ޔޫސުފު ޢަލައިހިއްސަލާމަކީ ، ސަލާމްލެއްވި ޔަޢުޤޫބުގެފާނުންގެ ދެވަނަޔަށް އެންމެ ހަގު އަދި އެންމެ ލޯބިފުޅުވާ ދަރިކަލުންނެވެ. އެކަލޭގެފާނުންގެ 12 ވަނަ ދަރިކަލުންނެވެ. ޔޫސުފުގެފާނާ ނުލައި ޔަޢުޤޫބުގެފާނުންގެ 11 ދަރިކަލުން ތިއްބެވިއެވެ. ޔޫސުފުގެފާނާއި ބުންޔާމީން އަކީ ، އެއްމަންމަޔަކަށް ލިބިވަޑައިގެންފައިވާ ދެބޭފުޅުންނެވެ. ދެންތިއްބެވި ބޭފުޅުންނަކީ ، އެދެބޭފުޅުންނާ އެއްބަފާ ، ވަކިބަނޑަކަށް ލިބިވަޑައިގެންފައިވާ 10 ބޭފުޅުންނެވެ.
ޔޫސުފު ޢަލައިހިއްސަލާމް އަކީ ތުއްޕުޅު ޒުވާން ބޭފުޅެކެވެ. އެއްދުވަހެއްގެ ހެނދުނު އެކަލޭގެފާނު ތެދުވެވަޑައިގަތީ ހުވަފެންފުޅެއް ދެކެވަޑައިގެންނެވެ. އެކަލޭގެފާނުގެ ބައްޕާފުޅު ޔަޢުޤޫބުގެފާނު އަރިހަށް ވަޑައިގެން ވަރަށް ޝަޢުޤުވެރިކަމާއެކު ، ހުވެފެންފުޅުގެ ވާހަކަ ބައްޕަޔަށް ދެންނެވިއެވެ. އެކަލޭގެފާނު ވިދާޅުވިއެވެ.
" ބައްޕާފުޅާއެވެ ! ތިމަންނަޔަށް ހުވަފެންފުޅެއް ފެނިވަޑައިގެންފިއެވެ. ތިމަންކަލޭގެފާނަށް ފެނިވަޑައިގަތީ ، 11 ތަރިއާއި އިރާ އަދި ހަނދެވެ. އެތަކެތި ތިމަންކަލޭގެފާނަށް ސަޖިދަ ޖަހާތީ ތިމަންކަލޭގެފާނު ދެކެވަޑައިގަތީމެވެ. "
ޔަޢުޤޫބުގެފާނު އެހުވަފެންފުޅާމެދު އުފާފުޅުވެވަޑައިގަތެވެ. އަދި ، އެކަލޭގެފާނުގެ އެ ދަރިކަލުން ، ރަސޫލުކަމައިގެން ފޮނުއްވުމަށް ، ﷲ އިޚްތިޔާރު ކުރެއްވިކަމުގެ އިޙްސާސް ލިބިވަޑައިގަތެވެ. ހަމައެއާއެކު ، އެކަލޭގެފާނުގެ އެހެން ދަރިދަރިކަލުން ، ޔޫސުފުގެފާނާމެދު ނުނިޔަތްލައްވައި ، ހިތްގޯސްކޮށްފާނެތީ ކަންބޮޑުވެވަޑައިގަތެވެ. އަދި ، ޔޫސުފުގެފާނަށް ފެނިވަޑައިގަތް ހުވަފެނުގެ ވާހަކައިން ، އެހެން ބޭފުޅުންނަށް ޚަބަރު ނުދެއްވުމަށް ވިދާޅުވިއެވެ. އެއީ އެކަލޭގެފާނަށް ދެރައެއް ދެއްވުމަށް ، އެހެން ބޭފުޅުން ކުރިމަތިލައްވަފާނެކަމުގެ ބިރުފުޅަށެވެ.
ދުވަސްތައް ފާއިތުވަމުންގޮސް ، އެހެން ބޭފުޅުންގެ ހިތްޕުޅުގައި ޔޫސުފުގެފާނާމެދު ޙަސަދަވެރިކަން އުފެދުނެވެ. އެބޭފުޅުންނަށް ޤަބޫލުކުރެއްވުނުގޮތުގައި ، ޔޫސުފުގެފާނަކީ އެހުރިހާ ބޭފުޅުންނަށްވުރެ ޚާއްޞަ ބޭފުޅެކެވެ. އެ ޙަސަދަވެރިކަން ، އިތުރުވަމުންގޮސް ، ޔޫސުފުގެފާނަށް ގެއްލުމެއް ދިނުމަށް ހުރިހާ ބޭފުޅުން ރޭއްވެވިއެވެ. އެބޭފުޅުންނަށް ފެނިވަޑައިގަތީ ، ޔޫސުފުގެފާނު ގެންގޮސް ، ޖަންގަލީގެ ތެރޭގައިހުރި ، މީހުން ބޭނުންކޮށް ނޫޅޭ ވަޅަކަށް ވައްޓައިލެއްވުމަށެވެ.
އެނުބައި ނިޔަތުގައި ، ހުރިހާ ބޭފުޅުން ، ޔަޢުޤޫބުގެފާނު އަރިހަށްގޮސް ދެންނެވިއެވެ.
ތިމަންމެން ބޭރަށް ދާއިރު ، ތިމަންމެނާއެކު ޔޫސުފު ފޮނުއްވައިދެއްވާށެވެ !
ޔަޢުޤޫޞުގެފާނު އެކަމަށް ޖެހިލުންވެވަޑައިގަތެވެ. އަދި އެމީހުންނާއެކު ، ޔޫސުފުގެފާނު ފޮނުއްވުމަށް އިންކާރު ކުރެއްވިއެވެ. އަދި އެމީހުންނަށް ނޭނގި ، ވަލުޖަނަވާރެއް އައިސް ޔޫސުފު ކައިލަފާނެތީ ކަންބޮޑުވެވަޑައިގަންނަވާކަމުގައި ވިދާޅުވިއެވެ. އެހެންނަމަވެސް އެބޭފުޅުން ކުރެއްނުކުރެއްވިއެވެ. ޔޫސުފުގެފާނުގެ ސަލާމަތާއި ރައްކާތެރިކަމަށް ހުރިހާ ބޭފުޅުންވެސް ސަމާލުވެ ، ޔޫސުފަށް ގެއްލުމެއް ނުލިބޭނެފަދައިން ބަލަހައްޓަވައި ބައްޕަގެ އަރިހަށް އެނބުރި ގެންނަވާނެކަމަށް އެބޭފުޅުން ދެންނެވިއެވެ.
އޭގެ އަނެއްދުވަހު ، ޔޫސުފުގެފާނު ، ބޭބެމެންނާއެކު ބޭރަށް ވަޑައިގަތުމަށް ތައްޔާރުވެ ވަޑައިގަތެވެ. ދަތުރުކުރައްވަމުންގޮސް ވަރަށް ދުރަށް ވަޑައިގަތެވެ. ޔޫސުފުގެފާނު އެއްލައިލުމަށް ކަމުދާނެ ފުންވަޅެއް ހޯދުމުގެ ނިޔަތުގައެވެ. ފެންފޮދު ހިއްޕެވުމުގެ ނަމުގައި އެވަޅުދޮށަށް ހުރިހާ ބޭފުޅުން ވަޑައިގަތެވެ. އަދި ޔޫސުފުގެފާނުގެ ހެދުންކޮޅު ބާލުއްވައި ، ގަދަކަމުން ގެންގޮސް އެވަޅަށް ، ޔޫސުފުގެފާނު އެއްލައިލެއްވިއެވެ. އެކަލޭގެފާނު ދޫކޮށްލެއްވުމަށް ، ޔޫސުފުގެފާނު އާދޭސް ކުރެއްވިއެވެ. އެހެންނަމަވެސް ، އެއަޑެއް އެއިން އެއްވެސް ބޭފުޅަކު ނުއެއްސެވިއެވެ. ޔޫސުފުގެފާނު އެވަޅަށް އެއްލައިލެއްވުމަށްފަހު ، ހުރިހާ ބޭފުޅުން އެނބުރި ބައްޕަ އަރިހަށް ވަޑައިގަތެވެ.
ޔަޢުޤޫބުގެފާނުގެ ހުރިހާބޭފުޅުން ، ކީރިތި ކުރައްވަމުން ވަޑައިގެން ، ބަކަށްޓެއްގެ ލޭ ހާކައިފާ ، ޔޫސުފުގެފާނުގެ ގަމީސްކޮޅު ދައްކަވައި ، އެކަލޭގެފާނަށް ދެންނެވިއެވެ. ތިމަންމެން ރޭސްޖަހައި ދުވުމުގެތެރޭގައި ޔޫސުފު ތިމަންމެންގެ ލޯމަތިން ގެއްލުނެވެ. އަދި ވަލުޖަނަވާރެއް އައިސް ޔޫސުފު ކާލައިފިއެވެ. އެ ބޭފުޅުންގެ ވާހަކަ ، ޤަބޫލުކުރައްވަން ޔަޢުޤޫބުގެފާނަށް ދަތިފުޅުވިއެވެ.
(ނުނިމޭ)
