އިންސާނުންގެ އަޞްލުކަމުގައިވާ ، ސަލާމްލެއްވި އާދަމުގެފާނު ، ދުނިޔެއަށް އުފަންކުރެއްވުމުގެ ޢަޖައިބު ކުރުވަނިވި މުޢުޖިޒާތް ، ވަރަށް ރިވެތި އަދި ފުރިހަމަ ގޮތެއްގައި ، އިސްލާމްދީނުގައި ތަފްޞީލުކޮށްދީފައި އެބައޮތެވެ. ޔަހޫދީންނާއި ނަޞާރާއިންގެ ތާރީޚީ އާދަކާދައާއި ސަގާފަތު ، މިކަމުގައި ދާދިއެއްގޮތެވެ. އެހެނަސް ، ކީރިތި ޤުރުއާނުގައި ، އާދަމުގެފާނުގެ ވާހަކަ ގެނެސްދެއްވާފައިވާގޮތް ، އެހެން ފޮތްތަކާ ތަފާތުކަން ފާހަގަކޮށްލަން ޖެހެއެވެ.
މޫސާގެފާނަށް ބާވައިލެއްވި ތަވްރާތުގައި ﷲ ، އާދަމް ޢަލައިހިއްސަލާމް އުފައްދަވައިފައިވާކަމަށް ބަޔާންވެގެންވަނީ ، ބިމުގެ ހިރަފުހުން ކަމުގައެވެ. ފޮތުގެ އަހުލުވެރިން ބަޔާންކުރާގޮތުގައި ، ތަވްރާތުގައި ބަޔާންވެގެންވަނީ ޙުކުމްތަކެކެވެ. އޭގެއިތުރަށް ޔަހޫދީން ގެންގުޅޭ އެހެންފޮތެއް އޮވެއެވެ. އެއީ ތަމޫދެވެ. ތަމޫދުގައި ބަޔާންކުރެވިފައި އޮންނަކަމަށްވަނީ ، ޢަމަލުކުރަންޖެހޭ ގޮތްތަކެކެވެ. ތަމޫދުގައި ބަޔާޏްކުރެވިފައި އޮންނަ ގޮތުގައި ސަލާމްލެއްވި އާދަމުގެފާނު އުފައްދަވައިފައިވަނީ ، މަޑް ނުވަތަ ކިސަޑުންނެވެ. ހުރިހައި ފޮތެއްވެސް ﷲ ބާވައިލައްވާފައިވަނީ ، ޙައްޤާއި ބާތިލުވަކިކޮށްދެއްވައި ، އިންސާނުން އުޅެންވީ ތެދުމަގު ދެއްކެވުމަށްޓަކައެވެ.
ކީރިތި ޤުރުއާނުގެ ބަޤަރާ ސޫރަތުގެ 30 ވަނަ އާޔަތުގައި ، މަލާއިކަތް ބޭކަލުންނާ މުޚާތަބުކުރައްވައި ﷲ ވަޙިކުރައްވާފައި ވެއެވެ.
" ހަމަކަށަވަރުން ، ބިމުގައި ޚަލީފާޔަކުލައްވާހުށީމޭ ، ކަލޭގެފާނުގެ ވެރިރަސްކަލާނގެ ، މަލާއިކަތުންނަށް ވަޙީކުރެއްވިހިނދު ހަނދުމަކުރައްވާށެވެ ! އެބޭކަލުން ، (އެހިނދު ، ﷲ އަށް ) ދެންނެވޫއެވެ. އަޅަމެން ، އިބަރަސްކަލާނގެޔަށް ޙަމްދާއެކު ތަސްބީޙަ ކިޔައި ، އިބަރަސްކަލާނގެޔަށް ތަޤްދީސް ކޮށްކޮށްތިއްބައި ، އެބިމުގައި ފަސާދަ އުފައްދައި ، ލޭއޮހޮރުވާނޭބަޔަކު ، އިބަރަސްކަލާނގެ އެބިމުގައި ލައްވަނީތޯއެވެ ؟ އެކަލާނގެ ( މަލާއިކަތް ބޭކަލުންނަށް ) ވަޙީކުރެއްވިއެވެ. ހަމަކަށަވަރުން ، ތިޔަބައިމީހުންނަށް އެނގިގެންނުވާ ކަންކަން ، ތިމަންރަސްކަލާނގެ ދެނެވޮޑިގެންވަމެވެ. "
ސަލާމްލެއްވި އާދަމުގެފާނުގެ ވާހަކަ ފެށެނީ މިހިސާބުންނެވެ. އެއީ އެންމެހައި އިންސާނުންގެ އަޞްލެވެ. އެންމެންގެ ބައްޕައެވެ. ދުނިޔޭގައި ﷲ އުފައްދަވައި ޚަލްޤުކުރެއްވި ފުރަތަމަ އިންސާނާއެވެ. ބިމުގެ މަށިން ނުވަތަ ފަހުން ، އާދަމްގެފާނު އުފެއްދެވުމަށްޓަކައި ، މަލާއިކަތްބޭކަލުން ބިމަށް ފޮނުއްވައިގެން ، ހުރިހައި ވައްތަރެއްގެ މަށި ނުވަތަ ފަސް ގެންނަވައި އެއްކުރައްވައި ، ﷲ އިންސާނާ އުފެއްދެވިއެވެ. ރަތާއިހުދާ އަދި ކަޅާ މުށިކުލައިގެ ފަސް އެއްކުރެއްވިއެވެ. އޭގެތެރޭގައި ، މަޑު އަދި ރޫޅިފައިވާ ، ހަރު އަދި ކަސް ވެލިހިމެނެއެވެ. އެފަސް ގެނެވިފައިވަނީ ފަރުބަދަތަކުންނާއި ވާދީތަކުންނެވެ. އަދި ހަނަފަސް ސަހަރާތަކުންނާއި ބޯޖަންގަލިތަކުން ގެނެވިފައިވާ ހުރިހައިބާވަތެއްގެ ވެއްޔެކެވެ. އާދަމްގެފާނު އުފެއްދެވި މުށި ނުވަތަ ފަހަކީ ، އެކިބާވަތުން މަސްހުނިވެގެންވާ އެއްޗެއްފަދައިން ، އިންސާނުންވެސް ވަނީ އެކިކުލަޔާއި އެކި ސޫރައިން އަދި ފަޤީރުކަމާއި މުއްސަނދިކަމުން މަސްހުނިވެފައެވެ.
އާދަމްގެފާނު އުފެއްދެވި ފަހަށް ނިސްބަތްކުރައްވައި ، ކީރިތި ޤުރުއާނުގައި އެކިނަމުން ޙަވާލާދެއްވާފައި ވެއެވެ. އާދަމްގެފާނު އުފެއްދެވުމަށް ބޭނުންކުރެއްވި ، ފަހަށް ނުވަތަ މުށްޓަށް ، އެކި މަރުޙަލާތަކުގައި އެކިފަހަރަށް އެކިނަން ދެވިފައި ވެއެވެ. ބިމުން ގެނެވުނު ފަހުގެނަން ބޭނުންކުރެވެމުން ދިޔައީ ފަހުގެ ގޮތުގައެވެ. ކީރިތި ﷲ ވަޙީކުރައްވައި، ސިފަކުރައްވައިފައިވަނީ މުށީގެ ގޮތުގައެވެ. ފަސް ، ފެނާ އެކުވުމުން ކިސަޑަށްބަދަލުވެ ، އެގޮތުގައި ހުރެ ، ފެން ހިނދި ، ތަތް މުށްޓަށް ނުވަތަ ކްލޭއަށް ބަދަލުވެގެންދިޔައެވެ. އެހެންހުރެ ، އޭގައި ވަހެއް އުފެދުނެވެ. އަދި ކުލަޖެހި އެކުލައިގެ އަނދިރިކަމުން ، ކަޅުކަމެއް އުފެދި އޮމާން ވެގެން ދިޔައެވެ. މިއީ އާދަމުގެފާނު އުފައްދަވައި ސޫރަކުރެއްވުމަށް ، ﷲ އިޚްތިޔާރުކުރެއްވި މަށްޓެވެ. އެއަށްފަހު ، އާދަމުގެފާނުގެހަށިގަނޑު މަށިން އުފައްދަވައި ، ފުރިހަމަވުމުން އެއިން އަޑެއް އުފެދުނެވެ.
އެއަށްފަހު ، މަށިން އިންސާނަކު ހައްދަވާނެކަމުގައި ، މާތްﷲ މަލާއިކަތުންނަށް ވަޙީކުރެއްވިއެވެ. އެހިނދު ، އެބޭކަލުން އެކަލާނގެޔަށް ކިޔަމަންތެރިވެ ތަސްބީޙަ ދަންނަވާ ތިބިޙާލުގައި ، ބިންފަސާދަކުރާނެ ބަޔަކު އުފެއްދެވީތޯއޭ މަލާއިކަތްބޭކަލުން ދެންނެވިއެވެ. މަލާއިކަޔްބޭކަލުންގެ އެކަންބޮޑުވެވަޑައިގަތުމަށް ، އެކަލާނގެ ވަޙީކުރެއްވީ ، އެބޭކަލުންނަށް އެނގިވަޑައިނުގަންނަވާ ކަންކަމުގެ ޢިލްމު އެކަލާނގެޔަށް އެނގިވޮޑިގެންވާ ކަމުގައެވެ.
(ނުނިމޭ)
