީހުންގެ ދިރިއުޅުމުގެ އުއްމީދު ކަނޑައިލައިގެންނެވެ. ޤައުމުގެ އިޤްތިޞާދުގައި ބޭނުންކުރަން ލިބިފައިއޮތީ އެންމެ 25 އިންސައްތައެވެ.
އެއްގަމާއި ކަނޑާ އަދި ވައިގެ ސިފައިންގެ ވަސްފިލައިގެންގޮސް ، ޤައުމީ ސަލާމަތާއި ރައްކާތެރިކަމުގެ ނިޒާމު ފުނޑުފުނޑުވިއެވެ. ސަރުކާރު ބަލިކަށިވެ ، ސަރުކާރެއް ހިންގުމުގައި ބޭނުންކުރެވޭ ހުރިހާ ނިޒާމެއް ބޮއްސުންލިއެވެ.
އެހެންނަމަވެސް ، ދެވަނަ ބޮޑުހަނގުރާމައިގާ އަމާންދިނުމަށްފަހު ، ޖަޕާނުން އެންމެ އިސްކަންދިނީ ، ކަޅު އަނދިރިގަނޑަކަށް ވެއްޓިފައިވާ އެޤައުމުގެ އިޤްތިޞާދު ކޮޅަށް ޖެހުމަށެވެ. 1973 ވަނަ އަހަރާހަމަޔަށް ، އެމަސައްކަތުގައި ޖަޕާނުން ހިތްވަރުކޮށް ، ދެވަނަ ބޮޑުހަނގުރާމައިގައި އިޤްތިޞާދު އޮތްޙާލަތަށްވުރެ ، ރަނގަޅު ޙާލަތަކަށް ބަދަލުކުރިއެވެ. އަދި އޭގެފަހުން ، ޖަޕާނުން ހޯދި އިޤްތިޞާދީ ތަރައްޤީ ، އެކަމުގެ މާހިރުން ދެކެނީ މުޢުޖިޒާތެއްފަދަ އަޖައިބެއްގެ ގޮތުގައެވެ.
ދުނިޔޭގެ ތިންވަނަޔަށްއޮތް އެންމެ ބޮޑު އިޤްތިޞާދުގެ ދަރަޖަ ، ޖަޕާނުން ހޯދީ ، 4 އަސާސެއްގެ މައްޗަށް ޤައުމުގެ ސިޔާސަތުތައް ބަށްޓަން ކޮށްގެންނެވެ. އެއީ ، ސައިންސްގެ ޢިލްމުން އިންސާނާގެ ދިރިއުޅުމަށް ކުރިއެރުން ގެނައުން ނުވަތަ ޓެކްނޮލޮޖީ ކުރިއެރުވުމާއި ، ޤައުމުގެ ޤުދުރަތީ ވަޞީލަތްތައް އޭގެ އެންމެ ފުރިހަމަގޮތުގައި ބޭނުންކުރުމާއި ، މަސައްކަތްތެރިކަމުގެ ފެންވަރު މަތިކޮށް ، އިންސާނީ ވަޞީލަތް ކުރިއަރުވައި އުފެއްދުންތެރިކަން އިތުރު ކުރުމާއި ، ބައިނަލްއަޤްވާމީ ވިޔަފާރި ނުވަތަ އެކްސްޕޯޓް އިތުރު ކުރުމެވެ. މި އަސާސްތައް ހަރުދަނާކޮށް ކުރިއަރުވައި ދެމެހެއްޓުމަށްޓަކައި ، ސިޔާސީ ހަލަބޮލިކަން ދޫކޮށްލިއެވެ. ސަރުކާރުގެ މުއައްސަސާތަކުގެ މެދުގައި އެއްބައެއްވަންތަކަން ޤާއިމްކޮށް އެކަތިގަނޑަކަށް ހެދިއެވެ. ފަރުދީ ޒިންމާ އުފުއްލައިގެން ޤައުމުބިނާކުރާނެ ޒުވާން ޢިލްމީ ޖީލެއް އުފައްދައި ، އެންމެންގެ ބައިވެރިވުން ހޯދިއެވެ. ކަރަޕްޝަނަށް މަގުފަހިވާނެ ހުރިހާ ދޮރުތަކެއް ބަންދު ކުރިއެވެ. ފުންނާބު އުސް ވިޔަފާރިވެރިންގެ ނާރެހެއް އުފައްދައި ، އެބައިމީހުންގެ މުއްސަނދިކަން އިތުރުވާނެމަގު ހުޅުވުމާއެކު ، އެ މުއްސަނދިކަން ޤައުމުގެ އެތެރޭގައި ހިފެހެއްޓޭނެ މަގު ހޯދިއެވެ. ސަރުކާރު ހިންގުން އެ ނިޒާމަށް ބަށްޓަންކޮށް ، ކުދި އަދި މެދުފަންތިއާއި ބޮޑެތި ވިޔަފާރިތަކަށް ، ފުރުޞަތު ތަނަވަސްކޮށްދީ ، ވަކިވަކި ފަރުދުންގެ ފުދުންތެރިކަން އިތުރުވާނެ މަގުތައް ހުޅުވާލަ ދިނެވެ.
ޤައުމުގައި އުފެދޭ ޤުދުރަތީ ވަޞީލަތްތަކާއި ޤައުމަށް އެތެރެވާ ފައިސާ ބޭރަށް ނުދާނެ ގޮތްތައް ރޭވިއެވެ. ކުރިއަރާފައިވާ މަދު ޤައުމެއްގައި ބޭނުންކުރަމުންގެންދިޔަ ޓެކްނޮލޮޖީ އެތެރެކޮށް ، އެއަށް އަހުލުވެރިވުމަށްޓަކައި ބޭނުންވާ ފަންނީ މާހިރުން އެތެރެކުރިއެވެ. ހަމައެއާއެކު ، މަތީ ތަޢުލީމާއި ފަންނީ މަސައްކަތްތެރިން އުފައްދައި ، ހަމަ ކޮންމެ މީހަކީވެސް ، ޤައުމުބިނާކުރުމުގެ މަސައްކަތުގައި ޙިއްޞާވާމީހަކަށް ހެދިއެވެ. ބިދޭސީ މަސައްކަތުމީހުންނަށް ، ބޭނުމެއްނެތް ގޮތެއްގައި ، ޤައުމަށް ވަދެވެންހުރި ދޮރުތައް ބަންދު ކުރިއެވެ.
ޤައުމު ހިންގުމުގައި ނަޟާޙަތްތެރިކަން އިސްކުރިއެވެ. ރަސްކަމުގެ ބާރު ކުޑަކޮށް ، ސިޔާސީ ކަންކަމާ އެމްޕެރަރ ދުރުކޮށް ، ޤައުމު ހިންގުމާއި ސިޔާސީ ޙަރަކާތްތައް އެއީ ބަރުލަމާނީ ނިޒާމަކުން ހިންގާ ވެރިކަމަކަށް ބަދަލުކުރިއެވެ. އަންހެނުން ބާރުވެރިކުރުވައި ، އަންހެނުންގެ ޙައްޤުތައް ރައްކާތެރިކޮށްދީ ، ޤައުމުގެ ތަރައްޤީގައި އަންހެނުންގެ ދައުރު ފުޅާކުރިއެވެ. އެކިއެކި ސަރުކާރުތަކުގައި އުޅެ ، ފެއިލްވެ ، ނަތީޖާ ނުނެރެވުނު ވަޒީރުން ސަރުކާރުގެ ހިންގުމުގެ ތެރެއިން ބޭރުކުރެވެއެވެ. ސަރުކާރުގެ ތަޞައްވުރު ހާމަކޮށް ، ސަރުކާރުގެ ހިންގުމާގުޅިފައިވާ ޚަބަރާއި މަޢުލޫމާތު ރައްޔިތުންނަށް ހާމަކުރުމަށްޓަކައި ، ނަޟާޙަތްތެރި ، ޤާބިލް ހުނަރުވެރިން ބޮޑުވަޒީރުގެ އޮފީހަށް އިސްކުރެވެއެވެ. " އިންޓަރނެޝަނަލް ވިޒިޓާރޒް ޕްރޮގްރާމް " އެއް އުފައްދައި ، ބޭރުސަރުކާރުތަކުގެ އިސްވެރިން ޖަޕާނަށް ޒިޔާރަތްކުރުމަށް ދަޢުވަތުދީ ، ކުރިއަރަމުންއައި ޖަޕާނުގެ ތަޞައްވުރު ދުނިޔެއަށް ހާމަކުރަމުން ގެންދިޔައެވެ. ޓީވީ ޗެނަލްތަކާއި މީސްމީޑިއާގައި މަސައްކަތްކޮށް ، ފަސާދައިގެ ޢަމަލުތައް ހިންގާ ، ވައްކަމުގެ ތުހުމަތު އެޅިފައިވާ މީހުން ، ބޮޑުވަޒީރުގެ އޮފީހުން ބޭރުކުރެވެއެވެ. ނަޟާޙަތްތެރިކަން ގެއްލި ، މުޖުތަމަޢުގައި އަބުރު ގެއްލިފައިވާ މީހުން ، ޢަދްލު އިންސާފު ޤާއިމްކުރުމުގެ ނިޒާމުގެ ތެރެއިން ، ބޭރުކުރެވެއެވެ. މާލީނިޒާމުން އެޅެމުން ބަށްޓަންވަމުންދިޔަ ބިންގަލަށް ، ލޮޅުމެއް އަރައިފާނެ ހުރިހާކަމަކަށް ސަމާލުކަންދީ ، އެ ނިޒާމު ރައްކާތެރި ކުރިއެވެ. ސަރުކާރަކީ ނަޟާޙަތްތެރިކަމުގެ މައްޗަށް ބަށްޓަންވެގެން ، ރައްޔިތުންގެ އިތުބާރުލިބިގެން ހިނގަމުންދާ ، ރައްޔިތުންގެ ސަރުކާރެއްކަން ކަށަވަރުކޮށްދިނުމަށްޓަކައި ، ސިޔާސީގޮތުން ޤައުމަށް ބޭނުންވާ ހުރިހާކަމެއް ފުރިހަމަކުރަމުން ގެންދިޔައެވެ. އޭގެ ހެއްކަކީ ، 1945 އިން ފެށިގެން މިހާތަނަށް މިވީ 78 އަހަރުގެ ތެރޭގައި ސަރުކާރު ހިންގުމަށް 64 ބޮޑުވަޒީރުން ޢައްޔަން ކުރެވުމެވެ. އެ މުއްދަތުގައި ޢައްޔަންކޮށް ، ނަތީޖާ ނުނެރެވުނު 250 އަށްވުރެ ގިނަ ވަޒީރުން މަޤާމުން ދުރުކުރެވުނެވެ. 50 އަށްވުރެ ގިނަ ވަޒީރުންގެ މައްސަލަ ކޯޓަށް ހުށަހެޅި އަދަބު ދެވުނެވެ. އެއްވެސް މިންވަރެއްގެ " ގޯހެއް " ހަދައިފިނަމަ ، އިތުބާރު ގެއްލިއްޖެނަމަ ، ޖިންސީ ފުރައްސާރައެއް ތުހުމަތު ކުރެވިއްޖެނަމަ ، ބޮޑުވަޒީރުންނާއި ވަޒީރުން އަދި ސަރުކާރުގެ އިސް މުއައްޒަފުން ، އެމީހުންގެ މަގާމުން ދުރުކުރެވެއެވެ.
ދިވެއްސަކަށްވީތީ ، ދިވެހި ޤައުމުގެ ޙާލަތާމެދު ދެރަވެއެވެ. ރާއްޖޭގެ އެންމެބޮޑު އިޤްތިޞާދީ ވަޞީލަތް ، ފަތުރުވެރިކަމުގެ ދާއިރާއިން ޤައުމަށްލިބޭ މުއްސަނދިކަން އެދަނީ ޤައުމުން ބޭރަށެވެ. މުއްސަނދިން އިތުރަށް މުއްސަނދިވެ ، އެ މުއްސަނދިކަމުން ޤައުމަށް ލިބޭ ފައިދާއެއް ނެތި ، ފަޤީރުންދަނީ އިތުރަށް ފަޤީރުވަމުންނެވެ. މުއްސަނދިންގެ މުއްސަނދިކަން ހޭދަކުރެވެނީ ، އިންތިޚާބުތަކުގައި ސިޔާސީ ހަލަބޮލިކަން އިތުރު ކުރުމަށެވެ. އެމްއެމް އެކްސްޕޯޓްފަދަ ، ބޭރުގެވިޔަފާރިތަކުންނާއި ދިވެހި ވިޔަފާރިވެރިން ، އިންތިޚާބުތަކުގައި ސިޔާސީ ހަލަބޮލިކަމަށް ، ބިލިއަނުން ޚަރަދުކުރާނަމަ ، ޤައުމުގެ ސިޔާސީ ހަލަބޮލިކަމުގެ ވަޒަނެއް ނުހިފެހެއްޓޭނެއެވެ. އިޤްތިޞާދީ މިނިވަންކަމެއް ނުހިފެހެއްޓޭނެއެވެ. ސަރުކާރު ހިންގުމުގައި ނަޟާޙަތްތެރިކަމުގެ ކުލަ ފަނޑުވާނެއެވެ. ވޯރާވެރިން ރާއްޖެއައިސް ، ރާއްޖޭގެ އިޤްތިޞާދު ކޮންޓްރޯލްކުރިގޮތަށް ، ދިވެހިންނަށް ފުރުޞަތު ނުލިބޭގޮތަށް ، ބޭރު ކުންފުނިތަކުގެ ނުފޫޒަށް ސިޔާސީމީހުން ވެއްޓުމަކީ ތާރީޚު އަނބުރާ ޢިއާދަވުމެވެ. ކުދިކުދި ވިޔަފާރިތަކުގެ ކޮންޓްރޯލް ބިދޭސީންގެ އަތްމައްޗަށްގޮސް ، ރާއްޖޭގެ މައިދޮރޯށިތަކާއި ، ރާއްޖޭގައި މަސައްކަތްކުރާ ބިދޭސީންގެ މައްސަލަ ޙައްލުކުރުމަށް ، އެކަމުގައި ކުރިން ގޯސްހަދާފައިވާ ފަރާތްތަކެއް އިސްކުރެވިއްޖެނަމަ ، އިޤްތިޞާދީ ދުވެއްޔާއި އިޖްތިމާޢީ ހަމަޖެހުން އެކޮޅުކޮޅުން ޖެހިގެންދާނެއެވެ. އުއްމީދަކާއެކީ ، ރައްޔިތުން އިންތިޚާބުކުރި ސަރުކާރެއްގެ އިތުބާރު ގެއްލި ، ޤައުމުގެ ޙާލަތު ގޯހުންގޯހަށް ބަދަލުވެގެން ދާނެއެވެ.
އެރުމާއި އޮއްސުމަކީ ، ދުނިޔެއަށް އެތައް ފިލާވަޅުތަކެއްލިއްބައިދޭ ނިޒާމެކެވެ. އެއީ އިރުކަމަށްވިޔަސް ، ހަނދާއި ތަރިތައްކަމަށްވިޔަސް ، އަދި ސިޔާސީ ނިޒާމާއި ދުނިޔަވީ ޙަޔާތެއްކަމަށްވިޔަސް ، އެކަންކަމުން ދުނިޔެ ދައްކާ ފިލާވަޅު އުނގެނިދަސްކޮށް ، އޭގެ ބޭނުން އެންމެ ފުރިހަމަގޮތުގައި ހިފިގެންނޫނީ ، އެރުމާއި އޮއްސުމުގެ ފޮނިމީރުކަމެއް ނުލިބޭނެއެވެ. ކޮންމެ ފެށުމެއްގައިވެސް ނިމުމެއް އޮންނާނެއެވެ. ކަމެއްފެށި ނިމުމުގެކުރިން ، އެކަމަކުން ލިބިދޭ ފިލާވަޅުތައް ދަސްކޮށް އުނގެނި ، ޢަމަލުކޮށްގެންނޫނީ ، އިންސާނާ ދުނިޔެއަށް ފޮނުއްވުމުގެ މަޤްޞަދު ޙާޞިލެއްނުވާނެއެވެ. އަރާއިރު ، އޮއްސުމުގެ ކުރިން ވަގުތާއި ފުރުޞަތުގެ ބޭނުން ހިފާށެވެ.
