(29 މާޗް 2023 ގައި ޝާއިއުކުރި ބަޔާ ގުޅޭ)
އާދަމް ޢަލައިހިއްސަލާމް އަވަހާރަވުން
އިންސާނީ ދަރިފަސްކޮޅު ފެށިގެން އައީ އާދަމުގެފާނުގެ ފުށުންނެވެ. ބައެއް ރިވާޔަތުގައި އައިސްފައިވާގޮތުން ، ރަސޫލު ޞައްލަﷲ ޢަލައިހިވަސައްލަމަ ވިދާޅުވެފައިވާ ގޮތުގައި ، އާދަމުގެފާނަށް އެކަލޭގެފާނުގެ ދަރިފަސްކޮޅު ، ﷲ ދެއްކެވިއެވެ. ދާއޫދުގެފާނުގެ ލޯފުޅުން ، އާދަމުގެފާނަށް އަލިކަމެއްފެނިވަޑައިގަތެވެ. އަދި ދާއޫދުގެފާނުދެކެ ، އާދަމުގެފާނު ވަރަށް ލޯބިފުޅުވިއެވެ. އަދި އެކަލޭގެފާނަށްޓަކައި ދުޢާކުރެއްވިއެވެ. " އޭ މަތިވެރިވަންތަ ﷲ އެވެ ! ތިމަންކަލޭގެފާނުގެ ޢުމުރުން 40 އަހަރު އެކަލޭގެފާނަށް ( އެބަހީ ދާއޫދުގެފާނަށް ) ދެއްވާދޭނވެ ! " އާދަމުގެފާނު ދުޢާކުރެއްވިކަމަށް ވެއެވެ. އަދި ﷲ ، އެކަލޭގެފާނުގެ ދުޢާ ޤަބޫލުކުރައްވައި އެކަން ލިޔުއްވިއެވެ.
އާދަމް ޢަލައިހިއްސަލާމަށް ކަނޑައެޅި ، ﷲ މިންވަރުކުރައްވާފައިވާ ޢުމުރުފުޅަކީ ، އެއްހާސް އަހަރުކަމަށް ވެއެވެ. އެހެނަސް ، އެކަލޭގެފާނުގެ ޢުމުރުފުޅުން 960 އަހަރުފުރިހަމަވީތަނާ ، މަރުހިއްޕަވާ މަލާއިކަތާ އެކަލޭގެފާނުގެ އަރިހަށް ވަޑައިގަތެވެ. އާދަމުގެފާނު ޙައިރާންފުޅުވެވަޑައިގެން ވިދާޅުވިއެވެ. " އަޅުގަނޑުގެ ޢުމުރުގައި އަދި ބާކީ 40 އަހަރު އެބައޮތް ނޫންތޯއެވެ ؟ " އާދަމުގެފާނު ވިދާޅުވިއެވެ. އެހިނދު ، އެކަލޭގެފާނުގެ ޢުމުރުފުޅުން 40 އަހަރު ، ދާއޫދުގެފާނަށް ހަދިޔާކުރައްވާފައިވާކަން މަރުހިއްޕަވާ މަލާއިކަތާ ، ހަނދުމަފުޅުކޮށް އެރުއްވިއެވެ. އާދަމުގެފާނު އެކަމަށް އިންކާރު ކުރެއްވިއެވެ. އެތައް އެތައް އަހަރެއްގެފަހުން ، އެންމެ ފަހުގެ ނަބިއްޔާ ، މުޙައްމަދު ޞައްލަﷲ ޢަލައިހި ވަސައްލަމަ ޙަދީސް ކުރެއްވިކަމަށް އައްތިރުމިޒީގައި އައިސްފައި ވެއެވެ. " އާދަމުގެފާނު އިންކާރު ކުރެއްވިއެވެ. ހަމައެފަދައިން ، އާދަމުގެ ދަރިންވެސް އިންކާރު ކުރެތެވެ. އަދި ، އާދަމުގެފާނު ހަނދުމަފުޅު ނެތުނެވެ. ހަމައެފަދައިން ، އާދަމުގެދަރިންވެސް ހަނދުމަ ނެތެއެވެ. އަދި ، އާދަމުގެފާނު ކުށް ކުރެއްވިއެވެ. ހަމައެފަދައިން ، އާދަމުގެ ދަރިންވެސް ކުށަށް އަރައިގަނެތެވެ. "
އާދަމުގެ ދަރިންނަކީ ، ހަނދާންނެތޭ ، އަދި ހަނދާންނެތޭއިރަށް އިންކާރުކުރެވޭ ބަޔެކެވެ. އާދަމުގެފާނުވެސް ހަނދުމަފުޅު ނެތުނީއެވެ. އިތުރުފުޅު ހައްދަވާ އިންކާރު ކުރެއްވީކީ ނޫނެވެ. އަދި އެކަމަށް ، ﷲ ވަނީ އެކަލޭގެފާނަށް މާފުކޮށްދެއްވާފައެވެ. އާދަމުގެފާނު ، ﷲ އަށް ވަކީލު ކުރެއްވިއެވެ. އަދި އަވަހާރަފުޅުވެއްޖެއެވެ. އެހިނދު ، މަލާއިކަތްބޭކަލުންގެ ޖަމާޢަތެއް ބިމަށް ފައިބައިވަޑައިގެން ، އެކަލޭގެފާނުގެ ހަށިކޮޅު އޮނަހިރި ނަންބަރަކަށް ނިސްބަތްވާ ޢަދަދަކަށް ދޮންނެވިއެވެ. އަދި ކަށްވަޅު ކޮންނަވައި ، އިންސާނުންގެ އުފެދުންކަމުގައިވާ އާދަމް ޢަލައިހިއްސަލާމް ވަޅުފުޅުލެއްވިއެވެ.
އާދަމުގެފާނު އަވަހާރަވުމުގެކުރިން ، އެކަލޭގެފާނުގެ ދަރިކޮޅަށް ނަޞޭޙަތްތެރިވެ ވަޑައިގަތެވެ. ﷲ އީ އިންސާނުން ދޫކޮށްލައްވާނެ ކަލަކު ނޫންކަމާއި ، ﷲ ގެ ރައްކައުތެރިކަން އަބަދުވެސް ލިބިލިބި ހުންނާނެކަމާއި ، މަގުދައްކަވާނެކަން އެންގެވިއެވެ. އިންސާނުންނަށް މަގުދެއްކެވުމަށްޓަކައި ، މުޢުޖިޒާތާއެކު ޚާއްޞަ ނަންފުޅުތަކެއްގައި އިތުރު ރަސޫލުންނާއި ނަބީން ފޮނުއްވާނެކަން އެކަލޭގެފާނު ، އިންސާނުންނަށް ހަނދާން ކޮށްދެއްވިއެވެ. އަދި އެހުރިހާ ބޭކަލުންވެސް ގޮވައިލައްވާނީ ﷲ ގެ މަގަށް ކަމާއި ، އެއްކައުވަންތަ ﷲ އަށް އަޅުކަންކުރުމަށްކަމަށް ވިދާޅުވެފައި ވެއެވެ. އެކަލޭގެފާނަށްފަހު ދެންހުންނަވާނީ އެކަލޭގެފާނުގެ އުފަން ދަރިކަލުން ޝީޘްކަމުގައިވެސް ، އަވަހާރަވުމުގެ ކުރިން އަންގަވައިފާ ވެއެވެ.
(ނިމުނީ)
