ސަލާމްލެއްވި އިދުރީސްގެފާނު އަވަހާރަވުމުން ، މުސްލިމުން އެބައިމީހުންގެ އަމިއްލަ ޙާލުގެމައްޗަށް އޮތީ ދޫކޮށްލެވިފައެވެ. އެބައިމީހުންގެ މައްޗަށް ބަސްކިޔާނެ ވެރިޔަކު ނެތެވެ. އިދްރީސް ޢަލައިހިއްސަލާމް އަވަހާރަވުމުން ، އޭގެތެރެއިން އެހެން ނަބީޔަކު ފާޅުކުރެއްވުން ލަސްވުމާއެކު ، ރަނގަޅުމަގު ހޯދުމަށް އެދި ، އަދި އުޅެންވީގޮތް ސާފުކުރުމަށް ، މީސްތަކުން ދެން ދިޔައީ ، އިދްރީސް ޢަލައިހިއްސަލާމްގެ އަރިސް ބޭބޭކަލުން އަރިހަށެވެ. މީސްތަކުންނަށް މައްސަލައެއް ކުރިމަތިވާހިނދު ، އެބޭކަލުންދެއްވާ ލަފާ ބޭނުން ކުރެވެމުން ދިޔައެވެ.
ދުވަސްތައް ފާއިތުވަމުން ގޮސް ، އިދްރީސް ޢަލައިހިއްސަލާމުގެ އަރިސްބޭކަލުންވެސް ދުނިޔެދޫކުރައްވައި ، ދެމިއޮތުމުގެ ޢާލަމަށް ދަތުރުކުރައްވައި ، ހެޔޮމަގަށް މަގުދައްކާނެ ވެރިޔަކު ނުވަތަ ޙާކިމަކު އަނެއްކާވެސް ނެތިއްޖެއެވެ. ﷲ ގެ މަގުން އެއްކިބާވެ ، ދެދުނިޔެއިން ގެއްލުމުގެ ބިރުވެރިކަން މީސްތަކުންގެ މެދުގައި އުފެދުނެވެ.
ލަޢުނަތްލެއްވި އިބިލީސް ، އިންސާނުންގެ ޙާލަތަށް މަކަރުވެރި ލޮލަކުން އައީ ބަލައި ފާރަލަމުންނެވެ. ޢަޤީދާ ބަލިކަށިވަމުންދާ ފިރިހެނުންނާއި އަންހެނުންގެ ހިތަށް ވަސްވާދީ ، މީސްތަކުން މަގުފުރެއްދުމުގެ މަސައްކަތް އިބިލީސް ފެށިއެވެ. އެއްދުވަހަކު ، އިބިލީސް އިންސާނެއްގެ ސިފައިގާ މީސްތަކުންގެ ތެރެޔަށް ނުކުތެވެ. އަދި އެމީހުންގެ ހިތްތަކަށް ވަސްވާސްދީ ، ސިކުނޑިއާ ކުޅެލުމަށް މަސައްކަތް ކުރިއެވެ. އެކަލޭގެ ހަރުއަޑުން ގޮވަމުން ގެންދިޔައެވެ.
" މަރުވެ އެދިޔަ މާތް އިމާމުގެ ބުދު ހަދައި އަޅުކަން ކުރުމުގައި އެބުދު ބޭނުންކުރުމުން ، އަހަރެމެންގެ އަޅުކަމުގައި ލައްވާ ބަރަކާތް އިތުރުވެ ، އެބޭކަލުންގެ ހަނދާން އަހަރެމެންގެ ހިތްތަކުގައި އަބަދަށް ހަރުލައި ހުންނާނެއެވެ. "
އިބިލީހުގެ ބަސްވިކި ، ކުރީގެ އިމާމުގެ ބުދު ހެދުމުން އެމީހުންނަށް ލިބޭނެ އެއްވެސް ގެއްލުމެއް ނެތްކަން ޤަބޫލުކޮށް ، ބުދުތައް ހަދައި ، އަޅުކަމުގައި ، އެމީހުންގެ ހަނދާން އައުކުރަން ފެށްޓިއެވެ. އިޢުތިޤާދު ބަލިކަށިވެފައިވާ އިންސާނާގެ ސިކުނޑީގައި ޖަހާލަތުގެ އޮށް ، އިންދުމުގައި ޝައިޠާނާ ކުރިހޯދިއެވެ. މަޑުމަޑުން އޭނާގެ މަސައްކަތް ތަރައްޤީ ކުރަމުން އިންސާނާގެ ސިކުނޑިއާ ކުޅެމުން ގެންދިޔައެވެ. އެއް އިންސާނަކު އަނެއް އިންސާނަކަށް އަޅުކަން ކުރުމުގެ ވިސްނުން އިންސާނާގައި އުފެއްދުމަކީ އެހާ ފަސޭހައިން ކުރެވިދާނެކަމެއްނޫންކަން އިބިލީހަށް އެނގެއެވެ.
ޖީލެއްނެތިގޮސް ، އައު ވިސްނުމާއި ފިކުރާ އަދި ޚިޔާލާތުން އައު ޖީލެއް އުފެދުމާއެކު ، ބުދު ހަދައިގެން ޙާޞިލްކުރަން ފުރަތަމަ ބޭނުންކުރެވުނު މަޤްޞަދު މީސްތަކުން ހަނދާން ނެތުނެވެ. ފުރުޞަތުގެ ބޭނުންހިފައި ، އަނެއްކާވެސް މީސްތަކުންގެ ކުރިމައްޗަށް އިބިލީސް ނުކުތެވެ. އަދި ، ގޮވަމުން ގެންދިޔައެވެ.
" މީސްތަކުންނޭވެ ! ތިޔަބައިމީހުންގެ ކާބަފައިން ، އަޅުކަން ކުރަމުންގެންދިޔައީ މިހިރަ ބުދު ތަކަށެވެ. މި ބުދުތަކަކީ ، ތިޔަބައިމީހުންނަށް ހުރިހާ ރަނގަޅެއް ގެނެސްދޭނެ އެއްޗެކެވެ. "
އިބިލީހުގެ މިބަސްތައް ހިނގައި ، މީސްތަކުންގެ މެދުގައި ވިކި ، ބުދަށް އަޅުކަންކުރުމުގެ އާދައާއި ރޫޙޫ އަށަގަންނަމުން ދިޔައެވެ. އެންމެފަހުން ޖަހާލަތުގެ އަނދިރިކަމުން ދުނިޔެ އަނދިރިވެ ، މީސްތަކުންގެ މެދުގައި ޝިރުކުގެ ވަބާފެށި ، އިބިލީހުގެ މަސައްކަތް އެންމެ ފުރިހަމަގޮތުގައި ކާމިޔާބު ކުރިއެވެ. އެހިސާބުން ، މީސްތަކުން ދުނިޔޭގައި އުޅެންވީ ގޮތާއި ﷲ ގެ ތެދުމަގު ދެއްކެވުމަށް މިންވަރު ކުރެއްވިއެވެ. މީސްތަކުންނަށް އަލުން އަނބުރާ ، ތެދުމަގު ދެއްކެވުމަށް އެކަލާނގެ އިރާދަކުރެއްވިއެވެ. މިމަތިވެރި މަޤްޞަދު ފުރިހަމަކުރެއްވުމަށްޓަކައި ، ﷲ ސުބްޙާނަހޫ ވަތަޢަލާ އިޚުތިޔާރު ކުރެއްވި ބޭފުޅަކީ ނޫޙު ޢަލައިހިއްސަލާމެވެ.
ނޫޙުގެފާނަކީ ، ޚުލްޤުފުޅު ހެޔޮ އަދި ތެދުވެރި ، ދޫފުޅުހެލޭ ބަލާޣާތްތެރި ބޭފުޅެއްކަމުގައި ﷲ ލެއްވިއެވެ. އަދި އެކަލޭގެފާނަކީ ، އިންތިހާއަށް ކެތްތެރި ބޭފުޅެކެވެ. އެކަލޭގެފާނަށް ކުރިމަތިވެވަޑައިގަތް އެންމެހައި އިމްތިޙާޏުތަކުގައި ، ﷲ ގެ މިންވަރުފުޅާއެކު ، އެކަލޭގެފާނުގެ ކެތްތެރިކަން ، މިސާލެއްގެ ގޮތުގައި ދުނިޔެއަށް ދެއްކެވިއެވެ.
(ނުނިމޭ)
