(10 އޭޕްރީލް 2023 ގައި ޝާއިއުކުރި ބަޔާ ގުޅޭ)
ޔަޢުޤޫބުގެފާނުގެ ބޭފުޅުންނާއެކު އެކަލޭގެފާނު ، ދިރިއުޅުއްވަމުން ގެންދަވަނީ ކަންޢާނުގައެވެ. މިޞްރަށް މިއައި ބޮޑުތަދުގެ އަސަރު އެސަރަޙައްދަށްވެސް ފޯރިއެވެ. އެންމެކައިރިންވެސް ލާހިކު އަގެއްގައި އެއްޗެއް ގަންނަން ލިބެނީ މިޞްރުންނެވެ. އެހެންކަމުން ، މިޞްރުން ތަކެތި ގަތުމަށްޓަކައި ، ބުންޔާމީން ފިޔަވައި އެހެންބޭފުޅުން ، މިޞްރަށް ފޮނުއްވިއެވެ. ބުންޔާމީން ބެހެއްޓެވީ ޔަޢުޤޫބުގެފާނު އަރިހުގައެވެ. ޔަޢުޤޫބުގެފާނުގެ ބޭފުޅުން ފެނިވަޑައިގަތުމުން ، ޔޫސުފުގެފާނަށް އެބޭފުޅުން އެނގިވަޑައިގަތެވެ. އަދި އެބޭފުޅުންނަށް ކަމޭހިއްތަވައި ، ގޭގެ އަހުލުވެރިންގެ ޙާލުއަޙުވާލު އޮޅުންފިލުއްވައި ހެއްދެވިއެވެ. އެހެންނަމަވެސް ، ޔޫސުފުގެފާނަކީ ކޮންބޭފުޅެއްކަން ސިއްރު ކުރެއްވިއެވެ. ބޭބޭފުޅުންގެ ވާހަކަތަކުން ، ބައްޕަ ޔަޢުޤޫބގެފާނާއި ކޮއްކޮ ބުންޔާމީންގެ ވާހަކަ ، ޔޫސުފުގެފާނަށް ދެންނެވިއެވެ.
ދެން ފަހަރަކުން ، މިޞްރަށް އަންނައިރު ، ކޮއްކޮ ، ބުންޔާމީން ގެނައުމަށް ޔޫސުފުގެފާނު ލަފާދެއްވިއެވެ. އަދި ބުންޔާމީން ނުގެނެއްސިނަމަ ، އިތުރަށް އެމީހުންނަށް ގޮވާން ނުލިބޭނެކަންވެސް އެންގެވިއެވެ. އަދި ، އަލުން އައުމަށް ބާރުއެޅުމަށްދެވޭ ހަދިޔާއެއްގެ ގޮތުގައި އެމީހުން ގަތްތަކެއްޗާއެކު ، އޭގެ އަގުވެސް ދެއްވިއެވެ.
އެބޭފުޅުން ވަޑައިގެން ، ޔަޢުޤޫބުގެފާނަށް ދެންނެވިއެވެ. " ބައްޕާއެވެ ! އަޅުގަނޑުމެންނަށް ހަމަޔަށް ތަކެއްޗެއް ނުލިބުނެވެ. އެތަކެތި ހަމަޔަށް ލިބުމަށްޓަކއި ، ބުންޔާމީން ތިމަންމެންނާއެކު ފޮނުއްވައިދެއްވާށެވެ ! އޭނާއާމެދު ތިމަންމެން އެންމެން ސަމާލުވެ ރައްކާތެރިކަން ދޭނަމުއެވެ. " ހައްދަވާނެގޮތް ބޮޑުވެ ، ޔަޢުޤޫބުގެފާނު ކަންބޮޑުވެވަޑައިގަތެވެ. އެބޭފުޅުންނަށް ، އެކަލޭގެފާނު އިތުބާރު ކުރައްވާނީ ކޮންފަގަޔަކުން ހެއްޔެވެ ؟ ޔޫސުފުގެފާނު ، އެބައިމީހުންނާ ޙަވާލުކޮށް ފޮނުވިފަހަރު ، އެކަލޭގެފާނު ވަނީ ގެއްލިފައެވެ. އެކަލޭގެފާނު އެކަމަކަށް އެއްބަސްވެވަޑައެއް ނުގެންނެވިއެވެ. އެހެންނަމަވެސް ، ދުވަސްކޮޅެއްވީތަނާ ، ގޮވާޟުގެ ބާވަތްތައް މަދުވެ ، މިޞްރަށް ދިއުންނޫންގޮތެއް ނެތުނެވެ. އެންމެފަހުން އެބޭފުޅުންނާއެކު ، ބުންޔާމީން ފޮނުއްވުމަށް ޔަޢުޤޫބުގެފާނަށް މަޖުބުރުވެ ވަޑައިގަތެވެ.
ބުންޔާމީން ސަލާމަތް ކުރުމުގެ ޢަހުދު ކަށަވަރު ، އެބޭކަލުންގެ ކިބައިން ޔަޢުޤޫބުގެފާނު ހޯއްދެވިއެވެ.
ޔަޢުޤޫބުގެފާނުގެ ބޭފުޅުން މިޞްރަށް ވަޑައިގެން ޔޫސުގެފާނު އަރިހަށް ވަޑައިގަތެވެ. ބުންޔާމީން ފެނިވަޑައިގަތުމާއެކު ، އެއީ އެކަލޭގެފާނުގެ ކޮއްކޯފުޅުކަން ޔޫސުފުގެފާނަށް އެނގިވަޑައިގަތެވެ. ބުންޔާމީން އެއްފަރާތަކަށް ގެންދަވައި ، އެކަލޭގެފާނުގެ ކަންފަތްދޮށުގައި ޔޫސުފުގެފާނު ވިދާޅުވިއެވެ. " އަހުރެންނަކީ ތިބާގެ ބޭބެއެވެ. އެމީހުން އަހުރެންނަށް ހެދިގޮތުގެ ވާހަކަ ސިއްރުކޮށްފައި ބާއްވާށެވެ ! "
އޭގެ ފަހުދުވަހު ، ޔޫސުފުގެފާނު ، އެކަލޭގެފާނުގެ ބޭބޭފުޅުންގެ ކަންވާރުތަކަށް ގޮދަންއަޅައި ފުރައިދެއްވިއެވެ. އަދި ރަސްގެފާނުގެ ރަންތަށްޓެއް ، ބުންޔާމީންގެ ދަބަހަށް ލެއްވިއެވެ.
އެބޭފުޅުންގެ ޤާފިލާ މިޞްރުގެ ރަށްބޭރުން ހުއްޓުވިއެވެ. އަދި ގެއްލިގެން ހޯދަމުންގެންދާ ، ރަންތަށި އެޤާފިލާގެ މީހެއްގެ ދަބަހުގައި އޮތްތޯ ޗެކްކުރަމުން ގެންދިޔައެވެ. އެންމެފަހުން ، ބުންޔާމީންގެ ދަބަހުން އެތަށި ފެނުނެވެ. ރަސްގެފާނުގެ ސިފައިން އެޤާފިލާގެ ދަތުރު ހުއްޓުވިއެވެ. އަދި އެއީ ، ވަގުންކަމުގައި ނިންމައި ރަސްގެފާނުގެ ދަރުބާރަށް އެންމެން ޙާޟިރުކުރަން ނިންމިއެވެ.
(ނުނިމޭ)
