(9 އޭޕްރީލް 2023 ގައި ޝާއިއުކުރި ބަޔާ ގުޅޭ)
ޔޫސުފުގެފާނު ، ޖަލުބަންދުގައި ހުންނެވި ދުވަސްވަރު ، އެކަލޭގެފާނާއެކުގައި ހައްޔަރުކުރެވިފައިތިބި ދެމީހަކަށް ފެނުނު ހުވަފެން ތަޢުބީރު ކޮށްދެއްވިއެވެ. އެކަލޭގެފާނުގެ ފަރާތްޕުޅުން އެދެމީހުންނަށް ފެނުނީ ހެޔޮކަމާއި ޚުލްޤުގެ މަތިވެރި ބިންގަލުގެ މަތީގައި ހެދިބޮޑުވަމުންދިޔަ އެޒުވާނާގެ ހަރުދަނާކަން ފިޔަވައި އެހެންކަމެއްނޫނެވެ. އެހެންކަމުން އެމީހުންނަށް ފެނުނު ހުވަފެނުގެ ވާހަކަ ޔޫސުފްގެފާނަށް ދަންނަވައި އެހުވަފެން ތަޢުބީރު ކޮށްދެއްވުމަށް ދެންނެވިއެވެ.
އެއްހުވަފެނެއްގައި އެތަނުން އެކަކަށް ފެންނަނީ ، ރަސްގެފާނަށް ރާފޮދު އެރުވޭތަނެވެ. އަނެއް ހުވަފެނުގައި ދެންހުރިމީހާއަށް ފެންނަނީ ، އޭނާގެ ބޯމަތީ ބޭއްވިފައިވާ ޕާނެއް ، ދެދޫންޏެއް އައިސް ކަމުންގެންދާ ތަނެވެ. ޔޫސުފްގެފާނު ، އެދެއެކުވެރިންގެ ހުވަފެން ތަޢުބީރު ކުރައްވައި ވިދާޅުވިއެވެ. ތިޔަތަނުން އެކަކު އޭނާގެ ވެރިމީހާއަށް ބުއިން ދީ ޚިދުމަތް އަދާކުރާނެއެވެ. ދެންހުރިމީހާ ޤަތުލުކުރެވި އޭނާގެ ބޮލުން ދޫނިއައިސް ކާނެއެވެ. އަދި ، އެތަނުން ސަލާމަތްވާނެކަމަށް އެކަލޭގެފާނަށް ފެނިވަޑައިގެންނެވިމީހާގާތު ވިދާޅުވިއެވެ. " ކަލޭގެ ވެރިމީހާގާތު ތިމަންކަލޭގެފާނުގެ ނަން ގަނެދެއްޗެވެ. " އެހެންނަމަވެސް ، ޝައިޠާނާގެ ވަސްވާހަށް ހެއްލި ، ޔޫސުފުގެފާނުގެ ނަންފުޅު ، އޭނާގެ ވެރިމީހާގާތު ބުނުމަށް ހަނދާން ނެތުނެވެ. އަދި ، އެކަލޭގެފާނު އެތައް ދުވަހަކު ، ޖަލުގައި ބަންދުވެފައި ހުންނެވިއެވެ.
އެއްދުވަހަކު ، މިޞްރުގެ ރަސްގެފާނަށް ހުވަފެންފުޅެއް ފެނިވަޑައިގަތެވެ. ރަސްގެފާނު ދަރުބާރު އެއްކުރައްވައި މީސްތަކުންނަށް ވިދާޅުވިއެވެ. " ފަލަ ، ދުޅަހެޔޮ 7 ގެރި ، ނިކަމެތި 7 ގެރިކާތަން ތިމަންނަޔަށް ހުވަފެނުން ފެނިއްޖެއެވެ. އަދި 7 ގޮވާންގަހެއްގެ ކުރި ތާޒާކޮށް ހުރެފައި އަނެއް 7 ގަހުގެ ކުރި ހިކިފައިވާތަންވެސް ފެނުނެވެ. ތިޔަބައިމީހުންނަށް އެނގޭކަމަށް ވަންޏާ އެ ހުވަފެން ތަޢުބީރު ކޮށްދީ ބަލާށެވެ ! "
ޔޫސުފްގެފާނާއެކު ޖަލުގައިހުރި އެކަކު އެވަގުތު ހުރީ ރަސްގެފާނަށް ބުއިން އަރުވާމީހެއްގެ ގޮތުގައެވެ. އަދި ، އެކަލޭގެ ކުއްލިޔަކަށް ، ޔޫސުފުގެފާނުމަތިން ހަނދުމަވެއްޖެއެވެ. އަދި ، ހުވަފެން ތަޢުބީރު ކުރެއްވުމަށް ، އެކަލޭގެފާނުގެ ހުރި ކުޅަދާނަކަން ރަސްގެފާނަށް ދެންނެވިއެވެ. ރަސްގެފާނަށް ފެނިވަޑައިގެންނެވި ހުވަފެނުގެ ވާހަކަ ދަންނަވައި ، އެހުވަފެން ތަޢުބީރު ކޮށްދެއްވުމަށް ދެންނެވުމަށް ، ރަސްގެފާނު ، އެކަލޭގެ ޔޫސުފުގެފާނާ ބައްދަލުކުރުމަށް ޖަލަށް ފޮނުއްވިއެވެ.
ޔޫސުފެގެފާނަށް ، އެކަލޭގެފާނާއެކު ޖަލުގައި ހުރިމީހާ ފެނިވަޑައިގަތުމާއެކު އުފާކުރެއްވިއެވެ. އަދި އޭނާ އެއައީ ، ﷲ މިންވަރުކުރެއްވިގޮތެއްގެ މަތިންކަމަށް ޤަބޫލުކުރެއްވިއެވެ. އެކަލޭގެ އައިސް ، ރަސްގެފާނަށް ފެނިވަޑައިގެންނެވި ހުވަފެންފުޅު ، ޔޫސުފުގެފާނަށް ދަންނަވައި އެހުވަފެންފުޅު ތަޢުބީރު ކޮށްދެއްވުމަށް ދެންނެވިއެވެ. ޔޫސުފުގެފާނު ވިދާޅުވިއެވެ.
" ޖެހިޖެހިގެން ހަތްއަހަރުވަންދެން ތިޔަބައިމީހުން ގޮވާން ކުރާނެއެވެ. އެގޮވާމުން މަދުއެތިކޮޅެއް މެނުވީ ތިޔަބައިމީހުން ނުކާނެއެވެ. އެއީ ތިޔަބައިމީހުންނަށް ތިޔާގެ 7 އަހަރަށްވާނެއެވެ. އެއަށްފަހު ، ކާބޯތަކެތި ލިބުންދަތި ، ތަދު 7 އަހަރު ތިޔަބައިމީހުންނަށް ކުރިމަތިވާނެއެވެ. އެ 7 އަހަރު ކުރީ 7 އަހަރު ތިޔަބައިމީހުން ރައްކާކުރި ގޮވާން ބޭނުންކުރާނެއެވެ. އެއަށްފަހު ތިޔާގެ އަހަރެއް ކުރިމަތިވާނެއެވެ. އެއަހަރު ، މީސްތަކުން ، މޭބިސްކަދުރާއި ޒައިތޫނި އިންދާ ހައްދާނެއެވެ.
ޔޫސުފުގެފާނުގެ ޖަލުގެ އެކުވެރިޔާ ގޮސް ރަސްގެފާނަށް ، ޔޫސުފުގެފާނު ވިދާޅުވެ ދެއްވިގޮތަށް ހުވަފެން ތަރުޖަމާކޮށް ދެންނެވިއެވެ. ޔޫސުފުގެފާނު ، ރަސްގެފާނުގެ ކުރިފުޅުމައްޗަށް ގެނައުމަށް ، ރަސްގެފާނު އަމުރު ކުރެއްވިއެވެ. އެހެންނަމަވެސް ، އެކަލޭގެފާނުގެ ކުށެއްނެތްކަން ސާބިތު ވުމުގެ ކުރިން ޖަލުން ނުކުމެވަޑައިގަތުމަށް ޔޫސުފުގެފާނު އިންކާރު ކުރެއްވިއެވެ. ހަމައެއާއެކު ، ޔޫސުފުގެފާނު ޖަލަށް ލެވުނު ޙާދިސާއާ ގުޅުންހުރި އަންހެނުން ރަސްގެފާނުގެ ދަރުބާރަށް ޙާޟިރު ކުރެވުނެވެ. އެއީ ޔޫސުފުގެފާނު ފެނުމާއެކު އެބައިމީހުންކަމުންގެންދިޔަ މޭވާ ކޮށަމުން އިނގިލި ކޮށުނު އިރުވެސް ނޭނގުނު އަންހެނުންތަކެވެ. އެމީހުން ޔޫސުފުގެފާނުގެ އެއްވެސް ކުށެއްނެތްކަމަށް އިޢުތިރާފުވެ ބަޔާންދިނުމާއެކު ، އެކަލޭގެފާނު މިނިވަންވެ ވަޑައިގަތެވެ. އެބައިމީހުން ބުނޫއެވެ.
" ﷲ އެކަލޭގެފާނަށް ޢަފޫ ކުރައްވާށިއެވެ ! އެކަމުގައި އެކަލޭގެފާނުގެ އެއްވެސް ކުށެއް ނެތެވެ. "
އަލް ޢަޒީޒުގެ އަންހެނުންވެސް ރަސްގެފާނުގެ ދަރުބާރަށް ޙާޟިރު ކުރެވުނެވެ. އެކަނބުލޭގެވެސް ރަސްގެފާނުގެ ކުރިފުޅުމަތީ އެކަމާނާގެ ޢަމަލަށް އިޢުތިރާފް ވިއެވެ. އެކަނބުލޭގެ ބުންޏެވެ. " ތެދުވެރިކަން ސާބިތު ވެއްޖެއެވެ. އެކަލޭގެފާނު ހައްލައިލުމަށް މަސައްކަތްކުރީ ތިމަންނައެވެ. އެކަލޭގެފާނަކީ ތެދުވެރިޔެކެވެ. "
އެހެންކަމުން ، ޔޫސުފުގެފާނުގެ ތެދުވެރިކަން ސާބިތުވެ ، ޖަލުން މިނިވަންވެވަޑައިގަތެވެ. ރަސްގެފާނުގެ ހެޔޮފުޅުކަމަށް ، ޔޫސުފުގެފާނު ޝުކުރު ދެންނެވިއެވެ. އެކަލޭގެފާނުގެ ތެދުވެރިކަމާއި އަމާނާތްތެރިކަން ފެނިވަޑައިގެން ، ރަސްގެފާނު ވަރަށް އުފާކުރެއްވިއެވެ. އަދި ރަސްގެފާނުގެ ބައިތުލްމާލު ބެލެހެއްޓެވުން އެކަލޭގެފާނާ ޙަވާލުކުރެއްވިއެވެ. 7 އަހަރުވަންދެން ، އެކަލޭގެފާނު ގޮވާންކުރައްވާ ، އެތަކެތި ރައްކާކުރެއްވިއެވެ. އެއަށްފަހު ދެން ކުރިމަތިވީ ތަދު ހަތްއަހަރެވެ.
(ނުނިމޭ)
