'ޔާރްސް' މަރުކާގެ އިންޓަކޮންޓިނެންޓަލް ބެލިސްޓިކް މިސައިލް ބޭނުންކޮށްގެން، ސިފައިންގެ އެތައް ހާސް ބަޔަކު ބައިވެރިވާ އަސްކަރީ ތަމްރީނުތަކެއް ފަށައިފި ކަމުގައި ރަޝިޔާއިން ބުނެފިއެވެ. މިއީ ނިއުކުލިޔާ މިސައިލްލަތަކަށް ވާއިރު، މިކަމުގައި ރަޝިޔާގެ ބޭނުމަކީ ވާދަވެރިންނަށް ރަޝިޔާގެ ނިއުކުލިޔަ ބާރު ހުރިވަރު ދައްކާލުން ކަމުގައި ބެލެވެއެވެ.
"ތަމްރީނުތަކުގައި ސިފައިންގެ ޖުމްލަ 3000 މީހުންނާއި، 300 އަސްކަރީ އާލާތް ބޭނުންކުރާނެ." ރަޝިޔާގެ ޑިފެންސް މިނިސްޓްރީން މިއަދު ޓެލެގްރާމް މެދުވެރިކޮށް ނެރުނު ބަޔާނެއްގައި ވެއެވެ. ބަަޔާނުގައި އިތުރަށް ބުނެފައިވާ ގޮތުގައި ތަމްރީނުތަކުގައި ބައިވެރިވާ ސްޓްރެޓީޖިކް މިސައިލް ޔުނިޓުން ޔާރްސް މަރުކާގެ މިސައިލް ބޭނުންކުރާނެއެވެ.
ރައީސު ވްލާޑިމީރް ޕުޓިންގެ އަމާޒަކީ ކުރިން ބޭނުންކުރި 'ޓޮޕޯލް' މިސައިލް ސިސްޓަމްގެ ބަދަލުގައި އަލަށް ބޭނުންކުރަން ފެށި ޔާރްސް މިސައިލް ސިސްޓަމަކީ ރަަޝިޔާގެ 'ބަލިނުކުރެވޭނޭ' ބާރުގެ މުހިއްމު ބައެއްކަމުގައި ހެދުމެވެ.
މި ތަމްރީނުތަކުގައި ޔާރްސް މިސައިލް ސިސްޓަމްގެ އިތުރަށް އޮމްސްކް މަރުކާގެ މިސައިލްވެސް ބޭނުންކުރާނެއެވެ. އަދި ރަޝިޔާއިން ބުނެފައިވާ ގޮތުގައި ޔާރްސް މިސައިލް ބޭނުންކޮށްގެން އެ ގައުމުގެ ތިން ސަރަހައްދެއްގަައި ތަމްރީނުތައް ކުރިއަށް ގެންދާނެެއެވެ. އެެހެންނަމަވެސް އެއީ ކޮން ސަރަހައްދުތަކެއްކަން ހާމަކޮށްފައި ނުވެއެވެ.
އަސްކަރީ ބްލޮގަރުން ބުނާގޮތުގައި ޔާރްސް ބެލިސްޓިކް މިސައިލަކީ އުޅަނދުގައި އެއްތަނުން އަނެއްތަނަށް ގެންދާ ހަރުގައި ބޭނުންކުރެވޭ އެއްޗެކެވެ.
ފާއިތުވި އަހަރުގެ ފެބުރުވަރީ މަހު ރަޝީޔެ ސިފައިން ޔުކްރޭނަށް އަރައި ހަނގުރާމަފެށި ފަހުން، ރަޝިޔާއިން ވަނީ އެތައް ފަހަރެއްގެ މަތިން އަސްކަރީ ތަމްރީނުތައް ބާއްވާފައެވެ. އޭގެ ތެރޭގައި ރަޝިޔާގެެ އިތުރުން ޗައިނާއާއި، ދެކުނު އެފްރިކާގައި ބޭއްވި ތަމްރީނުތައް ވެސް ހިމެނެއެވެ.
ރަޝިޔާގެ އެންމެ ޒަމާނީ ސްޓްެރެޓީޖިިކް ހަތިޔާުރުގެ ގެތޭގައި ހިމެނޭ ޔާރްސް އިންޓަކޮންޓިނެންޓަލް ބެލިސްޓިކް މިސައިލަކީ 500 ކިލޯޓަންގެ ނިއުކުލިޔާ 'ބޮލާ'އެކު ގަޑިއަކު 24 ހާސް ކިލޯމީޓަރުގެ ބާރުމިނުގައި 11 ހާސް ކިލޯމީޓަރު ދުރަށް ދަތުރުކުރުމުގެ ގާބިލުކަން ލިބިފައިވާ މިސައިލެކެވެ.
