(27 މާޗް 2023 ގައި ޝާއިއުކުރި ބަޔާ ގުޅޭ)
އެހެންނަމަވެސް ، އާދަމުގެފާނާއި ޙައްވާގެފާނު ، ދުނިޔެމައްޗަށް ފޮނުއްވުނީ ހުކުރު ދުވަހެއްގައިކަން ، ރަސޫލު ޞައްލަﷲ ޢަލައިހި ވަސައްލަމަގެ ސުންނަތުން އެނގެން އެބައޮތެވެ. އެކަލޭގެފާނު ޙަދީސް ކުރައްވާފައިވާކަމަށް ޞަޙީޙު މުސްލިމްގައި ބަޔާންވެގެން ވެއެވެ.
" އިރު އެދުވަހެއްގައި އަރާ އެންމެ މާތަދުވަހަކީ ހުކުރު ދުވަހެވެ. އާދަމުގެފާނު އުފެއްދެވީ ހުކުރު ދުވަހެއްގައެވެ. އެކަލޭގެފާނު ، ދުނިޔެމައްޗަށް ފޮނުއްވުނީ ހުކުރު ދުވަހެއްގައެވެ.
އާދަމް ޢަލައިހިއްސަލާމުގެ ދެކަނބަލުން ، ސުވަރުގެއިން ނުކުމެވަޑައިގެން ބިމަށް ފައިބާވަޑައިގަތުމަށްފަހު ، ދިރިއުޅުއްވަން ފެއްޓެވިއެވެ. އެދެކަނބަލުން ، ދުނިޔޭގައި ދިރިއުޅުއްވުމަށްޓަކައި ، ﷲ ގެ ޙަޟުރަތުންވަނީ ކަންތައްތަކެއް ފުރިހަމަކޮށްދެއްވާފައެވެ. އިންސާނާއަށް ވަސްވާސްދީ ، މަގުފުރައްދާ ޝައިތާނާއާ ބެހޭގޮތުން ، އެދެކަނބަލުންނަށް ވަނީ ތަޖުރިބާތަކެއް ލިބިވަޑައިގެންފައެވެ. ދުނިޔޭގައި ލެއްވި އެންމެހައި ތަކެތީގެ ނަންތައް ، ﷲ ވަނީ އާދަމް ޢަލައިހިއްސަލާމަށް އުނގަންނަވައި ދެއްވާފައެވެ. އަދި އެތަކެތީގެ ބޭނުމާއި ބޭނުންކުރައްވާނެގޮތް ވަނީ ދަސްކޮށްދެއްވާފައެވެ. އާދަމް ޢަލައިހިއްސަލާމްވަނީ ، ބިމުގައި ޚާލީފާވެރިވެވަޑައިގެން ، ދުނިޔެ ބެލެހެއްޓުމާ ޙަވާލުވެވަޑައިގެން އަދި ﷲ ގެ ރަސޫލެއްގެ ގޮތުގައި ބިމުގައި ޤާއިމްވެވަޑައިގެންފައެވެ.
ﷲ ގެ އެންމެ ފުރަތަމަ ރަސޫލެއްގެގޮތުން ، އާދަމްގެފާނުގެ މަސްއޫލިއްޔަތަކަށްވީ ، ﷲ އަށް އަޅުކަންކުރުމާއި އެކަލާނގެ ހަޟުރަތަށް ތަވްބާވާނެގޮތް ، އެކަލޭގެފާނުގެ އަނބިކަނބަލުން ހައްވާގެފާނަށާއި އެކަލޭގެފާނުގެ ދަރިފަސްކޮޅަށް ދަސްކޮށްދެއްވުމެވެ. ﷲ ގެ ޤާނޫނުތައް ބިމުގައި ހިންގަވައި ، އެކަލޭގެފާނުގެ ޢާއިލާ ބަލަހައްޓަވައި ، ޢާއިލާއަށް އެހީތެރިވެވަޑައިގެން ، ދުނިޔެ ހިންގަވައި ބެލެހެއްޓެވުމުގެ މަސައްކަތް ކުރިޔަށް ގެންދެވިއެވެ. އެކަލޭގެފާނުގެ މަސްއޫލިއްޔަތަކަށްވެފައިއޮތީ ، ދުނިޔެ އާބާދު ކޮށް ބިނާކުރުމާއި ، ﷲ އެންގެވިމަގުން ދުނިޔޭގައި ދިރިއުޅެ ، ދުނިޔެ އާބާދުކުރާނެ ދަރިފަސްކޮޅެއް އުފެއްދެވުމެވެ.
އާދަމް ޢަލައިހިއްސަލާމުގެ ފުރަތަމަ 4 ބޭފުޅުން
އާދަމް ޢަލައިހިއްސަލާމާއި ޙައްވާގެފާނަށް ފުރަތަމަވެސް ލިބިވަޑައިގަތީ އެއްމާބަނޑު ދެބޭފުޅުންނެވެ. އެއީ ފިރިހެން ބޭފުޅަކާއި އަންހެން ބޭފުޅެކެވެ. އެއީ ޤާބީލާއި އޭނާގެ އުޚުތެވެ. ޤާބީލާއެކު އުފަންވެވަޑައިގަތް އޭނާގެ އުޚުތަކީ ، ރީތި ބޭފުޅެކެވެ. ދެވަނަޔަށްވެސް ލިބިވަޑައިގަތީވެސް އެއްމާބަނޑު ދެބެންނެވެ. އެއީ ހާބީލާއި އޭނާގެ އުޚުތެވެ. ހާބީލާއެކު އުފަނވްވަޑައިގަތް އޭނާގެ އުޚުތަކީ ކުރިން ލިބިވަޑާއިގަތް އަންހެން ދަރިކަނބަލުންނަށްވުރެ ސިފަ ހުތުރު ބޭފުޅެކެވެ. ފުރަތަމަ ލިބިވަޑައިގަތް ފިރިހެން ދަރިކަލުން ، ޤާބީލަކީ ހަރުކަށި މިޒާޖެއްގެ ބޭފުޅެކެވެ. އަދި ދެވަނަޔަށް ލިބިވަޑައިގަތް ފިރިހެންދަރިކަލުން ޤާބީލަކީ މަޑުމައިތިރި މިޒާޖެއްގެ ބޭފުޅެކެވެ. މިހަތަރު ބޭފުޅުން ލިބިވަޑައިގަތުމަށްފަހު ، އާދަމް ޢަލައިހިއްސަލާމުގެ ދެކަނބަލުންނާއި ޢާއިލާ ، ވަރަށް އުފާވެރިކަމާއެކު ، ދުނިޔޭގައި ދިރިއުޅުއްވަމުން ގެންދެވިއެވެ. ހާބީލު މަސްއޫލުވެ ވަޑައިގެން އުޅުއްވީ ދަނޑުގޮވާން ކުރެއްވުމުގައެވެ. އަދި ޤާބީލު އުޅުއްވީ ގެރިބަކަރި ގެންގުޅުއްވުމުގައެވެ.
ދުވަސްތައް ފާއިތުވަމުންގޮސް ، ހުރިހާ ބޭފުޅުން ފިރިފުރާ ޢުމުރަށް އަޅައި ، ކައިވެނިކުރެއްވުމާ ހިސާބަށް ، ބޮޑުފުޅުވެވަޑައިގެންފިއެވެ. އާދަމްގެފާނުގެ ބޭފުޅުންކުރެ އެއްނިބޫ އެއްބަނޑު ފިރިހެންބޭފުޅުން ، އަނެއްނިބޫ އަންހެން ބޭފުޅުންނާ ކައިވެނިކުރެއްވުމަކީ ، ޢާންމުކޮށް ހިނގަމުން އައިސްފައިވާ ކަމެއްކަމުގައި ރަސޫލު ޞައްލަﷲ ޢަލައިހި ވަސައްލަމަގެ އަރިސް އަޞްޙާބުބޭކަލުން ރިވާ ކުރައްވައެވެ. އެބޭފުޅުންގެ ތެރޭގައި އިބްނު ޢައްބާސް އަދި އިބްނު މަސްޢޫދުފަދަ ބޭފުޅުން ހިމެނިވަޑައިގެންނެވިއެވެ. އެއީ ﷲ އެކަން ރާއްވަވާފައިވާ ގޮތެވެ. ދުނިޔެ އާބާދުވެގެން ދިއުމުގައި ، އާދަމް ޢަލައިހިއްސަލާމުގެ ފިރިހެން ދެބޭފުޅުން ، އަނެއްނިބޫގެ އަންހެން ބޭފުޅުންނާ ކައިވެނިކުރެއްވުމަކީ އެކަލާނގެ މިންވަރުކުރައްވާފައިވާ ގޮތެވެ.
ޤަބޫލުކުރެވޭގޮތުގައި ، ދުނިޔެ ފެށުނީއްސުރެ ، ރީއްޗާއި ފުރިހަމަކަމަކީ ، އަންހެނުންނާއި ފިރިހެނުން އެއްބަޔަކު އަނެއްބަޔަކަށް އަޅައިގަންނަ ސިފައަކަށްއޮތީ ވެފައެވެ. އާދަމުގެފާނުގެ ފުރަތަމަ ދަރިކަލުން ހާބީލަށް ، އޭނާ ކައިވެނިބައްލަވައިގަތުމަށް އިޚުތިޔާރުކުރެވުނު އަންހެންބޭފުޅާއާ ހިތްޕުޅާ ހަމައެއް ނުކުރެއްވުނެވެ. ދެންހުރި އަންހެން ދަރިކަނބަލުން ، ހާބީލާއެކު އުފަންވެވަޑައިގަތް އޭނާގެ އެއްމާބަނޑު އުޚުތަށްވުރެ ސިފަހުތުރުވުމަކީ އޭގެ އެއްސަބަބެވެ. ހާބީލުގެ ޚަޞީލަތް ހުރިގޮތުން ، އޭނާގެ ކޮއްކޮ ޤާބީލާ ދެބަސްވެވަޑައިގެން ، އަދި ބައްޕަ ، އާދަމް ޢަލައިހިއްސަލާމުގެ އަމުރުފުޅަށް ކިޔަމަންވެވަޑައިނުގެން ދެކޮޅު ހެއްދެވިއެވެ. އަދި ﷲ ގެ އަމުރުފުޅަށް ނުކިޔަމަންތެރިވެވަޑައިގަތެވެ. ﷲ އިންސާނާ އުފައްދަވާ މިދުނިޔެމައްޗަށް ފޮނުއްވީ ، ހެވާއި ނުބައި ހިމެނޭގޮތަށް އިންސާނާގެ ހަށީގައި އާދަތަކެއް ލައްވާފައެވެ. މިއާދަތަކާގުޅިގެން ، އޭނާގެ ނަފްސުއެދޭގޮތާއި މަޤްޞަދު ޙާޞިލްކުރުމަށްޓަކައި ޤަޟާ ޤަދަރާ މަތިނުކޮށް ، ގޮންޖެހުންތަކާ ކުރިމަތިލައި އެކަމެއް އޭނާ ބޭނުންވާގޮތަކަށް ބަދަލުކުރުމަށް އުޅުމަކީ ، ﷲ އިންސާނާ ކުރައްވާ އިމްތިޙާނެކެވެ.
(ނުނިމޭ)
