ކާމިޔާބު ލީޑަރުންނަކީ ، ވަރަށްގިނަ ތަޖުރިބާ ތަކަކާއެކު ، ކާމިޔާބީތަކެއް ޙާޞިލްކޮށްގެން ، ލީޑަރެއްގެ މަޤާމަށް ވަޑައިގެންނެވޭ ބަޔެކެވެ. އެކަންކަން ޙާޞިލްކުރުމަށް ދުވަސް ބޭނުންވެއެވެ. ކާމިޔާބީތަކެއް ޙާޞިލް ކުރުމަށްޓަކައެވެ. އަމިއްލަ ޙަޔާތްޕުޅާއި ސިޔާސީ ޙަޔާތްޕުޅުގައި ލިބިވަޑައިގަންނަވާ ފުރުޞަތުތަކުގެ ބޭނުން ހިއްޕަވައިގެން ކުރިޔަށް ވަޑައިގަތުމަށް ބޭނުންވާ ވަގުތަކީ މުހިންމު އެއްޗެކެވެ.
ކާމިޔާބު ، ސިޔާސީ ލީޑަރުން އަބަދު ތިއްބަވާނީ ޖަލަކު ނޫނެވެ. އަބަދު އުޅުއްވާނީ ވެރިކަމާ ތޮޅުއްވަން މަގުމައްޗަކު ނޫނެވެ. ޢާއިލާ ރޫޅިގެންދިޔަކަ ނުދެއްވާނެއެވެ. އިންތިޚާބީ މަޤާމުތައް އަދާނުކުރެއްވިގެން ، އިސްތިޢުފާއެއް ނުދެއްވާނެއެވެ.
ދުނިޔޭގައި މިހާރު ތިއްބެވި ލީޑަރުންނަށް ބަލާއިރު ، 35 އިންސައްތަ ލީޑަރުން އުޅުއްވަނީ 60 ގެ އަހަރުތަކުގެ ތެރޭގައެވެ. 22 އިންސައްތަ ވެރިންނަކީ 50 ގެ އަހަރުތަކުގައި އުޅުއްވާ ބޭފުޅުންނެވެ. 18 އިންސައްތަ ލީޑަރުން 40 ގެ އަހަރުތަކުގައި އަދި 70 ގެ އަހަރު ތަކުގައި އެބަ އުޅުއްވައެވެ. 80 ގެ އަހަރުތަކުގައި އުޅުއްވަނީ 5 އިންސައްތަ ބޭފުޅުންނެވެ.
މަތީގައިވާ ތަފާސް ހިސާބަށް ބަލާއިރު ، ޢުމުރު ދޮށިވުމަކީ ، ޤައުމެއްގެ ވެރިއެއްގެ ނާޤާބިލްކަން ހާމަކުރުމަށް ދެއްކޭ ޙުއްޖަތަކަށް ނުވެއެވެ. އެހެނެއްކަމަކު ، އެއީ ވެރިކަމާ އެކަށީގެންވާ އަދި ފުރުޞަތު ބޮޑު ކަމެކެވެ.
ބައެއް ޤައުމުގެ ވެރިން ، ވެރިކަމަށް ވަޑައިގެންފައި ގިނައިންހުރީ ޤާނޫނުހަދާ މަޖިލީސް ތެރެއިން ލާފައެވެ. ނުވަތަ ރައްޔިތުންގެ މަޖިލިސް ތެރެއިން ލާފައެވެ. ރާއްޖޭގައިވެސް އޭގެ ލާމަސީލު މިސާލު ފެންނަން އެބަހުއްޓެވެ. އަދި އިންތިޚާބީ މަޤާމުތަކަށް ހޮވުނު ޅަމީހުން ޤައުމު ހިންގުމާ ޙަވާލުވީމާ ނުކުތް ނަތީޖާވެސް ، ރާއްޖެއިން ފެންނަން އެބަހުއްޓެވެ. ވެރިކަން ބޮއްސުންލައި ، ހަމަބޮލިވެ ، ޤައުމުގެ ޙާލަތު ގޯހުންގޯހަށް ދިޔައިރުވެސް ، ވެރިކަން ހިންގަން ނޭނގުނު ރައީސަކާއި ދެނައިބު ރައީސުންނާއި ވަޒީރުން އެބަތިއްބެވެ. އެއިން އެކަކަށްވެސް އެމީހުންނަށް ކުރެވުނު ކުށެއް އަދި ހެދުނު ގޯހެއް ވަތްކެއް ނުވެއެވެ. ގޯސްވީ އެހެންމީހުންނެވެ.
ދުނިޔޭގެ ތާރީޚަށް ބަލާއިރު ، ލީޑަރުންނަކީ ޢުމުރު މަތިވެގެން ވެރިކަން ނުކުރެވުމަށް އޮތް ހުރަހެއްނޫނެވެ. އެހެންނަމަވެސް ، އިންތިޚާބީ ހުރިހާ މަޤާމަކުން ފެއިލްވާ ބަޔަކު ، އެއީ މައްސަލައެއްކަމަށް ބަލައިގެން ވާހަކަ ދައްކަފާނެއެވެ. އެފަދަ ވާހަކަތައް ޤަބޫލު ކުރާމީހުންނަށްވުރެ ، ޤަބޫލުނުކުރާ މީހުން ގިނަވާނެއެވެ.
ވެރިކަމަކީ ، ﷲ މިންވަރު ކުރައްވާ ފަރާތަކަށް ، މިންވަރުކުރައްވާ ގޮތެއްގެ މަތިން މަތި ކުރެވޭ އަމާނާތެކެވެ. އެ އަމާނާތް އިދިކޮޅަށް ކިރާ މީހުންނަށް އަބަދުވެސް ފެންނާނީ ޚިޔާނާތެއްގެ ގޮތުގައެވެ. އަމާނާތެއްގެ ގޮތުގައި މިނެކިރާ ބަޔަކަށް ، އެ އަމާނާތް ފެންނާނީ ޙުރުމަތްތެރިވެގެންވާ ކަމެއްގެ ގޮތުގައެވެ. ތިމާނޫން އެހެން އެއްވެސް މީހަކު ، ވެރިކަމުގައި ހުންނަން ނޭދޭމީހުންވެސް ދުނިޔޭގައި އުޅޭނެއެވެ. އެއީ މައްސަލައެއް ނޫނެވެ. އެއީ ، އެފަދަ މީހުންގެ ޠަބީޢަތުގައި ހަރުލާފައި ހުންނަ ސިފައެކެވެ.
